《《一位台灣女信徒ê自述》》

 | | | 轉寄

第二章_13）1945年二月初一舉行婚禮

作者 吳月娥, 台譯：Lîm Tsùn-io̍k 2020.10.18

To̍h準講我並無屈服牧師娘催我趕緊結婚ê壓力，阮iáu是決定tī隔tńg年ê二月初一舉行婚禮，決定tī角筈教會。我無beh tńg去台灣，德子to̍h koh再tńg去岩槻ê 金子齒科診所。

參加婚禮ê人有嘉代tī醫專ê十幾个朋友，我tī齒科醫專ê十幾个朋友，親tsiâⁿ有許嘉平、嘉賓兩兄弟，koh有減我四歲ê阿姑仁愛kah妹婿再萬。Tī郭牧師ê主持之下，阮tī上帝kah眾會友ê面前成做夫妻；阮聽牧師宣讀誓約書，堅定beh起造一个基督教家庭，歸榮光hō͘ 上帝。儀式結束了後，阮kah參加婚禮ê人舉行一个小型宴會。

仁愛tńg來東京了後隨時請她上班ê「御茶の水」壽司餐廳ê頭家為阮做壽司；另外tī婚禮ê前一工，我kah嘉代以及郭牧師ê tsa-bó͘ kiáⁿ做伙去神奈川（かながわ）縣ê農家，用我舊ê長衫交換100粒柑á ńg來，做宴會ê路用。宴會ê時，窗á頂面開始有軟軟ê雪花，kah-ná是teh祝賀今á日ê純白婚禮。晴美小姐tùi她藥學專科學校ê朋友hia借來新娘衫，嘉代ê新郎衫mā是tùi hit工hip相ê人hia借來ê。

新郎kah新娘ê受付是拜託嘉代ê大姑（老父ê阿姊）ê三女高雅美夫婦；雅美小姐ê歌聲真súi，她是國立音樂學校出業，kah台南市ê富豪黃天祥律師結婚。她ê tsa-bó͘ kiáⁿ美幸hit當時kan-taⁿ一歲，tsit-má是紐約法拉盛第一銀行楊次雄董事長夫人。美幸mā是一个女強人，是台灣民進黨ê外交部長。阮ê結婚受tio̍h真tsē人ê祝福。

戰爭期間無計程車thang叫，新郎kā新娘ê手牽leh，坐電車tńg來高円市ê新厝。Tī he tsìn前，嘉代ka-kī一个tòa tī中野ê公寓，m̄-koh，伊結婚ê時to̍h租一間新厝。Tsit-ê新厝是一棟兩層樓ê建築，樓kha ê六塊tha-tha-mih房間hō͘ 仁愛tòa，樓kha ê八塊tha-tha-mih房間是阮ê房間。Hit時我虛歲25歲。