《歷史上ê主耶穌》

 | | | 轉寄

第七章_7.8 Τtī約旦河傳道ê行洗禮約翰

作者 杜英助 台譯：Lîm Tsùn-io̍k 2020.06.21

七、行洗禮約翰因仗義直言來殉道喪失性命

行洗禮約翰kah以利亞lóng是聖經中偉大ê先知。耶穌談起行洗禮約翰ê時，祂真o-ló伊ê偉大講：「婦人人所生ê無一个比約翰khah偉大。」（路加7：28）；á行洗禮約翰ê言行mā hō͘一般偤太人認為伊是以利亞，是先知（馬可6：15），á加利利希律ê分封王安提帕卻認為耶穌是hō͘ 伊斬首ê行洗禮約翰tùi死koh活起來ê（馬可6：16）。

所謂「先知」意思是講：伊是上帝ê代言人，凡若伊所講ê話lóng是tùi上帝ê嘴中ài伊傳講ê信息；凡若伊所做ê tāi-tsì mā是上帝叫伊去做ê，而且是不折不扣。所以，先知ê話語to̍h是勇敢壯膽為上帝傳講公平正義（公義）之聲。

行洗禮約翰所傳講ê信息有三：
1）大膽tī曠野向偤太人、法利賽人kah撒都該人（宗教領袖）指責，講：「毒蛇ê種類！」（馬太3：7），感動in悔改、認罪到約旦河受洗。
2）見證耶穌是「上帝ê羊羔，除去世間人ê罪孽。」（約翰1：29），所以，罪人悔改應該受洗，潔身除罪；m̄-koh，真正ē-tàng除去世間人ê罪孽ê，只有上帝羊羔ê寶血tsiah ē-tàng完全hō͘人ê罪孽得tio̍h潔淨。伊koh向伊ê門徒見證講：「祂一定會ná興旺，我一定會ná衰微。」（約翰3：30），而且證實耶穌ê福音是「祂為tio̍h所聽tio̍h kah所看tio̍h ê來做見證…。信Kiáⁿ（耶穌）ê人有永遠ê活命」（約翰3：32、36）
3）行洗禮約翰有以利亞先知ê勇氣：以利亞先知m̄驚以色列國王亞哈ê威權以及王后耶洗別引誘以色列人敬拜迦南地ê偶像巴力kah亞舍拉ê權勢，勇敢向亞哈王挑戰講：「我kí永遠活ê上主—以色列ê上帝，to̍h是我khiā tī祂ê面前ê來講：Tsit幾年，我若無講，會無露水，無雨。」（列王記上17：1），所以後露落雨kah迦南人ê農神巴力無關，敬拜巴力無用！結果以利亞先知為tio̍h安全起見，遵照上帝ê指示離開以色列，去腓尼基ê西頓隱居。當時tī以色列境內果然有三年無落雨、鬧饑荒，水泉ta去，青草mā枯tâ，耶斯列ê農作物lóng因為缺水來死，激怒王后耶洗別殺害耶和華上帝ê眾先知（列王記上18：4），國王亞哈mā是殺害先知ê共犯（列王記上18：7～14）。

三年大饑荒過去à，上帝叫以利亞先知tńg去以色列，而且落雨tī地上 ，同時叫以利亞先知去見亞哈王，向伊坦誠直講：「陷害以色列ê m̄是我，是你kah你ê老父ê家，因為lín棄sak上主ê誡命，去tòe hiah-ê巴力。」（列王記上18：18）

行洗禮約翰mā是先知，而且伊mā有以利亞先知ê勇氣。當希律ê分封王安提帕（伊已經有bó͘）強奪伊仝父異母ê小弟腓力ê嬌bó͘ 希羅底來做bó͘，而且廢棄元配ê時，伊仗義勇為挺身出來向伊直講：「你佔tsit-ê婦人人來做bó͘無合律法。」（馬太14：4、馬可6：18），安提帕真驚tsit項tāi-tsì hō͘ 人揭發知影，因為án-ne 叫人掠約翰來kā伊鎖tī監裡，m̄ hō͘伊kā tsit件「無合律法」ê婚事傳揚出去。雖然安提帕真想beh thâi約翰，m̄-koh，伊mā真驚人民反抗，因為大家lóng公認約翰是先知，是義人。所以，伊只好kā行洗禮約翰關tī監牢，m̄敢thâi伊。

行洗禮約翰被安提帕希律王鎖tī死海東岸ê一座獨立山頭ê馬卡努斯要塞，tī tsit-ê要塞中央ê建築物是豪華ê宮殿。有一年，安提帕希律王慶祝伊ka-kī ê生日ê時，邀請伊統治下ê加利利kah比利亞地區ê官員kah長老lóng到伊ê皇宮，歡喜聚集用餐ê時，tī慶宴中叫in bó͘希羅底ê tsa-bó͘ kiáⁿ莎樂美出場表演燒熱舞，hō͘ 希律kah賓客lóng ē大歡喜。Tī希律得意忘形ê時，伊真慷慨向希羅底ê tsa-bó͘ kiáⁿ莎樂美講出豪語，講：「無論你ài啥物向我求，我lóng ē hō͘你。」Κoh講：「無論你向我求啥物？Τo̍h是我ê國家ê一半，我mā ē hō͘你。」

莎樂美聽tio̍h希律王án-ne對她講，她真正kah kiōng-beh頭眩，真正是m̄知beh向伊ài啥物tsiah好？就án-ne。她就隨時走去問她ê老母希羅底；希羅底因為移情愛tio̍h安提帕希律，suah來棄sak丈夫腓力希律，聽tio̍h行洗禮約翰指責她án-ne做是「無合法」，心內非常無歡喜，koh知希律王mā想beh thâi伊，就án-ne順理成章，順嘴向她ê愛女莎樂美講，妳去向希律王講：「Beh ài行洗禮約翰ê頭。」所以，莎樂美就趕緊入去見希律王，求伊講：「我願王隨時kā行洗禮約翰ê頭khǹg tī盤á內底hō͘ 我。」希律王一聽tio̍h tsit-ê話，心內雖然kah-ná真後悔、真憂愁，m̄-koh tī眾官員kah長老面前為tio̍h「顧面子」，m̄敢食言，就隨時派一个衛兵去監獄裡斬行洗禮約翰ê頭，kā頭khǹg tī盤á裡，the̍h來hō͘ hit-ê tsa-bó͘ gín-á，她就轉送hō͘ 她ê老母（莎樂美是希羅底kah前夫腓力希律所生ê美女，m̄是她kah安提帕希律王所生ê，所以，她一直無叫安提帕為老父，直接稱呼伊王）。Tsit段故事tī馬太14：1～12、馬可6：14～29 kah路加9：7～9 lóng有記載。

是án怎希羅底kah安提帕結婚是「無合理」，mā「無合法」？按照偤太人ê慣俗：阿兄先死而且無後代，小弟依法tio̍h kah兄嫂同房，為阿兄傳後代；m̄-koh小弟iáu活leh，mā有tsa-bó͘ kiáⁿê情形，阿兄絕對bē-tàng強奪小弟ê嬌bó͘。何況，律法mā無規定，若是小弟無後代來死，阿兄mā thang續接娶弟婦做bó͘。結果安提帕ka-kī擅自違法廢棄元配，koh再娶小弟ê bó͘ 來做bó͘，根本to̍h 無合法。古今世俗lóng bē許可有án-ne ê醜惡tāi-tsì發生，尤其是做王ê，koh khah應該做人民ê良範，無應該製造惡例。

行洗禮約翰為公義發聲，被安提帕希律王叫伊ê衛兵kā伊斬頭來死。Tsit項tāi-tsì依人來看，這是一件無公平不義、無道德ê悲劇。依耶穌來看，祂講：「為tio̍h實現上帝ê旨意受迫害ê人實在有福氣，因為in會成做天國ê子民！」（馬太5：10），所以耶穌mā向眾人講：「Lín若為tio̍h我ê緣故hō͘人侮辱、迫害、譭謗，就實在有福氣。Tio̍h歡喜快樂，因為lín tī天頂有真大ê報賞。Lín古早ê先知mā是án-ne hō͘人迫害。」（馬太5：11～12），因為耶穌án-ne講，所以有kóa出名ê畫家作畫ê時，tiāⁿ-tiāⁿ kā行洗禮約翰畫tī耶穌寶座ê邊á陪審世間人。

八、行洗禮約翰被希律王斬頭，遺體ê下落
行洗禮約翰依照伊ê先知精神，仗義指責加利利希律分封王安提帕違法強奪伊小弟腓力希律ê bó͘希羅底做bó͘ 是一件無合理koh無合法ê tāi-tsì，招來殺身之禍suah被斬首；伊ê大體被行洗禮約翰ê門徒帶到示劍ê撒迦利亞之家族墓合葬，伊ê頭hō͘ 人帶到大馬士革安置tī行洗禮約翰墓堂內ê一个大石棺內（現今tī伍麥葉清真寺內），á其一支tséng頭á骨就án-ne hō͘ 人收藏tī土耳其伊斯坦堡ê托匹卡舊皇宮ê博物館內，供歷代信徒憑悼追念。