《《一位台灣女信徒ê自述》》

 | | | 轉寄

第二章_4）柏木教會，參加台灣青年會

作者 吳月娥, 台譯：Lîm Tsùn-io̍k 2020.08.16

1940年，日本kah中國（當時日本稱中國為「支那」）戰爭，稱做日支事變。因為中國本土是戰場，對日本差不多是無影響，無任何物資缺欠，宿舍中ê三頓包括好食ê白米飯kah豐富ê配菜。我ta̍k工lóng歡喜上課，m̄-koh有時我ē數（siàu)念台灣ê厝，流目屎。

迎接昭和16年， tī四月升級二年á。我來東京已經一年à。我khah慣勢東京ê地理kah交通了後，我kah德音小姐to̍h tshōa我ê同學周鵲美去大久保（おうくぼ）ê柏木（かしわぎ）教會。教會ê牧師是一位名叫植村環（うえむら たまき）女士，她是留學美國ê神學家。她是明治時代提倡無教會主義出名ê內村鑑三（うちむら かんぞう) ê tsa-bó͘ kiáⁿ。環女士真照顧台灣ê青年，真tsē台灣人lóng來tsia禮拜。周鵲美ê阿兄周慶渕是上野音樂學院ê學生，tī tsit間教會司琴管風琴。

周鵲美是我ê好朋友；她tùi台南長老女學校（kah淡水女學校仝款由外國宣教師建立ê學校），tī東京ê文化洋裁學院讀兩年，了後進入齒科醫專。慶渕兄已經結婚，in bó͘ 洪雪梅是帝國女子醫專ê學生，兩人tī澀谷區原宿租一棟兩層樓ê厝tòa。鵲美ta̍k工lóng tùi原宿坐省線去學校讀冊。

我kah德音小姐禮拜日早起9點to̍h去植村女士ê教會禮拜，下晡借hit-ê所在做台灣基督教青年會ê台灣人禮拜。Tsit-ê青年會由台灣來ê學生kah家庭組成，聖歌隊由慶渕兄擔任指揮；合唱團男聲有林和引、高約拿、謝緯、吳基福kah廖應隆，女聲有林明爵、林倫、方素華、蔡瑞月kah周鵲美。青年會幹部ê林和引、高約拿是台灣ê神學校出業，koh來讀日本ê神學校，因為án-ne in負責禮拜ê講道；台灣神學校出業koh來讀東京醫ê謝緯mā tiāⁿ-tiāⁿ講道。Ta̍k禮拜日早起參加柏木教會，下晡參加台灣青年會，阮tńg來到宿舍to̍h已經beh暗á。