《歷史上ê主耶穌》

 | | | 轉寄

第八章_三1 耶穌踏上傳道之路

作者 杜英助 台譯：Lîm Tsùn-io̍k 2020.07.19

魔鬼挑戰耶穌ê試探
— 祢若是上帝ê kiáⁿ —（公元26秋天—30年春天）

一）前言
凡若上帝ê kiáⁿ兒lóng免不了ē受tio̍h魔鬼（撒旦）ê試探，尤其是決志beh做上帝ê聖工ê基督徒，tùi一般會友、長執到牧師，tsē-tsē少少lóng ē tú-tio̍h魔鬼ê引誘kah試探；ē-tàng贏過魔鬼ê試探ê人tsiah ē-tàng做上帝ê忠僕，到死忠心為主做siōng忠實ê見證。

約翰tī拔摩海島看見異象，「我koh看tio̍h幾nā个寶座，坐tī hit頂面ê有得tio̍h審判ê權柄；我mā有看tio̍h hiah-ê為耶穌做見證kah為tio̍h上帝ê道hō͘人斬頭ê人ê靈魂。Tsiah-ê人m̄-bat拜hit隻猛獸kah猛獸ê造像，頭額á是tī手裡mā無受牠蓋印做記號。In lóng koh活，kah基督做伙統治一千年。 5 這是頭一pái ê koh活，其他ê死人tio̍h到hit-ê一千年期滿，tsiah會koh活。 6 Tī頭一pái koh活有份ê人真有福氣，in是聖潔ê人。第二pái ê死亡無權kā in管轄，in會做上帝kah基督ê祭司，mā會kah基督做伙統治一千年。」（《全民台語聖經》啟示錄20：4～6）

因此可見，tī耶穌koh來世間建立千禧和平王國ê時，凡若贏過魔鬼ê試探者，in一生順從上帝ê話，堅守上帝ê道為主做見證，甚至giâ十字架犧牲性命mā無teh可惜ê聖徒，in lóng有福分kah萬王之王耶穌同齊做王，真有福氣！

二）魔鬼對耶穌試探ê挑戰
綜觀人類ê歷史，上帝創造亞當kah夏娃ê時，聖經記載：「上主—上帝用地上ê土沙粉tshiau做人，pûn活ê氣入去伊ê鼻孔，人就成做有靈魂ê活命。」（創世記2：7）「上帝是靈」（約翰4：24），既然上帝kā祂ê靈pûn入去亞當ê鼻孔hō͘ 伊成做有靈ê活人，所以，路加tī追述耶穌ê家譜ê時，講：「亞當是上帝ê kiáⁿ。」（路加3：38）mā因為án-ne，凡若亞當ê kiáⁿ孫lóng ē-tàng順理成章講lóng是上帝ê kiáⁿ兒；mā因為tsit-ê原因kah理由，耶穌教導門徒祈禱ê時tio̍h認上帝是「阮tī天裡ê父」（馬太6：9）。

所以，tùi人類ê歷史來看，上帝創造人類是創造者kah被造者之間ê關係，耶穌to̍h真清楚肯定這是「父kah kiáⁿ。」ê親密關係；tī人ê身tsiūⁿ有上帝ê形像kah樣式，mā有上帝ê靈存在，人tsiah有性命成做活人。

魔鬼既然mā是知影亞當kah夏娃lóng是上帝ê kiáⁿ兒，m̄-koh，牠卻為tio̍h對抗上帝ê權威來引誘夏娃kah亞當違背天父ê話，懷疑上帝ê疼；魔鬼到伊甸園來藉tio̍h奸詐ê蛇，用假善意tāi先欺騙亞當ê bó͘ 夏娃講：上帝雖然bat向lín講園中ê hit叢分別善惡樹ê果tsí「Lín m̄-thang食，mā m̄-thang摸，恐驚lín食了會死。』」蛇對tsa-bó͘人講：「Lín無一定會死， 5 因為上帝知lín食ê日，lín ê目tsiu 就ē開，lín會親像上帝會曉分別善惡。」」（創世記3：3～5）

魔鬼用「利」（ē親像上帝知影分別善惡）來引誘夏娃講：「無一定ē死」，結果m̄-nā她被魔鬼欺騙，違背上帝ê話suah去聽從牠ê話，連亞當mā受連累，kah夏娃做伙食ná禁果；結果in兩人ê目tsiu真正像魔鬼所講ê「目tsiu就ē開」。M̄-koh，in目tsiu雖然開，並無親像上帝知影分別善惡，顛倒看tio̍h ka-kī赤身露體，感覺見笑；因為án-ne，suah失去上帝ê榮耀，「in用白賊話代替上帝ê真理」（羅馬書1：25）。Siōng尾，亞當kah夏娃就因為「貪食」犯罪來離開伊甸園；這是頭一對上帝ê kiáⁿ兒聽從魔鬼ê話ê後果，陷落去魔鬼試探ê羅網，gōa-ni̍h-á驚人！所以，主禱文耶穌教導咱tio̍h祈求天父「m̄-thang hō͘ 咱陷落tī擔當bē起ê試煉。」（馬太6：13）

聖經講：耶穌是上帝ê Κiáⁿ，祂tùi聖神tī在室女馬利亞身tsiūⁿ感孕，降生做人，成做馬利亞ê kiáⁿ，mā to̍h是第二个亞當；頭一个亞當是上帝用土創造ê，雖然有上帝ê靈，m̄-koh，伊ê性情畢竟比較khah軟弱。第二个亞當是teh指上帝所歡喜ê Κiáⁿ耶穌，祂是tùi聖神感孕，藉tio̍h在室女馬利亞來降生ê，是道成肉身ê人子，kah頭一个亞當用土被造無仝。

耶穌tùi降生來世tsiūⁿ to̍h hō͘ 聖神充滿，當祂12歲，tī耶路撒冷聖殿to̍h知這是「我ê天父ê厝」（路加2：49），約瑟kan-taⁿ是祂ê養父而已。當祂30歲出來beh傳上帝國度ê福音ê時，tī約旦河東岸ê伯大尼接受行洗禮約翰ê洗禮，當時聖神koh降tī祂身tsiūⁿ。天父上帝同時koh tùi天頂出聲向眾人見證，講：Tsit-ê是我所疼ê Kiáⁿ，祂是我真正kah意ê。」（馬太3：17），路加就án-ne講：「耶穌mā有來領受洗禮。祂祈禱ê時，天開，聖神降臨tī祂ê頂面，形狀親像粉鳥，koh tùi天有聲講：「祢是我所疼ê Kiáⁿ，我真kah意祢。」（路加3：21、22）。行洗禮約翰看見此情此景，koh為耶穌做證，講：「Tsit位to̍h是上帝ê Kiáⁿ。」（約翰1：34）

耶穌是上帝ê Κiáⁿ tsit項tāi-tsì，耶穌自細漢to̍h知影。受洗ê時，天父上帝koh向偤太人親自宣布耶穌to̍h是祂所疼ê Κiáⁿ；行洗禮約翰mā向眾人做證講，耶穌是上帝ê Κiáⁿ，大家lóng知影了！Κám講魔鬼to̍h m̄知影?其實魔鬼早to̍h知影，因為當耶穌傳道tshōa祂ê門徒渡過加利利海到對岸格拉森人tòa ê地區去，tú-tio̍h一个hō͘ 魔鬼（而且是一陣ê鬼）附身ê人，一陣ê鬼tī hit人身tsiūⁿ看見耶穌就phak tī耶穌ê面前大聲講：「上帝ê Kiáⁿ ah，阮kah祢有啥物tī-tāi？」（馬太8：29、馬可5：7、路加8：28）

魔鬼既然知影耶穌是至koân上帝ê Κiáⁿ，是án怎牠iáu ài質問試探耶穌ka-kī：究竟祂知m̄知祂本身to̍h是上帝ê Κiáⁿ？Siōng主要ê目的to̍h是beh像牠試探頭一个亞當ê時，是m̄是ē聽從牠ê話？若是聽牠ê話來陷落去牠ê試探，to̍h ē-tàng證明祂mā ē受利誘來違背上帝ê旨意，親像亞當軟弱、犯罪，tī牠ê權威下被封立做世俗ê王，m̄是做天國萬王之王、萬主之主！Tsit種魔鬼to̍h ē koh勝利。若是人子耶穌mā ē陷落去魔鬼ê圈套，祂to̍h無法度做世間人ê救主，mā無法度hō͘人因為原來亞當犯罪所傳承hō͘ 後代kiáⁿ孫ê原罪得tio̍h赦免，kah上帝koh再和好。