《《平民ê基督傳》》

 | | | 轉寄

Tēsaⁿ koàn Tēsaⁿ tsiuⁿ Tú khaisí ê ha̍ksing 第三卷 第三章 Tú開始ê學生

作者 Tâi e̍k:Ko Tiktsiong,Siutēng Lîm Tsùnio̍k & Tsng Hūiphêng 2024.04.28




Tēsaⁿ tsiuⁿ Tú khaisí ê ha̍ksing


Koh kòe tsi̍t lépài, tsitsî lán só͘ ài tsùba̍k·ê, m̄sī tī hitê bô lâng kàu ê khòngiá kah Mô͘kúi teh kautsiàn ê Iésu, sī hitê tsingsîn íking tshéⁿngō͘, thuattshut kíntiuⁿ ê singua̍h, hôeho̍k kàu phó͘thong ê tsingsîn lâi kah phó͘thong lâng teh tsòhóe kaupôe ê Iésu. I sī tsin ìài khiākhí tī Galílaiah lâi kah hiahê tansûn, hó kaupôe ê tsohsitlâng tsòhóe ónglâi.

Katsài hitê nîlāu ê Iôhaneh sī tsin hó kìtî, nā bô, lán sī ē sitlo̍h hitê siūtshì liáu tsi̍tlépài lāi siōng tshùbī ê kò͘sū, to̍h sī teh kóng khí Iésu tshōetio̍h siōng tsákî ê ha̍ksing, hit sîtsūn ê kò͘sū. Máthài, Mákhó, íki̍p Lūka lóng sī kóngkhí tī Tsú ê singgâi tiong hiahê tiōngiàu ê sūkiāⁿ niāniā. In lóng ū kìtsài kiōngtông ê le̍ksú, íki̍p tsho͘tāi kàuhōe só͘ liûthoân ê kiōngtông ê hokim. Tsóng·sī tī in ê kò͘sū, ū làng tsētsē tsām bô kóngkhí. Lán tītsia só͘ beh kóng tsit tsàn sī in só͘ làukau ê tiám, in kìtsài hitê siūtshì ê kò͘sū liáu, to̍h lóng sòatsiap kóngkhí Iésu tī Galílaiah ê thoântō ê sū, iáukoh tī hit tiongkan só͘ū tútio̍h·ê, in sī lóng bô kìtsài pòaⁿhāng.

Tsóng·sī hitê tiàm tī hn̄ghn̄g Êhusoh ê lāu ha̍ksing Iôhaneh, ū hiankhui tsiahê hokimsu, iā tha̍kliáu bô siáⁿmi̍h boántsiok, tī i ê simlāi ná teh pó͘tshiong tī hiahê kò͘sū tiong só͘ làng phāng ê só͘tsāi. I tha̍ktio̍h siūtshì ê kò͘sū liáu, hit sî lán thang liāusióng i ū tshut siaⁿ kóng, Ai ah! in lóng hutlio̍k siūtshì āu hiahê kîī ê kúiáji̍t kú ê kò͘sū! i tha̍ktio̍h Iésu hiánjiân tshutthâu tsio ha̍ksing lâi tamtng tsithūn, hit sî i tī simlāi tsin kîkoài, siūⁿ kóng, in thái ē lóng bô kóngkhí goán tongsî ántsóaⁿ kah I se̍ksāi ê tsêng kéng.

Iôhaneh ū tsētsē pa̍t lâng só͘ bô ê, thang siàuliām ê kìik, inūi i tī Iésu ê sin piⁿ, ū thang tittio̍h tsētsē tsin súi ê kìik. I tī simlāi siôngsiông siūⁿtio̍h hiahê sū, sòa lâi kóng hō͘ tsènglâng thiaⁿ, iā sóa kā hiahê súisúi ê kìik lâi kìtsài tī i ê hokimsu ê lāibīn.

Tī i lóngtsóng ê kìik ê tiongkan, tēit tùhiān·ê, to̍h sī ē kìtit tī gō͘tsa̍p nî tsêng , ū tsi̍t ēpo͘, ioklio̍k sì tiámtsing ê sî só͘ kinggiām·ê, to̍h sī i tī hit sî tsiah tsho͘tsho͘ kìⁿ tio̍h i ê Tsú ê bīn. Hit ji̍t sī i itsing ê kìliāmji̍t. I tikkhak bô hutlio̍k hit ji̍t ê kinggiām, i ū kā Iésu siūtshì āu ittsiu lāi ê sū lóng kì·khílâi, ia̍h hitê kìliāmji̍t sī tsò hit ittsiu kan ê tô͘ ê tiongsim. Si̍ttsāi tsin tshùbī, lán thang kóng, hit ji̍t tōabīn sī lán ê pàila̍k, in ê Anhiohji̍t. Inūi i ū kìtsài tùi hit ji̍t khí, liânliân sì ji̍t kú só͘ tútio̍h ê sū, ia̍h sòa kóngkhí tsiahê ji̍t liáuāu, koh kòe saⁿ ji̍t tī Galílaiah ê Κaná ū hunin ê iânsia̍h. Hittia̍p Iûthàilâng ê hongsio̍k, sī tiāⁿtio̍h tī pàisaⁿ tsò hunin. Só͘í lán thang tùi pàisaⁿ sǹg tòtńg, kàu tsêng lépài ê pàisì, lâi siūⁿ hit tiongkan só͘ tútio̍h ê sūsi̍t.

Tshiáⁿ tsùì lâi khòaⁿ i só͘ pâilia̍t ê tsêngkéng, thâu tsi̍tji̍t sī pàisì. Iôhaneh sī kah i ê siansiⁿ kiâⁿsélé Iôhaneh tsòhóe tī Bēthaniah, i ū kah tsi̍ttīn ê siàuliân ê tângphōaⁿ, to̍h sī ū khǹg himbō͘ khah kosiōng ê sim·ê, tāike kah kui tōatīn ê tsènglâng tùi Galílaiah lo̍hlâi thiaⁿ tsitê sin ê sianti Iôhaneh ê kàsī. In tsiksî tòe i lâi tsò i ê ha̍ksing, sòa tsū ánne tiàm tī i ê sin piⁿ, kàu thóhái ê sîkî tsiah koh tókhì Galílaiah.

Kiâⁿsélé Iôhaneh ê thoântō, ū puttsí iôtsuah Baalsūtàn ê tsoân tē, tìkàu hō͘ khiākhí tī Êlúsalem̀ ê Huatlīsài lâng khòaⁿtsò iàukín, ū tshe tāipiáu lâi thàmmn̄g i. Tī hitê pàisì, tōabīn sī Iésu tùi khòngiá tòtńg lâi ê tsìntsêng ji̍t, hiahê sùtsiá ū tsiâu kàu. Tsitê tōa ê suankàusu tsoânjiân ēng sêngsi̍t, bô únmôa ê thāitō͘ lâi tsi̍htsiap in. Khiok i mā sī lóng bô siáⁿmi̍h sū thang únba̍t. "Tshiáⁿ kā goán kóng, lí sī siáⁿ lâng?" "Góa m̄ sī Kitok." "Tse sī ántsóaⁿ? lí sī Eliiah?" "Sī." "Lí sī hitê sianti?" "Sī." "Nāsī ánne, lí sī siáⁿ lâng? hō͘ goán thang hôehok tshe goán· ê. Lí tio̍hkóng kakī sī siáⁿ lâng?" "Góa to̍h sī teh kiò tī khòngiá· ê, i ê siaⁿ, kóng, siuti̍t Tsú ê lō͘, tshintshiūⁿ sianti Isáiah só͘ kóng· ê." "Lí nā m̄ sī Kitok, ia̍h m̄ sī Eliiah, ia̍h m̄ sī hitê sianti, ántsóaⁿ kiâⁿsélé ah?" "Góa ēng tsúi kiâⁿsélé; ū khiā tī lín tiongkan· ê, lín m̄bat i."

"Kehji̍t," kiâⁿsélé Iôhaneh ū kah kúi miâ ê tikí, tsòhóe teh khiā ê sî, hutjiân ū khòaⁿkìⁿ Iésu, tùi la̍k lépài tsêng I só͘ únbi̍t hitê suaⁿio ê lō͘ tshut·lâi, ǹg in tāike tsìntsêng teh kiâⁿ. I ê kiâⁿta̍h sī tsintsiàⁿ iàsiān ê khoán, hit sìtsa̍p ji̍t kú thang tsheⁿkiaⁿ ê kíntiuⁿ ê tsingsîn, iáu ū hiántshut tī I ê bīnmāu; tī I ê ba̍ktsiu iáu ū hiántshut pa̍t sèkài ê kongtshái tī·leh. Kiâⁿsélé Iôhaneh khaksi̍t tī ítsêng ū teh kîkoài, tàu/kàuté Iésu sī únbi̍t khì tī tó ūi. Tsitsî i tsiksî jīntit I, to̍h ēng jia̍tsêng kiongkèng ê thāitō͘ lâi pò i ê tângphōaⁿ, kóng,"lí khòaⁿ, Siōngtè ê iûⁿko, to̍h sī tamtng sèkan ê tsōe·ê. Tsitê to̍h sī góa só͘ bat kóng·ê, góa bat khòaⁿkìⁿ Sèng Sîn tshintshiūⁿ tsíⁿá tùi thiⁿ kànglo̍h hioh tī I ê téngbīn. Góa bat khòaⁿkìⁿ, sòa lâi kiàntsèng tsitê sī Siōngtè ê kiáⁿ."

Tsitê Êhusoh ê lāu kàmtok, koh tsi̍t pái kámkak tio̍h siàuliân ê khìkhài, inūi i ū koh siūⁿtio̍h tsásî tsho͘tsho͘ khòaⁿkìⁿ Iésu hit sî i ê sim siū kámtōng kàu ántsóaⁿ. Inūi i tsai i só͘ khòaⁿkìⁿ·ê, sī tī láutsá ê tiongkan Isulael lâng só͘ teh himbō͘ thènghāu· ê, sī beh tamtng sèkan ê tsōe, taⁿ lán ê tāngtàⁿ·ê.

Iôhaneh koh tsìntsêng lâi hôesióng hit sî ê kìik, to̍h sī kóng, koh keh ji̍t, to̍h sī in ê Anhiohji̍t, tī hit ēpo͘, Iôhaneh ū kah i ê tângphōaⁿ Antole̍h teh tâmlūn in ê siansiⁿ ê sū, úntàng iā sī teh tâmlūn Iésu ê sū, hitsî Iésu ū tútú beh kiâⁿ kòe khe kîⁿ ê lō͘. Lán thang sióngsiōng kiâⁿsélé Iôhaneh, simlāi úntàng ū siū kámtōng, tsiah lâi khan i ê siàuliân ê tângphōaⁿ ê tshiú, pí kóng,"lí khòaⁿ! Siōngtè ê iûⁿko!"Siōngtè ê iûⁿko! In iáubōe khòaⁿkìⁿ Siōngtè ê iûⁿko siū tèng tī Golgóthah ê ítsêng, tsūjiân sī bētàng liáukái hitê lóngtsóng ê ìgī. Tsóng·sī in ê sim ū tshut tùi thu̍tjiân ê tshiongtōng, hótáⁿ lâi tòe I, to̍h sī "ū nn̄gê ha̍ksing thiaⁿ i só͘ kóng, to̍h tòe Iésu."tōabīn sī inūi kiâⁿsélé Iôhaneh khiok iáu sī ū kòjîntik ê ìài tī·leh, Tsóng·sī hitê ìài sī bētàng kìmtsí in tòe Iésu. Iôhaneh tsíū sī tsò i ê Tsú ê sianhong niāniā.

Hit nn̄gê siàuliân ê thóhái lâng, beh tshuthuat lo̍hkhì khe kîⁿ, hit sî lán thang sióngsiōng, in úntàng sī tsin kiaⁿkiànsiàu, kiaⁿkiaⁿ, tsin bē koànsì ê khoán, tsi̍tsim huaⁿhí ài kah Iésu kóngōe, iā tsi̍tsim kiaⁿhiâⁿ m̄ káⁿ. Iésu tsi̍tē thiaⁿkìⁿ in ê khapō͘ siaⁿ, to̍h ua̍tthâu khòaⁿkìⁿ in teh tòe I, tshintshiūⁿ tī ta̍k sîtāi, I ū ua̍t thâu lâi khòaⁿ hiahê himbō͘ ài tòe I, iáukoh bô támliōng ê ha̍ksing kāngkhoán. I ēng tshintshiat, biánlē ê ōe lâi mn̄g in kóng,"Lín teh tshōe siáⁿmi̍h?" Iésu kóng tsit kù, hoānsè I ê ìsù sī teh tshì in, ài hoànkhí in ê sim, lâi kakī símmn̄g in só͘ teh tshōe·ê. Iésu sī ài in tsaiiáⁿ, Iésu sī bô iàukín lâng ê gûgōng, loánjio̍k, ló͘tūn, íki̍p kîtha, putkò kantaⁿ ài lâng tī simlāi ē hiáu kámkak, kóng,"Góa sī teh tshōe Siōngtè. Góa sī ài ho̍ksāi Lí."

Tsit nn̄gê siàuliân ê tsngkhalâng thiaⁿliáu sī tsin tsheⁿkiaⁿ, tsin hūnloān, tìkàu bōehiáutit tio̍h ántsóaⁿ ìn, sòa mn̄g kóng,"La̍hbí, Lí sī tiàm tī tóūi?" Ah! Iésu tsaiiáⁿ in ê khiàmkhueh. I to̍h kā in kóng,"Lín lâi to̍h ē khòaⁿkìⁿ."I to̍h tshōa in kàu I só͘ tòa hitê m̄tsiâⁿmi̍h, sèsè ê tshùá; hit ji̍t in ū kah Iésu tsòhóe tòa. Iôhaneh ê kìik sī puttsí bêng; hôikò͘ pòaⁿ sèkí tsêng ê sū kàu tsin siôngsè kóng,"hitsî ioklio̍k sì tiámtsing." ántsóaⁿ I ēthang hutlio̍k hitsî ê tsêngkéng? In tī hit ji̍t ê àmthâuá, kantaⁿkah Iésu tsòhóe tiàm tīhia, sòa siūtio̍h I kántan ê khoánthāi, iā sòa tsūiû lâi kah I tâmlūn, mn̄g I tang, mn̄g I sai, lâi thiaⁿ I ê kàsī, iā hitsî I úntàng ū tùi in kóngkhí kuanhē I ê sim tio̍h ántsóaⁿ ūitio̍h jînlūi ê tsōeok lâi kankhó͘, íki̍p tùi tī Siōngtèkok I jia̍tsêng ê kèōe kah hibāng ê sū, tī āulâi in siūⁿtio̍h hitsî ê tsêngkéng, kám m̄ sī kámkhài bû liōng! Iésu ū tôngtsêng in, tìkàu ū hoànkhí in huaⁿhí lâi ùiùi kóngkhí in ê tsìkhì. Lán khaksìn I thiaⁿliáu úntàng ū tùi in kóng, tōabīn I ê khoán tútú sī ài kóng ánne,"ū tsi̍t ji̍t góa ài lín nn̄g lâng, khiā tī góa ê sin piⁿ lâi pangtsō͘ góa."Tsit tsióng ōe sī gâu tshuipik lâng ê sim, ē íntshōa lâng, huathui lâng só͘ū ê hó ê pō͘hūn.

Tshì siūⁿ tsit nn̄gê siàuliân lâng, tī hitê móa thiⁿtsheⁿ ê àmmê, līkhui I tòtńg khì in tau, hitsî in ê simkuaⁿ úntàng tsin kîkoài koh tsin jia̍t, úntàng simsim liāmliām tosī teh susiúⁿ hitê sin ê pêngiú."lán úntàng tòe I, iā koh beh tòe I kàu sí." Hit ēhng in khòaⁿ tsoân sèkài sī lóng piànōaⁿ liáuliáu, ittshè lóng ōaⁿ tsò sin.

Iôhaneh kóng, hit àm khì tshōe Iésu· ê,"kîtiong tsi̍tê sī Símòng, Piattò͘ ê hiaⁿtī Antole̍h."iáu hitê sī i púnsin, i sī khiampi m̄ káⁿ kóng. Antole̍h tī hit àm kah Iésu kaupôe liáu, simlāi kámkak bû siōng ê huaⁿhí khoàilo̍k, to̍h tsiksî khì tshōe i ê hiaⁿtī."Símòng! goán íking tútio̍h Mesíiah ( huane̍k to̍h sī Kitok )lah nē!" Goán m̄ sī kantaⁿ tùi kiâⁿsélé Iôhaneh thiaⁿkìⁿ niāniā. Goán púnsin sī íking ū tútio̍h Ii. Tsit tsióng ê khaksìn sī tùi tī hit àm in ū kah Iésu tsòhóe só͘ tittio̍h·ê. Lâng tùi púnsin ê simté ê kinggiām, ēthang khaksìn lâi kóng, goán íking ū tútio̍h Kitok, hitkhoán lâng tsintsiàⁿ ū hokkhì! Tsóng·sī nā ēthang koh íntshōa pa̍t lâng lâi tsiūkīn I, hitkhoán ê lâng sī kohkhah ū hokkhì!

Tshintshiūⁿ ánne,"Antole̍h to̍h tshōa Símòng tsiūkīn Iésu." tse to̍h sī hitê sòsèng, tshiongtōng·ê, totsêng koh iôngī tio̍htak ê Piattò͘, ji̍p I ê tīn ê khoánsit. Piattò͘ tútú lâi ê sî, Iésu khòaⁿkìⁿ i, to̍h sûisî kā i hō sin ê miâ. Κiámtshái sī inūi Piattò͘ ū kakī kiànsiàu, tāmpo̍h sittsì tsaiiáⁿ i ê sèng khoài tshóngtōng, gâu iôtsuah. Iésu tsi̍tē khòaⁿkìⁿ i, sûisî liáukái i ê simtsêng." Iôhaneh ê kiáⁿ Símòng ah, góa lóng bat lí. Lí tsit sî suijiân sī loánjio̍k, iáukoh ū tsi̍t ji̍t lí beh tsiâⁿtsò ióngtsòng ê lâng. Ū tsi̍t ji̍t, lí beh tshingtsò kitsio̍h, to̍h sī tsio̍hpôaⁿ." Tse sī piáubêng Tsú ê gâu tsòng lâng ê táⁿ, ēng thiàⁿthàng ê tōngtshatle̍k, gâu khòaⁿ kàu lâng ê tsionglâi.

Iôhaneh tsitsî iáu sī ē kìtit hittongsîá ê tsêngkéng. Piattò͘ khiok sī tsū tsátsá to̍h íking kòesin, khì tiàm hitê lêngkài kah i ê Tsú tsòhóe khiākhí, iā tsitê lāu ha̍ksing hittia̍p iáukoh ē kìtit Iésu tsho͘tsho͘ tehkhòaⁿ Piattò͘, hitsî i ê ba̍ktsiu ê khoánsit, sī siosiāng tī saⁿ nî āu ê ū tsi̍t ji̍t, koh tsi̍t pái lâi "ua̍t thâu khòaⁿ Piattò͘, ia̍h Piattò͘ to̍h tshutkhì gōabīn, tōa thîkhàu." hit sî ê khoán.

Keh ji̍t, Iésu beh khì Galílaiah, lō͘ni̍h ài tùi Κaná kingkòe. Tī hit tiâu tsiòngkǹg tōlō͘ ê tiongkan, tsit tsām sī tsin súi, nn̄g pêng ū tsūjiân ê kéngtì. Iésu beh tshuthuat khì Galílaiah, lō͘ni̍h I tio̍h hiohkhùn tī Κaná lâi hù hunin ê iânsia̍h. Hitsî ū saⁿê ha̍ksing kah I tsòtīn khì, inūi in ê tshù, lóng sī tī hitê kehpiah, iā koh iûgoân siū phèngtshiáⁿ tio̍h khì hù hitê hunin. Tī hitê lō͘ tiong, Iésu ū tútio̍h Huili̍ppò͘. Lán thang hótáⁿ kóng, Iésu sī íking bat i. Huili̍ppò͘ ū tsi̍t ūi puttsí tshinbi̍t ê pêngiú, kiòtsò Nâthaⁿâel, tiàm tī Κaná. Lán thang thuitoàn tsitê Nâthaⁿâel sī tsi̍tê kèngkhiân ê Iûthàilâng, i ê sèngtsêng sī ài tiāmtsēng, ài be̍ksióng, iā ài siôngsiông kah Siōngtè kaupôe. I kah Huili̍ppò͘ úntàng khah siông tsòhóe tâmlūn Isulael lâng tùi tsionglâi só͘ teh ǹgbāng ê sū.

Huili̍ppò͘ ê sim bōetántit thang kóaⁿkín kàu Κaná, lâi tshōetio̍h i ê pêngiú Nâthaⁿâel.

"Nâthaⁿâel ah, Mô͘se kì tī lu̍thuat, kah tsiahê sianti só͘ kì·ê, goán íking tútio̍h I." "I sī siáⁿ lâng?" "Τo̍h sī Iôséhuh ê kiáⁿ, Natsalia̍t lâng, Iésu." Tsóng·sī Nâthaⁿâel simlāi khǹg giâugî, i bô teh liâubāng Mesíiah, beh tsiàu tsit khoán lâng só͘ liāu bētio̍h ê huattō͘ lâi tshuthiān. Tōabīn i sī lāutōalâng, siuⁿ kòethâu sòejī, bô khoàikhoài lâi thiaⁿ tsitê siàuliân lâng só͘ kóng ê ōe, lâi hua̍t i ê kha khì tshōe Iésu. I ēng tongsî hitkhoán teh biáusī lâng ê sio̍kgí, lâi ìn kóng,"Natsalia̍t kám ē tshut siáⁿmi̍h hó mi̍h?"

Huili̍ppò͘ bô ài kah i sio piānlūn, i tsíū kóng,"lâi khòaⁿ!" sī lâi khòaⁿ! lán tùi hiahê giâugî Iésu ê lâng tēit hó ê ìntap, to̍h sī tsit khoán ê ōe. Huili̍ppò͘ simlāi teh siūⁿ, lâng nā lâi kìⁿ tio̍h Iésu, būntê to̍h káikuat. Lâng nā óa lâi khòaⁿ Iésu tsi̍t·ē, thiaⁿ Iésu kóng tsi̍t kù, hitê konghāu sī khah iâⁿ ittshè ê piānlūn. Só͘í Huili̍ppò͘ ū tshōa Nâthaⁿâel tshutlâi kìⁿ pa̍t ê ha̍ksing."Iésu khòaⁿkìⁿ Nâthaⁿâel tsiūkīn i" (koh tsi̍t pái tsùì tī Iôhaneh, ántsóaⁿ koh teh hôesióng Tsú ê ba̍ktsiu ê khoánsit ), to̍h tsí i kóng,"lí khòaⁿ, tsintsiàⁿ sī Isulael lâng, sim bô khúikhiat·ê."

Iésu tsi̍tē khòaⁿ i, to̍h tittio̍h Nâthaⁿâel, hō͘ i ê simsîn tsiksî kah I kiat liân. Inūi tī lâng ê lāibīn ū hitkhoán tikak ê púnlêng tī·leh, tùi tsitê púnlêng tī tsoân sèkài hoānnā ū sêngsi̍t ê lâng, tāike tsiah kóaⁿkín siongthong kok lâng ê ìtsì.

Nâthaⁿâel ū iântshiân tsi̍tsîá kú, to̍h mn̄g kóng,"Τùi tóūi bat góa?" "Ah, góa lóng bat lí. Huili̍ppò͘ iáubōe kiò lí, lí tī bûhuakó tshiūkha, góa íking khòaⁿkìⁿ lí lah."

Nâthaⁿâel thiaⁿ hit kù ōe liáu, ē hiah kámtōng i ê sim, sī inūi ū tāmpo̍h líiû tī·leh. I m̄ sī kantaⁿ ūitio̍h tsaiiáⁿ Iésu ū hitkhoán tshiautsūjiân ê tìhūi, lâi tsaiiáⁿ i ū tiàm tī bûhuakó tshiūkha teh tha̍k sèngtsheh, só͘í tsiah hiah huaⁿhí lâi piáusī hitê ke̍k kîī, sêngsi̍t, oântsoân ê sìnho̍k. Putkò lán thang lâi siūⁿ hitê intuaⁿ, phìjū lâi kóng, lán nā siámphiah khì tī bûhuakó tshiū kha, àmàm bô lâng khòaⁿkìⁿ ê só͘tsāi, ū tshimtshim kinggiām tsingsîn siōng ê tsoánki, lâi kakī tsi̍t lâng kah Siōngtè tsòhóe tīteh; iūkoh lán tùi khòaⁿtio̍h Iésu ê bīnmāu, íki̍p thiaⁿtio̍h I ê ōe lâi tsaiiáⁿ I lóng tsai ,lán tiàm tī hitê pìbi̍t ê só͘tsāi ,tī simlāi si̍ttsāi só͘ teh siūⁿ, só͘ teh ǹgbāng·ê, sīmtsì suah tōatōa tôngtsêng lán, tī hitsî lán úntàng beh tsin tsheⁿkiaⁿ, ē pêⁿpêⁿ kah Nâthaⁿâel siāng khoán, ēng hitkhoán thang kiaⁿhiâⁿ, ū líkái ê ōe lâi âukiò kóng,"La̍hbí, Lí to̍h sī Siōngtè ê kiáⁿ! Isulael ê ông!"

Sī lah! Iésu sī Siōngtè ê kiáⁿ! Tsóng·sī tsit tia̍p I sī khah ài únbi̍t I ê sînsèng, khah ài khòaⁿtsò tshintshiūⁿ in ê tsi̍tê, lâi kah tsiahê siàuliân ê pêngiú tsòhóe kaupôe. Só͘í I ū ēng I itsing só͘ tēit ài ê, hit kù "Jîntsú" ê tshingho͘, ìsù sī phó͘thong lâng ê kiáⁿ, lâi ìntap i, kóng,"góa si̍tsi̍t kā lín kóng, lín beh khòaⁿkìⁿ thiⁿ khui, Siōngtè ê thiⁿsài tsiūⁿ lo̍h tī Jîntsú ê téngbīn." Tsitê ìntap tútú sī siáⁿmi̍h ìsù, lán sī bētàng khoàikhoài liáukái. Putkò lán tsai kèngkhiân ê Iûthàilâng, sī koànsì tī ta̍k ji̍t hiankhui Kūiok ê sèngtsheh, lâi be̍ksióng hit tiongkan kúi tsām ê tōlí. Só͘í lán thang phahsǹg, Nâthaⁿâel tī hit tsákhí, tiàm bûhuakó tshiū kha, sī tútú teh sàmsu Iâkop ê īsiōng, íki̍p tī hitê lâuthui teh tsiūⁿ lo̍h ê Siōngtè ê thiⁿsài ê sū. Κiámtshái Iésu ê ōe, sī tùitùi tī i só͘ tha̍k ê, tùi ánne hō͘ Nâthaⁿâel kohkhah tshimsìn, tsaiiáⁿ khiā tī i ê bīntsêng tsitê Iésu, sī ē bat i ê simlāi ta̍k hāng ê simsu.

Lán ài siūⁿtio̍h tsitê lāu ha̍ksing ū ántsóaⁿ ēng kèngùi ê liāmthâu lâi kìtit tsá siàuliân sîtāi ê sū. Lán ài siūⁿtio̍h Siōngtè ū ántsóaⁿ tshú lâng ê iūⁿsiùⁿ, lâi kàsī tsiahê siàuliân lâng líkái tsongkàu. I ê huattō͘ sī bô ēng líkhì lâi lūn tsèng Siōngtè, mā bô kóngkhí tsōejîn ê ūnmiā siáⁿ khoán, lâi phah tsheⁿkiaⁿ in ê sim, tsíū sī ēng thiàⁿthàng kah in tsò pêngiú, lâi hō͘ in bat I. Tsoân hokim ê le̍ksú ū àmsī lán tsai, Iésu ū tsin kîī ê khipínla̍t tī·leh. Lâng nā ū sêngsi̍t, to̍h thang tùi tikak ê púnlêng lâi huangêng I, lâi thiàⁿthàng I, tsèng ha̍ksing tiāⁿtio̍h tiāⁿtio̍h ū hitkhoán ê kinggiām.
Tsá sī ánne, to̍h hiānkim mā sī. Tsiahê siàuliân ê ha̍ksing, sī tsò ta̍k sîtāi bûsò͘ bān ê lâng ê tāipiáu, piáubêng lán lóng sī tùi tī lán só͘ū hitê tikak ê púnlêng, íki̍p I ê jînkeh ê khipínla̍t lâi kīn óa I. Si̍ttsāi Iésu putsî to ū thang tittio̍h hitkhoán khiamsùn, sêngsi̍t ê lâng lâi kīn óa I, lóng sī inūi ánne. Lán khiok sī bētàng tshintshiūⁿ in ê khoán, lâi tiàm tī I ê sin piⁿ, iáukoh hoānsè lán nā ēng kîtó lâi kángkiù lán tsit pún ê Kitok thôaⁿ, simlāi tsintsiàⁿ ài beh bat I, hitsî lán ê simsîn iûgoân ē tshintshiūⁿ tsiahê siàuliân lâng kāngkhoán, úntàng ē hō͘ I giú khì, sòa lâi sìnkhò I, ia̍h tiāⁿtio̍h ǹgbāng ēthang siókhóa lâi o̍h I ê khoánsit.

Tshintshiūⁿ ánne, siatsú lán tī simlāi nāsī íking bat I, lán tītsia tio̍h koh tsaiiáⁿ, iáu ū tsi̍t hāng iàukín ê kàuhùn hiántshut tī tsitê kò͘sū ê piáubīn. Tsásî tsiahê ha̍ksing teh khuikhuah I ê tsongkàu ê huattō͘, tsíū sī tsio pêngiú lâi bat Iésu jîí. Siatsú lán ta̍k lâng nā ē tshintshiūⁿ ánne lâi tsò, Siōngtèkok ê si̍thiān, sī liâmpiⁿ ê sū. Góa tī téng ji̍t, tshàutúkhám ū tha̍ktio̍h tsi̍tê khah tsá ê lâng só͘ tù ê tsheh, tī i ê tshehni̍h ū kìtsài tsi̍t hāng khah kîkoài, thang tsheⁿkiaⁿ ê kìsū kóng,"siatsú tùi kiⁿî khí, kantaⁿ ū 100 ê tsinsi̍t ê Kitoktô͘, kuatsim tī ta̍k nî kú beh kok kok íntshōa tsi̍tê pêngiú lâi bat i ê Tsú, to̍h tsoân sèkài tī 25 nî kú sī lóng beh hângho̍k tī Tsú ê khaē." Góa khíthâu tha̍kliáu bô siáⁿmi̍h beh sìn, tsóng·sī góa gia̍h pit tsi̍tē sǹg khòaⁿ, to si̍ttsāi ūiáⁿ. Kiⁿî 100, mênî 200, āu nî 400, 800, 1600, tshintshiūⁿ ánne, ta̍k nî tittio̍h kapōe. Kàu 25 nî āu sī thang tittio̍h 16 ik lâng, tshiaukòe tsoân sèkài ê jînkháu. Pêngiú íntshōa pêngiú, tângphōaⁿ íntshōa tângphōaⁿ, lāubú íntshōa sè kiáⁿ. Ah! hūjînlâng ah, Siōngtè ū tsiokhok lín, si̍ttsāi tshaputto sī tsíū lín ū teh tsò tsitê kang niāniā. Si̍ttsāi tshaputto ta̍kê tsò lāubú ê lâng lóng himbō͘ i ê sè kiáⁿ lâi bat Iésu. Kináji̍t Siōngtè ê sèng kok, sī tùi hūjînlâng ê khùila̍t, ū tsìnpō͘ kàu tshintshiūⁿ ánne.




第三章 Tú開始ê學生



Koh過一禮拜，tsit時咱所ài注目ê，m̄是tī hit-ê無人到ê曠野kah魔鬼teh交戰ê耶穌，是hit-ê精神已經醒悟，脫出緊張ê生活，復到普通ê精神來kah普通人teh做伙交陪ê耶穌。伊是真意愛khiā起tī加利利來kah hiah-ê單純，好交陪ê作穡人做伙往來。

佳哉hit-ê年老ê約翰是真好記tî，若無，咱是ē失落hit-ê受試了一禮拜內siōng趣味ê故事，to̍h是teh講起耶穌tshōe-tio̍h siōng早期ê學生，hit 時tsūnê故事。馬太、馬可，以及路加lóng是講起tī主ê生涯中hiah-ê重要ê事件niā-niā。In lóng有記載共同ê歷史，以及初代教會所流傳ê共同ê福音。總是tī in ê故事，有làng tsē-tsē站無講起。咱tī-tsia所beh講tsit層是in所làu-kau ê點，in記載hit-ê受試ê故事了，to̍h lóng續接講起耶穌tī加利利ê傳道ê事，iáu-koh tī hit中間所有tú-tio̍h-·ê，in是lóng無記載半項。

總是hit-ê tiàm tī遠遠以弗所ê老學生約翰，有掀開tsiah-ê福音書，也讀了無啥物滿足，tī伊ê 心內ná teh補充tī hiah-ê故事中所làng-phāng ê所在。伊讀tio̍h受試ê故事了，hit時咱thang料想伊有出聲講，Ai ah! in lóng忽略受試後hiah-ê奇異ê幾á日久ê故事！伊讀tio̍h耶穌顯然出頭招學生來擔當職份，hit時伊tī心內真奇怪，想講，in thái會lóng無講起阮當時án怎kah伊熟似ê情景。

約翰有tsē-tsē別人所無ê，thang siàu念ê記憶，因為伊tī耶穌ê身邊，有thang得tio̍h tsē-tsē真súi ê記憶。伊tī心內常常想tio̍h hiah-ê事，續來講hō͘眾人聽，也sóa kā hiah-ê súi-súi ê記憶來記載tī伊ê 福音書ê內面。

Tī伊lóng總ê記憶ê中間，第一著現-·ê，to̍h是ē記得tī五十年前ê有一下晡，約略四點鐘ê時所經驗-·ê，to̍h是伊tī hit時tsiah初初見tio̍h伊ê 主ê面。Hit日是伊一生ê記念日。伊的確無忽略hit日ê經驗，伊有kā耶穌受試了一禮拜內ê事lóng寫起來，亦hit-ê記念日是做hit一週內ê圖ê中心。實在真趣味，咱thang講，hit日大面是咱ê拜六，in ê安息日。因為伊有記載tùi hit日起，連連四日久所tú-tio̍h ê事，亦續講起tsiah-ê日了後，koh過三日tī加利利ê Κa-ná有婚姻ê筵席。Hit-tia̍p偤太人ê風俗，是tiāⁿ-tio̍h tī拜三做婚姻。所以咱thang tùi拜三算倒tńg，到進前禮拜ê拜四，來想hit中間所tú-tio̍h ê事實。

請注意來看伊所排列ê情景，頭一日是拜四。約翰是kah伊ê 先生行洗禮約翰做伙 tī伯大尼，伊有kah一陣少年ê同伴，to̍h是有khǹg欣慕khah高尚ê心-·ê，大家kah kui大陣ê眾人tùi加利利落來聽tsit-ê新ê先知約翰ê教示。In即時tòe伊來做伊ê 學生，續自án-ne tiàm tī伊ê 身邊，到討海ê時期tsiah koh倒去加利利。

行洗禮約翰ê傳道，有不止搖tsuah巴勒士但ê全地，致到hō͘ khiā起tī耶路撒冷ê法利賽人看做要緊，有差代表來探問伊。Tī hit-ê拜四，大面是耶穌tùi曠野倒tńg來ê進前日，hiah-ê使者有齊到。Tsit-ê大ê宣教師全然用誠實，無隱瞞ê態度來tsih接in。卻伊mā是lóng無啥物事thang穩密。 「請kā阮講，你是啥人？」 「我m̄是基督。」 「這是án怎？你是以利亞?」 「是。」 「你是hit-ê先知?」 「是。」 「若是án-ne，你是啥人？hō͘阮thang回覆差阮ê。你tio̍h講ka-kī是啥人？」 「我to̍h是teh叫tī曠野ê，伊ê 聲，講，修直主ê路，親像先知以賽亞所講ê。」 「你若m̄是基督，亦m̄是以利亞，亦m̄是hit-ê先知，án怎行洗禮ah?」 「我用水行洗禮；有khiā tī lín中間ê，lín m̄-bat伊。」
「隔日，」行洗禮約翰有kah幾名ê知己，做伙 teh khiā ê時，忽然有看見耶穌，tùi六禮拜前伊所穩密hit-ê山腰ê路出來，ǹg in大家進前teh行。伊ê 行踏是真正厭倦ê款，hit四十日久thang生驚ê緊張ê精神，iáu有顯出tī伊ê 面貌；tī伊ê 目tsiu iáu有顯出別世界ê光彩tī-·leh。行洗禮約翰確實tī以前有teh奇怪，到底耶穌是穩密去tī tó位。Tsit時伊即時認得伊，to̍h用熱誠恭敬ê態度來報伊ê 同伴，講：「你看，上帝ê羊羔，to̍h是擔當世間ê罪ê。Tsit-ê to̍h是我所bat講ê，我bat看見聖神親像tsíⁿ-á tùi天降落歇tī伊ê 頂面。我bat看見，續來見證tsit-ê是上帝ê kiáⁿ。」

Tsit-ê以弗所ê老監督，koh一pái感覺tio̍h少年ê氣慨，因為伊有koh想tio̍h早時，初初看見耶穌hit時，伊ê心受感動到án怎。因為伊知伊所看見-·ê，是tī老早ê中間以色列人所teh欣慕thèng候ê，是beh擔當世間ê罪，擔咱ê重擔-·ê。

約翰koh進前來回想hit時ê記憶，to̍h是講，koh隔日，to̍h是in ê安息日，tī hit下晡，約翰有kah伊ê 同伴安德列teh談論in ê先生ê事，穩當也是teh談論耶穌ê事，hit時耶穌有tú-tú beh行過溪墘ê路。咱thang想像行洗禮約翰，心內穩當有受感動，tsiah來牽伊ê 少年ê同伴ê手，比講：「你看！上帝ê羊羔！」上帝ê羊羔！In iáu未看見上帝ê羊羔受釘tī各各他ê以前，自然是bē-tàng了解hit-ê lóng總ê意義。總是in ê心有出tùi突然ê衝動，好膽來tòe伊，to̍h是「有兩个學生聽伊所講，to̍h tòe耶穌。」大面是因為行洗禮約翰卻猶是有個人的ê意愛tī-·leh，總是hit-ê意愛是bē-tàng禁止in tòe耶穌。約翰只有是做伊ê 主ê先鋒niā-niā。

Hit兩个少年ê討海人，beh出發落去溪墘，hit時咱thang想像，in穩當是真驚見笑，驚驚，真bē慣勢ê款，一心歡喜ài kah耶穌講話，也一心驚惶m̄敢。耶穌一下聽見in ê腳步聲，to̍h ua̍t頭看見in teh tòe伊，親像tī ta̍k時代，伊有ua̍t頭來看hiah-ê欣慕ài tòe伊，iáu-koh無膽量ê學生仝款。伊用親切，勉勵ê話來問in講：「Lín teh tshōe啥物？」耶穌講tsit句，hoān-sè伊ê 意思是teh試in，ài喚起In ê心，來ka-kī審問in所teh tshōe-·ê。耶穌是ài in知影，耶穌是無要緊人ê愚戇、軟弱、魯鈍，以及其他，不過kan-taⁿ ài人tī心內ē曉感覺，講：「我是teh tshōe上帝。我是ài服事你。」

Tsit兩个少年ê庄腳人聽了是真生驚，真混亂，致到bōe曉得tio̍h án怎應，續問講：「拉比，你是tiàm tī tó位？」Ah!耶穌知影in ê欠缺。伊to̍h kā in講：「Lín來to̍h ē看見。」伊to̍h tshōa in到伊所tòa hit-ê m̄成物，細細ê厝á；hit日in有kah耶穌做伙 tòa。約翰ê記憶是不止明；回顧半世紀前ê事到真詳細講：「hit時約略四點鐘。」án怎伊ē-thang忽略hit時ê情景？In tī hit日ê暗頭á，kan-taⁿkah耶穌做伙 tiàm tī-hia，續受tio̍h伊ê 簡單ê款待，也續自由來kah伊談論，問伊東，問伊西，來聽伊ê 教示，也hit時伊穩當有tùi in講起關係伊ê心tio̍h án怎為tio̍h人類ê罪惡來艱苦，以及tùi tī上帝國伊熱誠ê計畫kah希望ê事，tī後來in想tio̍h hit時ê情景，kám m̄是感慨無量！耶穌有同情in，致到有喚起in歡喜來畏畏講起in ê志氣。咱確信伊聽了穩當有對in講，大面伊ê 款tú-tú是ài講án-ne，「有一日我ài lín兩人，khiā tī我ê身邊來幫助我。」Tsit種話是gâu催逼人ê心，ē引tshōa人，發揮人所有ê好ê部分。

試想tsit兩个少年人，tī hit-ê滿天星ê暗暝，離開伊倒tńg去in tau，hit時in ê心肝穩當真奇怪koh真熱，穩當心心念念to是teh思想hit-ê新ê朋友。「咱穩當tòe伊，也koh beh tòe伊到死。」Hit ē昏in看全世界是lóng變換了了，一切lóng換做新。

約翰講，hit暗去tshōe耶穌-·ê，「其中一个是西門，彼得ê兄弟安德列。」猶hit-ê是伊本身，伊是謙卑m̄敢講。安德列tī hit暗kah耶穌交陪了，心內感覺bû上ê歡喜快樂，to̍h即時去tshōe伊ê 兄弟。「西門！阮已經tú-tio̍h彌賽亞(翻譯to̍h是基督)lah nē！」阮m̄是kan-taⁿ tùi行洗禮約翰聽見niā-niā。阮本身是已經有tú-tio̍h伊。Tsit種ê確信是tùi tī hit暗in有kah耶穌做伙所得tio̍h-·ê。人tùi本身ê心底ê經驗，ē-thang確信來講，阮已經有tú-tio̍h基督，hit款人真正有福氣！總是若ē-thang koh引tshōa別人來就近伊，hit款ê人是koh-khah有福氣！

親像án-ne，「安德列to̍h tshōa西門就近耶穌。」這to̍h是hit-ê躁性、衝動-·ê，多情koh容易tio̍h-tak ê彼得，入伊ê 陣ê款式。彼得tú-tú來ê時，耶穌看見伊，to̍h隨時kā伊號新ê名。Κiám-tshái是因為彼得有ka-kī見笑，淡薄失志知影伊ê性快衝動，gâu搖tsuah。耶穌一下看見伊，隨時了解伊ê心情。「約翰ê kiáⁿ西門ah，我lóng bat你。你tsit時雖然是軟弱，iáu-koh有一日你beh成做勇壯ê人。有一日，你beh稱做基石，to̍h是石磐。」這是表明主ê gâu壯人ê膽，用疼痛ê洞察力，gâu看到人ê將來。

約翰tsit時猶是ē記得hit當時á ê情景。彼得卻是自早早to̍h已經過身，去tiàm hit-ê靈界kah伊ê 主做伙 khiā起，也tsit-ê老學生hit-tia̍p iáu-kohē記得耶穌初初teh看彼得，hit時伊ê 目tsiu ê款式，是相siāng tī三年後ê有一日，koh一pái來「ua̍t頭看彼得，亦彼得to̍h出去外面，大啼哭。」hit時ê款。

隔日，耶穌beh去加利利，路裡ài tùi Κa-ná經過。Tī hit條縱貫道路ê中間，tsit站是真súi，兩pêng有自然ê景緻。耶穌beh出發去加利利，路裡伊tio̍h歇睏tī Κa-ná來赴婚姻ê筵席。Hit時有三个學生kah伊做陣去，因為in ê厝lóng是tī hit-ê隔壁，也koh猶原受聘請tio̍h去赴hit-ê婚姻。Tī hit-ê路中，耶穌有tú-tio̍h腓力。咱thang好膽講，耶穌是已經bat伊。腓力有一位不止親密ê朋友，叫做拿但業，tiàm tī Κa-ná。咱thang推斷tsit-ê拿但業是一个敬虔ê偤太人，伊ê 性情是ài恬靜，ài默想，也ài常常kah上帝交陪。伊kah腓力穩當khah常做伙，做伙談論以色列人tùi將來所teh ǹg望ê事。

腓力ê心bōe等得thang趕緊到Κa-ná，來tshōe-tio̍h伊ê 朋友拿但業。

「拿但業ah，摩西記tī律法，kah tsiah-ê先知所記-·ê，阮已經tú-tio̍h伊。」 「伊是啥人?」 「Τo̍h是約瑟ê kiáⁿ，拿撒勒人，耶穌。」 總是拿但業心內khǹg僥疑，伊無teh遼望彌賽亞，beh照tsit款人所料bē-tio̍h ê法度來出現。大面伊是老大人，siuⁿ過頭sòe-jī，無快快來聽tsit-ê少年人所講ê話，來伐伊ê腳去tshōe耶穌。伊用當時hit款teh藐視人ê俗語，來應講：「拿撒勒kám ē出啥物好物?」

腓力無ài kah伊相辯論，伊只有講：「來看！」是來看！咱tùi hiah-ê僥疑耶穌ê人第一好ê應答，to̍h是tsit款ê話。腓力心內teh想，人若來見tio̍h耶穌，問題to̍h解決。人若óa來看耶穌一下，聽耶穌講一句，hit-ê功效是khah贏一切ê辯論。所以腓力有tshōa拿但業出來見別ê學生。「耶穌看見拿但業就近伊」(koh一pái注意tī約翰，án怎koh teh回想主ê目tsiu ê款式)，to̍h指伊講：「你看，真正是以色列人，心無詭詐-·ê。」

耶穌一下看伊，to̍h得tio̍h拿但業，hō͘伊ê 心神即時kah伊結連。因為tī人ê內面有hit款知覺ê本能tī-·leh，tùi tsit-ê本能tī全世界凡若有誠實ê人，大家tsiah趕緊相通各人ê意志。

拿但業有延tshiân 一時á久，to̍h問講：「Τùi tó位bat我？」 「Ah，我lóng bat你。腓力iáu未叫你，你tī無花果樹腳，我已經看見你lah。」

拿但業聽hit句話了，ē hiah感動伊ê心，是因為有淡薄理由tī-·leh。伊m̄是kan-taⁿ為tio̍h知影耶穌有hit款超自然ê智慧，來知影伊有tiàm tī無花果樹kha teh讀聖冊，所以tsiah hiah歡喜來表示hit-ê極奇異、誠實、完全ê信服。不過咱thang來想hit-ê因端，譬喻來講，咱若閃避去tī無花果樹kha，暗暗無人看見ê所在，有深深經驗精神上ê轉機，來ka-kī一人kah上帝做伙 tī-teh;又koh咱tùi看tio̍h耶穌ê面貌，以及聽tio̍h伊ê話來知影，伊lóng知咱tiàm tī hit-ê祕密ê所在，tī心內實在所teh想，所teh ǹg望-·ê，甚至suah大大同情咱，tī hit時咱穩當beh真生驚，ē平平kah拿但業siāng款，用hit款thang驚惶，有理解ê話來喉叫講，「拉比，你to̍h是上帝ê kiáⁿ！以色列ê王！」

是lah!耶穌是上帝ê kiáⁿ！總是tsit tia̍p伊是khah ài穩密伊ê 神聖，khah ài看做親像in ê一个，來kah tsiah-ê少年ê朋友做伙交陪。所以伊有用伊一生所第一ài-·ê，hit句「人子」ê稱呼，意思是普通人ê kiáⁿ，來應答伊，講：「我實實kā lín講，lín beh看見天開，上帝ê天使tsiūⁿ落tī人子ê頂面。」Tsit-ê應答tú-tú是啥物意思，咱是bē-tàng快快了解。不過咱知敬虔ê偤太人，是慣勢tī ta̍k日掀開舊約ê聖冊，來默想hit中間幾站ê道理。所以咱thang phah算，拿但業tī hit早起，tiàm無花果樹kha，是tú-tú teh三思雅各ê異象，以及tī hit-ê樓梯teh tsiūⁿ落ê上帝ê天使ê事。Κiám-tshái耶穌ê話，是對對tī伊所讀-·ê，tùi án-ne hō͘拿但業koh-khah深信，知影khiā tī伊ê 面前tsit-ê耶穌，是ē bat伊ê 心內ta̍k項ê心思。

咱ài想tio̍h tsit-ê老學生有án怎用敬畏ê念頭來記得早少年時代ê事。咱ài想tio̍h上帝有án怎取人ê樣相，來教示tsiah-ê少年人理解宗教。伊ê 法度是無用理氣來論眾上帝，mā無講起罪人ê運命啥款，來phah生驚in ê心，只有是用疼痛kah in做朋友，來hō͘ in bat伊。全福音ê歷史有暗示咱知，耶穌有真奇異ê吸引力tī-·leh。人若有誠實，to̍h thang tùi知覺ê本能來歡迎伊，來疼痛伊，眾學生tiāⁿ-tio̍h有hit款ê經驗。

早是án-ne，to̍h現今mā是。Tsiah-ê少年ê學生，是做ta̍k時代無數萬ê人ê代表，表明咱lóng是tùi tī咱所有hit-ê知覺ê本能，以及伊ê 人格ê吸引力來近óa伊。實在耶穌不時to有thang得tio̍h hit款謙遜、誠實ê人來近óa伊，lóng是因為án-ne。咱卻是bē-tàng親像in ê款，來tiàm tī伊ê 身邊，iáu-koh hoān-sè咱若用祈禱來講究咱tsit本ê基督傳，心內真正ài beh bat伊，hit時咱ê心神猶原ē親像tsiah-ê少年人仝款，穩當ē hō͘伊giú去，續來信靠伊，亦tiāⁿ-tio̍h ǹg望ē-thang 小khóa來學伊ê 款式。

親像án-ne，設使咱tī心內若是已經bat伊，咱tī-tsia tio̍h koh知影，iáu有一項要緊ê教訓顯出tī tsit-ê故事ê表面。早時tsiah-ê學生teh開闊伊ê 宗教ê法度，只有是招朋友來bat耶穌而已。設使咱ta̍k人若ē親像án-ne來做，上帝國ê實現，是liâm邊 ê事。我tī頂日，tshàu-tú-khám有讀tio̍h一个khah早ê人所著ê冊，tī伊ê 冊裡有記載一項khah奇怪，thang生驚ê記事講：「設使tùi今年起，kan-taⁿ有100个真實ê基督徒，決心tī ta̍k年久beh各各引tshōa一个朋友來bat伊ê 主，to̍h全世界tī 25年久是lóng beh降服tī主ê腳下。」我起頭讀了無啥物beh信，總是我gia̍h筆一下算看，to實在有影。今年100，明年200，後年400，800，1600，親像án-ne，ta̍k年得tio̍h加倍。到25年後是thang得tio̍h 16億人，超過全世界ê人口。朋友引tshōa朋友，同伴引tshōa同伴，老母引tshōa細kiáⁿ。Ah!婦人人ah，上帝有祝福lín，實在差不多是只有lín有teh做tsit-ê工niā-niā。實在差不多ta̍k个做老母ê人lóng欣慕伊ê細kiáⁿ來bat耶穌。今á日上帝ê聖國，是tùi婦人人ê氣力，有進步到親像án-ne。