《《一位台灣女信徒ê自述》》

 | | | 轉寄

第三章_15）鴻玉tī兒童音樂比賽得tio̍h頭名

作者 吳月娥, 台譯：Lîm Tsùn-io̍k 2021.03.21

鴻玉tī鋼琴方面ê進步真明顯，來阮tau看阮ê阿叔吳天賜對她真oló；伊tī淡水中學時代to̍h學過鋼琴，所以，伊mā真gâu彈鋼琴。伊kā我紹介tī台北神學院教冊ê美國教授毛克禮教授ê夫人；她tùi音樂大學畢業，以了解巴哈（Bats）ê作品來得tio̍h真koân ê名聲。她kā鴻玉收做她ê學生，鴻玉hit時是小學四年。因為鋼琴課是ta̍k禮拜六ê下晡一點開始，m̄koh去到台北ê特快車需要兩點鐘ê車程，結局，鴻玉不得不ta̍k禮拜六lóngtio̍h缺席，無去國民學校上課。

大約tī hit段時間，報紙頂面有刊登一篇文章，標題是「Beh舉行台灣首屆兒童音樂比賽」，對象是鋼琴kah小提琴，鋼琴有指定曲kah自選曲。我隨時為鴻玉提出報名申請表，m̄koh，因為當時鴻玉ê指導老師是鄭信美小姐，所以阮對毛克禮夫人保守tsit’ê秘密。總是，因為比賽日漸漸接近，阮to̍h kā毛克禮夫人表明鴻玉beh參加音樂比賽ê tāitsì，結果，她無表現出無歡喜ê表情，顛倒對鴻玉做種種ê指導。

比賽tī台北市中山堂舉行；參加者tùi台灣全島聚集óa來，kahná大多數是國民學校五到六年級ê女生。阮家族六人前一工to̍h來到台北，tòa tī北投ê一間旅館。為tio̍h hit工ê比賽，我編織一條海軍藍ê背心裙hō͘ 鴻玉穿，配一領白色ê長ńg衫。鴻玉真可愛，阿姊蘭玉mā是仝款ê穿插，兩人看起來kahná是雙生á。鴻玉端莊大方，彈琴koh kahná流水hiah順sī，無失誤ê所在，所以觀眾喝采ê掌聲特別大聲。

結果，鴻玉得tio̍h頭名。隔tńg工ê新聞頂面有一張大相片，她手裡the̍h優勝ê旗á。