《歷史上ê主耶穌》

 | | | 轉寄

第八章_二 耶穌踏上傳道之路

作者 杜英助 台譯：Lîm Tsùn-io̍k 2020.07.12

二）耶穌行tsiūⁿ傳道之路
耶穌順服上帝，贏過魔鬼ê試探，phah破魔鬼ê詭計。後來，tī耶穌傳道醫病ê時，牠就tiāⁿ-tiāⁿ bih tī法利賽人、撒都該人、文士、祭司長kah大祭司ê身tsiūⁿ，四界跟tòe耶穌ê腳步，注意聽耶穌向眾人ê教導kah言行，想beh tùi耶穌ê講話中tshōe-tio̍h任何空榫來陷害祂，甚至用律法kah政治方面ê疑難問題來考問祂。Siōng尾iáu bih入去耶穌ê門徒中hō͘ 偤大出賣祂；而且tī耶穌受大祭司審問ê時，hō͘ 彼得三pái否認耶穌是伊ê主，tī大祭司ê面前tsiù-tsōa講伊m̄-bat耶穌，hō͘ 主傷心失望。

雖然魔鬼用盡各種方法beh阻止耶穌giâ十字架來替世間人贖罪，m̄-koh lóng無成功；當耶穌被羅馬兵釘tī十字架頂ê時，魔鬼iáu利用偤太人tī十字架下面向耶穌挑戰，hit時，tsiah-ê偤太人猶原借用魔鬼試探耶穌ê話，來向耶穌huah話講：「若是你是上帝ê Κiáⁿ，就tùi十字架頂落來！」眾祭司長、文士kah長老，包括官長mā lóng恥笑耶穌講：「祂救別人，無法度救ka-kī，祂是以色列ê王，tsit-má tùi十字架頂落來，阮就信祂…。」Κā祂釘十字架ê羅馬兵丁mā戲弄耶穌講：「祢若是偤太人ê王，救救祢ka-kī！」耶穌tī十字架頂受苦，恬恬無回答in。對in ê無知、嘲（sau)笑á是恥笑，hō͘ 魔鬼利用，所講tsiah-ê冷嘲（sau)笑ê話，耶穌tī十字架頂雖然聲聲入耳，句句聽kah真清楚，m̄-koh，耶穌顛倒憐憫in，向天父上帝祈求講：「天父ah，赦免in，因為in m̄知in所做ê。」（路加23：34），當耶穌tī十字架頂斷氣ê時，tāi-tsì惹大à：全地lóng烏暗，聖殿ê帳帷裂做兩半，羅馬兵丁ê千夫長看見此情此景，隨時確認耶穌講：「Tsit-ê人真正是上帝ê Κiáⁿ。」（馬可15：39）á百夫長koh確認講：「Tsit-ê人真正是一个義人！」（路加23：47）

Oh！魔鬼利用偤太人來謀害耶穌，顛倒hō͘ 授命執行kā祂釘十字架ê羅馬兵ê長官相信耶穌真正是上帝ê Κiáⁿ，是義人。所以，魔鬼雖然kā耶穌害死，究竟牠kám有勝利?！無！因為tī三工後，耶穌竟然按照祂所講ê，tùi死koh復活，證明祂確實是永遠活ê上帝ê Κiáⁿ，mā是性命之主！