《歷史上ê主耶穌》

 | | | 轉寄

第八章_三2 耶穌踏上傳道之路

作者 杜英助 台譯：Lîm Tsùn-io̍k 2020.07.26

感謝上帝！耶穌降世有聖神kah祂同在，有上帝ê權能、權柄tī祂身tsiūⁿ，所以，當魔鬼引誘祂滿足食慾ê時，祂無親像夏娃kah亞當án-ne貪食肉體所需要ê食物；祂雖然知影肉體ê需要，m̄-koh，祂身為上帝ê Κiáⁿ koh khah知影比食物koh khah重要ê是上帝ê話。魔鬼用「食」贏過亞當kah夏娃，m̄-koh，耶穌mā用「食」贏過魔鬼ê試探。 因為án-ne，無法度克制食慾ê人常時常ē犯罪，俗語講：「禍tùi嘴出」，無法度節食ê人時常ē惹事；因為古早人mā時常靠經驗講：「飽食思淫」；聖經中ê「淫」時常是指事奉二个主人，to̍h是一面敬拜上帝、一面敬拜偶像（魔鬼á是金錢），tī宗教方面kah信仰方面對上帝無忠實。Tī政商關係中，高官mā tiāⁿ-tiāⁿhông富商「請食飯」á犯法，圖利別人。

魔鬼向耶穌挑戰ê第二个試探是kā祂tshōa到聖殿ê siōng kôan ê所在，引用聖經ê話叫祂跳落去試看māi，上帝是m̄是ē因為疼祂，派天使來保護祂ê腳bē致使受tio̍h傷害？耶穌自細漢to̍h有上帝ê智慧，m̄免親像魔鬼去詐欺亞當，講「食了分別善惡ê果tsí tsiah有智慧」。所以，耶穌對魔鬼第二pái ê試探mā真有理智回答牠，講：「M̄-thang試探上帝。」明明知影ê tāi-tsì，to̍h bē-tàng去試探天父ê疼心á是用ka-kī ê方法去要求上帝kā祂出一份證明；因為án-ne，魔鬼第二pái對耶穌試探ê陰謀koh失敗à。

魔鬼對耶穌挑戰講：Ài做和平ê君王、萬王之王，ná tio̍h等到世界末日？牠tshōa耶穌tsiūⁿ到世界siōng kôanê一座koân山頂，叫祂看見世界萬國ê榮華、富貴，就kā耶穌講：「只要祢kā我跪拜，這一切lóng是祢ê，我beh hō͘ 啥人to̍h hō͘啥人，這kám m̄是真簡單容易？」耶穌降世，祂非常明白祂ê國m̄是tī地tsiūⁿ。所以，祂堅決拒絕魔鬼ê善意，而且對牠講：kan-taⁿ拜上帝to̍h有夠à！就án-ne，魔鬼無計thang施，就暫時離開耶穌。 　　
當耶穌被釘十字架ê時，肉體上忍受siōng痛苦ê時刻，魔鬼mā利用偤太人kah宗教領袖來試探耶穌，講：「祢若是上帝ê Κiáⁿ，就tùi十字架頂跳落來，阮就相信à。」M̄-koh，耶穌猶原順服上帝，頭尾無棄sak「lim苦杯」，三工後tsiah ē-tàng贏過死亡ê權柄，hō͘ 信衪ê人ē-tàng得tio̍h永生。

保羅講：「這to̍h kah-ná罪是tùi一人入世界，死又koh是tùi罪來ê，…因為一人ê悖逆，眾人成做罪人；照常，因一人ê順從（順服），眾人mā成做義à。」（羅馬5：12、19）保羅koh講：「罪ê工錢乃是死；獨獨上帝ê恩賜，tī咱ê主基督耶穌內底，乃是永生。」（羅馬6：23）

是án怎阮信耶穌ê人ē成做上帝ê kiáⁿ來得tio̍h永生？因為耶穌基督順服上帝，照上帝ê旨意tī十字架頂捨身，用祂ê寶血洗清世間人ê罪，hō͘人kah上帝koh再和好，這是人類因信耶穌是上帝ê kiáⁿ稱義所帶來ê福氣。

關係耶穌是上帝ê Κiáⁿ，自從行洗禮約翰tī約旦河東岸ê伯大尼kah彼得tī加利利ê凱撒利亞腓立比為主見證以後，初代教會ê信仰前輩iáu時常受魔鬼試探，親像：tī第一、二世紀ê基督徒，常常hō͘ 魔鬼透過羅馬皇帝ê手來迫害。當時羅馬帝國ê政府官員時常問基督徒ê一个問題to̍h是：「羅馬皇帝是神，是主，á是耶穌基督是主？」基督徒若回答：「耶穌基督是主」，bòai向羅馬皇帝ê大理石雕像跪拜，就講：基督徒對羅馬帝國無忠誠，必須受鞭刑、落監，甚至被釘十字架來處死，á是火刑。所以，基督徒tī羅馬做主日禮拜ê時，lóng藏入去羅馬兵m̄敢去ê地下墓穴來舉行，其它地區ê基督徒mā閃避到荒郊野地ê天然山洞做禮拜，m̄敢tī地面tsiūⁿ起造禮拜堂來做禮拜。一直到公元325年，tī今á日土耳其西部ê尼西亞聖智教堂舉行基督教大公會議ê時，大家tsiah一致確認耶穌是人子，mā是上帝ê Κiáⁿ。

Tī日本帝國ê軍閥發動大東亞戰爭，擴大空襲美國珍珠港ê美國海軍艦隊ê時，tī台灣ê英國宣教師被驅逐離境，禁止台灣本地牧師kah外國宣教師通信，而且揚言：若是美軍tī第二次世界大戰ê時登陸台灣，計劃kā台灣本地ê牧師全部集中槍決，tsiah免得受逼做美軍ê嚮導來打擊日軍。當時日本警察（通稱大人）時常試探牧師ê一个政治問題，to̍h是：「日本天皇偉大，á是lín ê上帝偉大？」Hit時，台灣基督長老教會南部大會議長楊士養牧師被聖神感動，真有機智回答日本警察講：「Τī日本帝國天皇siōng偉大，kā天皇the̍h來kah上帝做比較，對天皇siōng失敬！」話講suah，日本警察聽tio̍h tsit-ê回答，鼻á摸leh就暗靜（àm-tsīⁿ）離開。若是回答錯誤，警察to̍h有正當ê藉口殺害牧師kah信徒。

耶穌臨終ê時kā祂ê門徒講：「我已kā tsiah-ê事kā lín講…時tsūn teh beh到，凡若thâi lín ê就認為是tī事奉神（皇帝），in án-ne做，是因為m̄-bat認bat父，mā m̄-bat認bat我。」（約翰福音16：1～3）