《歷史上ê主耶穌》

| | | 轉寄

第十二章_一 耶路撒冷ê Poâⁿ過節

(公元30年三月~四月)
一、伯大尼之家(公元30年三月28日禮拜三)
Toà tī耶路撒冷城橄欖山東郊ê伯大尼人,有一kóa家庭是tùi拿撒勒遷徙過來ê;tī tsit-ê庄頭內有一个家庭tòa三个人:馬大、馬利亞kah一个小弟拉撒路,家境小康,父母早to̍h往生。Tsit一家人真可能是耶穌tī拿撒勒ê親tsiâⁿ,in姊弟三人自細漢kah耶穌tī拿撒勒做伙長大,所以感情真好。In tang時遷來伯大尼tòa?!福音書內面無講清楚;當耶穌tshōa門徒來耶路撒冷過節,teh傳道ê期間,tiāⁿ-tiāⁿ來tòa tī tsit-ê家庭,接受in親切ê接待。

Tī耶穌tshōa 12个使徒周遊各城各鄉傳道,宣講上帝國度ê福音ê時,tiāⁿ-tiāⁿ接待耶穌ê婦女有bat hō͘ 邪靈所附kah hō͘ 病症所纏ê以及已經醫好ê幾个婦女,iáu有抹大拉ê馬利亞、希律ê管家苦撒ê bó͘約亞拿kah蘇撒拿,以及真tsē別ê婦女,in lóng是用ka-kī ê財物供給耶穌kah門徒(路加8:1~3)。

當耶穌tsit pái來伯大尼tsìn前,tī tsit-ê厝裡,祂所疼ê拉撒路病倒;就án-ne伊ê阿姊馬大kah馬利亞to̍h趕緊發落人去比利亞約旦河東pêng ê伯大尼見耶穌,講:「主ah,你所疼ê人破病à。」耶穌聽見了後卻講:「Tsit-ê病bē致使死,乃是為tio̍h上帝ê榮光,叫上帝ê Κiáⁿ因為án-ne得榮光。」所以,耶穌iáu tī原地koh再tòa兩工,了後tsiah對門徒講:「咱koh來去猶太。」當時門徒質問耶穌講:「老師,近來猶太人ài beh用石頭kā祢tìm,祢kám beh koh去hia?」Hit時,耶穌kā門徒講:「拉撒路死去à。我mā為tio̍h lín歡喜,因為我無tī hia是beh hō͘ lín信我;taⁿ咱來去伊hia。」耶穌ê門徒中有一个心內多疑ê多馬聽tio̍h老師án-ne講,就真無歡喜地對其他ê門徒講:「咱mā來去,thang kah祂做伙死。」(約翰11:1~16)

是án怎偤太人tiāⁿ-tiāⁿ想beh the̍h石頭tìm耶穌?因為當時耶穌tī約旦河ê東pêng做真tsē善事,而且向眾人講:「我是上帝ê Κiáⁿ」,偤太人卻tshûn心誤認「耶穌講褻瀆ê話」。In kan-taⁿ相信耶穌是一个「人」,m̄是「上帝ê Κiáⁿ」(約翰10:31~39)。何況拿撒勒ê鄉親mā m̄相信耶穌是tùi上帝hia差遣來ê,kan-taⁿ認定祂是hit位「木匠約瑟ê kiáⁿ」,á是講祂是「馬利亞ê kiáⁿ」而已;因為án-ne,耶穌為tio̍h beh hō͘祂ê門徒確信祂是上帝ê Κiáⁿ,祂就對in講:拉撒路已經死à。/咱做伙去伊hia,hō͘伊「tùi死koh活」,因為án-ne,「天父上帝kah衪ê Κiáⁿ藉tsit-ê理由來得榮光」。

耶穌tshōa門徒過約旦河去耶利哥城koh tòa tī撒該ê厝過一暝,接受伊熱誠ê接待;離開耶利哥ê當時,拉撒路已經死四工à。當馬大聽見耶穌來à,to̍h隨時去迎接祂,對祂講:「主ah,祢若tī tsia,阮小弟就bē死。」耶穌對她講:「你ê小弟ē koh活起來」。而且講:「我是koh活kah活命。信我ê人雖然死去,iáu-koh ē活起來; 26 tsit-má活teh來信我ê人,永遠bē死。你有án-ne信無?」馬大以她對耶穌ê信仰回答耶穌講:「主ah,我信祢是基督,上帝ê Kiáⁿ,是teh beh來世間ê hit位。」馬大對耶穌ê信心比耶穌ê門徒koh khah大。耶穌ê門徒跟tòe祂到tsit-má,足足有三年半ê時間,看過耶穌做過真tsē善事,行神跡醫病,kan-taⁿ稱呼耶穌為「拉比」(老師)。M̄-koh,馬大kan-taⁿ tī耶穌來到她厝裡ê時熱誠接待祂,聽tio̍h耶穌ê話to̍h相信耶穌「是主,是基督,是上帝ê Κiáⁿ!」她ê信心真正真大。

當馬大tńg去叫她ê小妹馬利亞講:「老師來ā,祂teh叫你。」,馬利亞聽tio̍h就趕緊走出去耶穌hia,看見耶穌to̍h仆tī祂腳前對祂講:「主ah,祢若tī tsia,阮小弟就bē死。」耶穌看見馬利亞teh哭,kah她同來ê偤太人mā哭,就問in講:「Lín kā伊葬tī啥物所在?」In回答耶穌講:「主ah,咱來去看。」耶穌看tio̍h馬大、馬利亞kah偤太人ê心內án-ne哀痛,約翰講耶穌流目屎,可見耶穌gōa-ni̍h-á疼拉撒路!

耶穌來到拉撒路ê墓前,hit-ê墓是一个岩洞,洞內koh分二層,拉撒路ê屍體是khǹg tī底層;墓門用一塊大石頭塞leh,耶穌叫人kā石頭徙開,gia̍h目ǹg天講:「天父ah,我感謝祢,因為祢已經有聽我ê祈禱。我知祢不時都有teh聽我ê祈禱,獨獨我án-ne講,是為tio̍h khiā tī四箍圍ê群眾,beh hō͘ in相信祢有差派我來。」講suah tsiah-ê話,伊就大聲huah講:「拉撒路,出來!」hit-ê死四工,身軀已經腐爛koh臭à ê人to̍h出來,伊ê腳手lóng用布包leh,面mā包手巾。耶穌對in講:「Kā伊tháu開,hō͘伊行路!」(約翰11:1~44)

耶穌是án怎beh延遲四工tsiah來到伯大尼?因為耶穌若趕tī拉撒路病危á是tú病死ê時來到伯大尼,kā伊醫好á是hō͘ 伊koh活,hiah-ê自作聰明ê偤太人to̍h ē koh再講拉撒路kan-taⁿ是一時昏迷,tú好耶穌叫伊醒起來而已,m̄是耶穌有權柄叫伊tùi死koh活,因為án-ne來否認耶穌是上帝ê Κiáⁿ。拉撒路既然死去,按照偤太人ê慣例,tī一工內to̍h ài kā伊ê屍體處理完下葬。所以,拉撒路既然死去,koh埋葬tī墳墓內四工ā,偤太人to̍h bē講拉撒路kan-taⁿ是昏迷過去而已;耶穌叫伊tùi墳墓內koh活行出來,真tsē偤太人看見耶穌所做ê tāi-tsì(to̍h是看見上帝ê榮光),就明白耶穌tsìn前對in所講ê話:「我若m̄是teh做天父ê tāi-tsì,lín m̄免信我。我若teh做上帝ê工,lín雖然m̄信我,mā tio̍h信我所做ê tāi-tsì;án-ne thang hō͘ lín知,天父tī我ê內面,我mā tī天父ê內面。」(約翰10:37、38)

當時四工前,耶穌tī約旦河東pêng ê伯大尼向偤太人講tsiah-ê話,偤太人想beh掠祂;tsit-má tī in tī耶路撒冷東pêng ê伯大尼,親目看見耶穌真正用做「上帝ê Κiáⁿ」ê權柄,hō͘ 拉撒路真正tùi死koh活。所以tī猶太人中間,有真tsē人看見耶穌所做ê tāi-tsì to̍h信祂。M̄-koh,「有真tsē人」並無表示「所有ê人」lóng信,所以,其中mā有人去耶路撒冷見法利賽人,kā耶穌所做ê tāi-tsì向in phah小報告,就án-ne,祭司長kah法利賽人to̍h召開會議,互相參詳講:「Taⁿ tsit-ê人行hiah tsē神跡,咱tio̍h án怎來對付。咱若放祂án-ne繼續做落去,群眾會去信祂…。」終其尾議決:計謀beh刣耶穌(約翰11:45~53、馬太26:1~5、路加22:1~2、馬可14:1~2)

因為án-ne,耶穌to̍h暫時離開伯大尼,往撒瑪利亞人tòa ê一座城名叫以法蓮,kah門徒tòa落來(約翰11:54)。因為hit時祭司長kah法利賽人早to̍h下令「若有人知耶穌tī tó位,tio̍h來報告,hō͘ in thang去kā祂掠起來。」(約翰11:57)