《《一位台灣女信徒ê自述》》

 | | | 轉寄

第三章_5）開辦齒科診所

作者 吳月娥, 台譯：Lîm Tsùn-io̍k 2021.01.03

Hit當時ê頭城，除了阮兩人，iáu有另外兩个醫生—鍾啓芳醫師kah楊乾巽醫師。鍾醫師是長期tī台北市馬偕病院服務ê助理醫生，戰後tsiah徙來庄kha開業。日本政府原本規定已經有正規學校畢業生teh開設診所ê所在，bēsái koh開設新ê診所，m̄koh tsit’ê規定tī戰後ê混亂中suah起亂。楊醫師是日本興亞醫學館ê畢業生，m̄koh該校並無得tio̍h日本政府ê認可，所以伊本來kantaⁿ ētàng成做一个醫生助理，m̄koh，伊kah政府進行談判來得tio̍h一張乙種執照。換一句話講，嘉代是hit當時頭城唯一ê正牌醫生。

Hit時，頭城有一間齒科診所。何醫師是南部人，日本大學ê齒科畢業了後，來tsia開業。嘉代kah鍾啓芳、何醫師ê年紀真接近，互相真投機；tī業餘ê時間kah暗時，in經常聚集做伙，無所不談。有一工，嘉代去破病ê何醫師in tau往診；伊患tio̍h嚴重ê肺炎。Hit當時是iáu未發現青黴素（penicillin）ê時，嘉代ê老父to̍h是因為仝款ê病症來往生。嘉代每兩點鐘去kā伊注射一pái；康復ê何醫師非常感謝嘉代ê親身治療。有一工，伊用lî’ákah載齒科診療椅kah各種設備，來到阮tau，講：「我kā夫人開業ētàng用tio̍h ê器械kah藥品lóng tshoân來tī tsia，請你使用。」我接受何醫師ê好意，就kā人客間裝修，改做小型ê齒科治療室，了後tī嘉代大看板ê另外一pêng，掛一塊小看板，頂面寫「齒科東洋女子醫學士吳月娥」。