《《一位台灣女信徒ê自述》》

 | | | 轉寄

第二章_3） 暑假tńg來到台灣

作者 吳月娥, 台譯：Lîm Tsùn-io̍k 2020.08.09

學校kā一年分做三个學期；第一學期是tùi四月到六月底，第二學期是tùi九月到十二月中旬，第三學期是tùi一月初到三月中旬，暑假是tùi七月10日到八月底。阮tùi台灣來ê 人利用tsit 50工ê假期tńg來台灣。阮做伙去船運公司定票，了後去銀座kah新宿ê大百貨公司買記念品。我去本鄉街ê美容店，做一生頭一pái ê電頭毛。了後去伊勢丹百貨公司，買一領金色絲綢短ńg衫、一領藍色ê喇叭裙kah一雙koân-teⁿ ê白皮鞋。德音是牧師kiáⁿ，kah我ta̍k個月收tio̍h 100元無仝，她考慮tio̍h父母ê經濟狀況，真khiām。

我kah四五个仝班同學做伙去神戶坐富士丸開向基隆港；到基隆港口ê時，我tī來迎接ê人中發現阮老父ê面；我ê目kho͘ 起燒，我向老父tsiù-tsōa beh一生有孝。老父tshōa阮去基隆ê一間餐館食中晝，阮tī tsia四散，kah所有ê人分手。Tī礁溪ê厝裡，有阮老母kah小弟小妹teh thèng候。這是離別三個月來頭一pái見面，充滿無法度講出來ê溫暖ê氣氛。

小妹月容今年10歲，月雲6歲，光勇2歲，大漢小弟是淡水中學一年á。養女碧雲tùi公學校出業，留tī厝裡裡幫贊老母，mā照顧小弟。我kā所有ê東京記念品pun hō͘ 大家，koh講一kóa東京kah故鄉ê tāi-tsì。訪問親tsiâⁿ kah朋友50工ê暑假真緊to̍h過去。

我前有寫過，有阿媽ê致蔭，我tsiah ē-tàng讀齒科。無去學校讀冊ê阿媽，到我出世為止，她是一个m̄-bat字（漢字）ê tsa-bó͘人。信基督教了後，去教會學白話字，tsiah ē-tàng讀白話字ê聖經。M̄-koh，80歲左右to̍h開始有老年癡呆症，因為án-ne suah無法度讀聖經。阮阿媽kah蔣介石總統仝一工往生，享年90歲。聽講阮阿媽ê葬式tāi先穿過對蔣介石總統表示哀悼降半旗ê街路。

我去拜訪阮老母後頭厝ê阿公阿媽。阮老母ê阿公是宜蘭縣出名ê廚子司，名叫林朋。阮老母八歲ê時，親生ê老母過身，由後母養飼大漢，她mā真疼我。她嫁hō͘ 阿公了後，無生gín-á；阮老母kan-taⁿ有一个小弟，伊ê名叫林永坤，比我大10歲。伊真ài畫圖，畫三國志人物ê圖，而且tī舊曆正月十五ê上元節kah中元節ê鼓燈節，用紙頭做鳥kah龍ê形，而且tī其中點to̍h蠟燭hō͘ gín-á sńg，這是一个風俗，永坤做一个hō͘ 我sńg。唯一一个聰明koh溫柔ê阿舅因為肺炎往生，享年19歲。