《歷史上ê主耶穌》

 | | | 轉寄

第六章_一6.7　耶穌ê早年生活

作者 杜英助 台譯：Lîm Tsùn-io̍k 2020.05.10

6）聖家逃走到埃及避難（馬太2：14、15）：約瑟、馬利亞kah聖嬰耶穌（tú出世約2個月）全家照主ê使者指示，tùi伯利恆城逃走到埃及以後，tī埃及tòa一段時間，大約有一年久，直到希律死去tsiah tùi埃及tńg來以色列。

究竟聖家逃難到埃及ê時，bih tī tó位tòa？馬太無記載。M̄-koh，照一般聖經歷史考古家查考研究ê報告指出，是tī埃及ê舊開羅；當時ê名稱叫做巴比倫[可能tsia ê居民是tī巴別塔建塔期間，因為人類ê語言混亂ê時tùi巴比倫遷徙過來ê。為tio̍h記念故鄉ê緣故，in就kā tsia ê地名iáu稱做巴比倫；開羅ê意思是「新城」，是穆斯林（回教徒）來佔領巴比倫ê時改名稱ê新城名。所以現今ê開羅，舊城區to̍h是屬原來ê巴比倫，是基督徒區；新城區叫開羅，大部分ê居民lóng是埃及ê穆斯林人teh khiā起]。

根據埃及可靠ê基督教（科普特教會）歷史家考證，tī舊開羅有兩个所在是聖家逃難到埃及bat tòa過ê所在：

(1) 偤太人會堂（Ben Ezra Synagogue)附近ê聖家避難教堂（Abu Serga Tsurts)ê地下室。Tsìn前bat開放提供hō͘人朝聖，m̄-koh最近幾年來，m̄知是án怎無ài開放hō͘人參觀；真可能是驚穆斯林人潛入朝聖者ê人群中落去破壞！？因為tī最近（公元2017年）幾年來，tī埃及激進派ê穆斯林人常常因為政治理由，無緣無故殺害基督徒，燒毀教堂。真驚人！

(2) Oá近舊城門ê南端，羅馬古城堡ê附近有一座科普特教會ê聖母堂，名叫懸浮教堂（Al-Mu′allaqah)。Tī教堂ê主堂內有一个坎á ē-tàng行到地下室去；聽教堂ê導覽員講，聖家tī埃及避難也bat tī tsia ê地下室tòa過，m̄-koh，tsia ê地下室現今猶原m̄准朝聖客入去參觀！

7）聖家tùi埃及tńg來到以色列（馬太2：19～23）：馬太福音記載，當想beh殺害聖嬰ê希律王死去以後，tī埃及，忽然主ê使者tī約瑟夢中向伊顯現講：「起來，tshōa細漢gín-á kah祂ê老母tńg去以色列；因為beh殺害這細漢gín-á ê人已經死à。」就án-ne，約瑟to̍h起來tshōa細漢gín-á kah祂ê老母進入以色列。M̄-koh，伊因為聽見亞基老繼承in老父希律做偤太王，驚去到hia mā ē遭害；koh tī眠夢中得tio̍h主ê指示，to̍h往加利利境內去à。In到一座城名叫拿撒勒，to̍h tòa tī hia，這是beh應驗先知所講ê話：「祂beh稱做拿撒勒人。」 聖經作者lóng m̄是專門寫歷史ê學者，當in teh寫歷史故事ê時，經常bē記得kā正確ê年月日mā寫落來；事後，讀者teh閱讀ê時，為tio̍h beh明瞭究竟是tī何年何月何日發生ê，lóng tio̍h開真tsē時間去tshōe相關ê史料查考。M̄-koh，m̄是ta̍k項tāi-tsì lóng有可靠ê資料thang查，Tī tsit段故事中馬太講：「希律死去」，到底希律tang時死去？！馬太雖然是一个聰明ê抽稅ê人，m̄-koh，伊mā無註明。 佳哉希律是偤太人ê王，是一个大人物；所以，偤太人ê歷史家約瑟夫有詳細ê記載，tsiah知影伊是tī公元前4年3月中往生。M̄-koh，希律王到底tī何日往生mā是一項秘密，正確ê時間kah tī啥物所在下葬，因為驚hō͘ 人劫墓，mā lóng非常保密；希律王ê石棺到2007年5月，tsiah被考古學家探測發見，埋葬tī伯利恆南郊ê希律堡ê斜坡。

Mā因為希律王是tī公元前4年3月中往生，有關耶穌降生ê正確年代，歷史學家tsiah鑑定介tī公元前5年到4年之間；直到1991年，英國天文學家發見tio̍h中國漢朝ê天文學家觀察星象ê記錄資料講：Τī公元前5年3月，in觀察空中星象ê移動ê時，忽然發見tio̍h位置是tī遙遠ê魔羯座ê繁星中，有一粒星光特別光iàⁿ-iàⁿ，而且是拖尾溜ê彗星，tī空中中閃亮70工tsiah消失；tī中東波斯ê星象家觀察tio̍h ê時間，因為地球自轉ê ê時差約比中國慢5點鐘，英國ê天文學家tsiah確定耶穌降生ê siōng正確ê年月是公元前5年3月。

經過40工，耶穌ê父母抱祂tsiūⁿ聖殿獻hō͘ 上帝歸聖了後，koh tńg來到伯利恆ê厝（現今名叫奶洞教堂）tòa ê時，東方三博士tsiah到tsia tshōe-tio̍h hit位降生做偤太人ê新生王ê gín-á耶穌，向祂獻禮祝賀。所以推算起來，約瑟tshōa聖母kah Κiáⁿ逃去埃及避難，希律王殺害2歲以下ê嬰á ê時間，kah-ná thang來確定是公元前5年正月中；當時，tī伯利恆ê天氣iáu寒冷，tùi in到埃及避難直到希律王死tī公元前4年3月中，天使kā tsit-ê消息kā約瑟tio̍h tshōa聖母kah Κiáⁿ tńg來以色列，tsit段時間約有一年久。

聖家tńg來到以色列，根據學者kah畫家ê共識：Ιn無tńg來到伯利恆城，卻是到in ê親tsiâⁿ行洗禮約翰ê老母伊利莎白ê厝（聽講，當時行洗禮約翰ê老父撒迦利亞tī希律王殺害嬰á ê時，因為拒絕透露聖嬰耶穌降生ê正確點，suah遭遇殺害，喪失性命à！），所以，咱所看tio̍h真tsē名畫家teh畫耶穌細漢生活ê tshit-thô伴，畫中kan-taⁿ有耶穌ê父母kah行洗禮約翰ê老母同齊teh陪小耶穌kah小約翰sńg，無看tio̍h小約翰ê老父；所以，耶穌kah行洗禮約翰兩位表兄弟，tùi細漢ê時tsūn to̍h真熟sāi，感情真好。

M̄-koh，當聖家tī隱加琳城ê伊利莎白厝裡寄居ê時，in雖然知影想beh殺害聖嬰ê希律王已經往生ā；m̄-koh希律王所管理ê地區，已經hō͘ 羅馬皇帝指定hō͘ 希律王ê三个kiáⁿ繼承分治。分治ê地域劃分做四个地區，如下：

（1）亞基老（Artselaus)：治理一半ê土地（四份ê二份），伊ê區域包含偤太、以土買kah撒瑪利亞。伊是希律王ê第四个bó͘ 馬大（撒瑪利亞人）所生ê大kiáⁿ。因為伊親像in老父ê個性強暴koh kē路無能，kan-taⁿ想beh掌握威權來控制人民；所以，當伊一tsiūⁿ任，tī公元4年3月中，偤太人tī耶路撒冷過Poâⁿ過節ê時，有kóa人不滿伊執政，伊就大膽向偤太人展示伊ê威權，下令騎兵騎戰馬往聖殿衝去，用標槍kah銅劍屠殺3,000名無辜ê朝聖者。聖家約瑟、馬利亞kah小耶穌來過Poâⁿ過節ê時，tī聖殿廣場親目看tio̍h tsit場血流成河ê大屠殺，in好字運地逃出聖殿；m̄-koh，當羅馬兵入城鎮壓「叛亂」ê時，in koh tī城外看tio̍h有2,000 gōa名偤太人tī牆壁邊á被釘十字架，流血哀號，koh m̄准親人收屍埋葬，tshut-tsāi野狗kah禿鷹來咬食，實在hō͘人非常驚惶！

Tsit-ê慘景，馬太講：約瑟tī耶路撒冷「聽見亞基老繼承in老父希律做偤太王，驚去hia。」Κoh真驚亞基老來殺害小耶穌；所以tī眠夢中，伊koh得tio̍h主ê指示，為tio̍h厝裡ê人ê安全，就往加利利境內ê拿撒勒去（馬太2：22～23），因為加利利地區無屬亞基老管理，比較khah安全。

因為亞基老kan-taⁿ知影陶醉tī威權苛政kah暴力來控制偤太人，結果偤太人ê反抗力量jú來jú大，無法度heⁿh驚來阻擋。羅馬皇帝奧古斯都tī公元6年，不得不koh再派兵到偤太地區控制政治情勢，kā無適任ê亞基老放逐到高盧（今á日法國）去，而且親自派羅馬總督來管理、統治；koh tī耶路撒冷成立偤太人ê公會，由當地貴族（偤太人ê長老）、聖殿ê大祭司kah祭司長、法利賽人kah撒都該人等等71名議員組成，ná親像法院ê機構，掌有大權來執行審判犯tio̍h偤太教律法kah傳統條例ê偤太人，m̄-koh kan-taⁿ ē-tàng行刑á無法度、mā無權kā人民判處死刑。若需要死刑，一定tio̍h得tio̍h羅馬總督ê同意，tsiah ē-tàng kā罪犯執行釘十字架，免得人民反抗、作亂。

（2）安提帕（Antipas)：伊pun-tio̍h四分之一ê土地，所以hông稱做「分封王」（to̍h是1/4 ê意思），伊ê土地位置是tī加利利kah比利亞（約旦河東岸ê約旦國中西部）。聖家tńg來到加利利ê拿撒勒tòa，to̍h是受伊統治；伊為tio̍h beh強奪仝父異母ê小弟腓力ê嬌bó͘ 希羅底（大希律王ê tsa-bó͘孫，老父是希律王ê kiáⁿ亞利斯布魯斯，伊因為被希律王懷疑beh奪取老父王位，suah被父王殺害）做bó͘，廢棄元配以東王亞哩達（Aretas)ê tsa-bó͘ kiáⁿ。所以hō͘ 行洗禮約翰指責in tsit件婚事無合法；因為按照偤太人ê律例，利未記第18章16節ê法令講：「你ê bó͘ iáu活leh ê時，bē-tàng另外娶她ê姊妹kah她做對，露她ê姊妹ê下體。」何況為tio̍h另外娶bó͘，koh kā元配廢棄？！Κoh再講，偤太人ê律法mā kan-taⁿ准：「兄弟tòa做伙，若其中一个死去，無kiáⁿ兒，死者ê bó͘ bē-tàng出去嫁hō͘ 生份人。她ê丈夫ê兄弟應當盡兄弟ê本分，娶她做bó͘，kah她同房。婦人生ê大kiáⁿ tio̍h歸tī已故兄弟ê名下，免得伊ê名tī以色列中塗去à。」（申命記25：5、6），所以，兄弟iáu活leh ê時，強娶兄弟ê bó͘ 做bó͘ 是無合法ê。

M̄-koh，當行洗禮約翰向人宣揚悔改ê信息ê時，安提帕kah希羅底明知in ê婚事無合法，in m̄-nā無beh悔改，顛倒因為驚行洗禮約翰kā tsit件無合法ê醜聞傳出去，就kā伊掠起來關tī摩押地高山頂ê馬卡努斯堡行宮ê地窖監牢裡；後來tī安提帕慶生宴席中，請希羅底ê tsa-bó͘ kiáⁿ莎樂美出來跳煽情ê豔舞娛樂，伊邀請來慶生ê臣僕做伙觀賞。當時安提帕酒lim kah siuⁿ tsē，koh看tio̍h莎樂美ê豔舞，暢kah起戇神；就án-ne允准莎樂美口頭ê要求（這是in老母希羅底教她講ê），叫安提帕kā行洗禮約翰ê頭斬落來，khǹg tī盤á裡the̍h來hō͘ 她做禮物、贈品。

偤太人ê歷史家約瑟夫講：以東王亞哩達為tio̍h報復安提帕分封王廢棄伊ê tsa-bó͘ kiáⁿ，另外娶希羅底做bó͘ ê家仇，iáu有上帝beh懲罰伊下令斬行洗禮約翰先知ê頭ê緣故；koh因為耶穌tī耶路撒冷受彼拉多總督審判ê時，安提帕tú好mā來聖城度假，所以，彼拉多總督mā kā耶穌送交hō͘ 伊會審。當伊審問耶穌ê時，認為耶穌是行洗禮約翰koh活起來à，叫伊行神跡hō͘ 伊看。耶穌無扶tháⁿ伊，無行神跡hō͘ 伊看；因為耶穌準講行神跡，伊mā bē相信祂是上帝ê kiáⁿ。何況耶穌知影伊ê個性做人真奸詐，kā伊稱做「狐狸」（路加13：32）。

因為án-ne，安提帕to̍h hō͘ 耶穌穿一領華麗ê衫褲，戲弄祂作偤太人ê王；伊ê部下mā phah耶穌，phùi嘴瀾tī祂面tsiūⁿ，凌辱、侮辱祂，hō͘ 耶穌—上帝ê kiáⁿ，加倍做「人子」ê皮肉之痛！為tio̍h以上種種原因，亞哩達王tī行洗禮約翰死去10年後，累積10年ê「生聚教訓」、訓練軍隊，tī公元39年來攻打安提帕，kā絕情不義ê kiáⁿ婿除掉。

（3）腓力（Philip)：伊領tio̍h管理ê土地是tī以色列北pêng ê以土利亞kah特拉可尼（路加3：1）。伊是希律王ê kiáⁿ，希羅底ê阿叔；希羅底tī希律王ê宮廷內長大，kah阿叔腓力非常親密，受伊照顧長大，所以，in兩人是近親結婚。M̄-koh，兩人結婚無gōa久，生莎樂美以後，是án怎ē婚變？！Bó͘ kah tsa-bó͘ kiáⁿ lóng被已婚ê阿兄安提帕奪去，tī歷史上就無詳述，m̄-koh自古以來「英雄難過美人關」，kiám-tshái m̄免koh再kā它說明lah。

M̄-koh，做一个已婚有家室ê阿兄，竟然ē廢元配改娶小弟ê嬌bó͘，包括美麗ê tsa-bó͘ kiáⁿ lóng做伙接過來，實在是無合法，mā siuⁿ過無兄弟親情lah！有關腓力希律分封王ê事跡，tī歷史上真少記載；tī伊失去bó͘ 女了後，是m̄是有koh再結婚？Mā lóng無資料thang查。