《各各他e5目屎--苦難得安慰》

 | | | 轉寄

委身hō͘啥人？

作者 紀福讚 2006.01.29

委身hō͘教會，是牧者，教會ê領袖siōng ài講ê道理。人tio̍h疼看會tio̍h ê教會，才會當疼看bē tio̍h ê上帝；因為教會是上帝ê代表。這種推理，時常也應用tī國家。疼國家，tio̍h疼看會tio̍h ê代表，總統、君王、天子。常ài用ê經文羅馬十三1-7，彼前二13-14。但bē記得提醒tsiah-ê話語ê前提，是「in lóng做上帝ê差役」。假使一間教會失去這種「做上帝差用」ê功能，伊就無資格koh做上帝ê代表。所以疼教會，無tú-tú是疼上帝。委身hō͘教會，無tú-tú是委身hō͘上帝。

但是，今á日，有太多ê教會會友，誤用了這種ê推理，掠準熱心tī教會ê事工，就是服事上帝。親像保羅tī腓立比三6「論熱心我是迫害教會」，伊熱心tī伊所屬ê團體，卻掠準是熱心tī上帝ê工。為什麼，會友會有這種錯誤ê觀念呢？因為濟濟牧者、長執將教會看做是家己ê事業teh phah拚，看做家己ê公司teh經營。有盡忠、熱心tī教會無？百分之百，絕對是盡忠、盡職到死，是絕對ê委身。但是m̄是有委身tī上帝，熱心tī上帝ê工，這tio̍h家己摸心肝才會知！猶太人kiám m̄是上帝ê選民，三合林kiám m̄是教會行政權威ê代表，但in suah將上帝本身－－耶穌基督kā釘十字架。教會kiám m̄是使徒teh帶領ê基督ê身軀，但in suah一直逼迫保羅ê召命。當伊tī耶路撒冷受掠ê時，教會tī tó位？當希特勒殺害猶太人ê時，教會tī tó位？當日本皇軍侵略東南亞ê時，教會tī tó位？當美國ê社會風氣愈來愈墮落ê時，教會tī tó位？當非洲ê飢餓愈來愈嚴重ê時，教會tī tó位？教會愈來愈複雜，會友愈來愈多，但tī教會周圍ê社區suah愈來愈烏暗，án-ni教會「做上帝ê差用」ê功能tī tó位？Án-ni委身tī教會，kiám是算做是委身tī上帝呢？若委身tī教會，才算做是委身tī上帝，這kiám m̄是將上帝關tī教會？Kiám是講：上帝ê權限只kan-taⁿ tī教會？Tsiah-ni̍h清楚ê道理，為什麼會友bē明白？因為會友也驚上帝「管區」siuⁿ過闊，會干涉tio̍h伊ê私生活，會看tio̍h伊「教會以外」ê行踏，會看tio̍h伊內心驚人ê污穢。所以每一位面對面tú-tio̍h上帝ê人，第一句話，就是講：「我有災禍lah！」Án-ni，「上帝」就成做教會ê獨家商品，牧師每一禮拜tī講台販賣tsiah-ê商品，有--ê khah gâu表演，口才khah好，音樂khah順，就khah有人聽。莫怪有一個第一擺隨阿嬤去拜堂ê gín-á，出拜堂ê第一句話，就是：「設備、音樂lóng bē-bái，廣告有khah長淡薄！」有人khah gâu賣「上帝」，奉獻khah多，會員（友）也自然khah濟；有人準備khah tshìn-tshái，lok錢ê人自然就khah少；有ê家庭受「保庇」khah濟，也就lok khah濟「香油」；有人管理分配ê權khah濟，也就lok khah濟，反正是我teh支配；有--ê khah受看重，也自然會khah捷出席，因為這是一個自我肯定真弱ê世代；有--ê，這間親tsiâⁿ khah濟，就khah捷來，ná teh開宗親會！有--ê teh聽候牧師祈禱了，thang相招去phah球；有--ê是來相親；有--ê是來招客戶；有--ê是來phah知名度；教會就濟人來來去去，總是最孤單--ê，iáu是十字架頂ê耶穌！Iáu是坐tī寶座ê上帝！Iáu是等tī厝頂ê聖神；因為in無宗親；m̄免買物件；bē曉phah球；siuⁿ老，m̄是對象；koh無選票；所以無人beh tshap in tse「三仙老公á標」。

Án-ni是委身hō͘啥人呢？會友委身hō͘教會，但是m̄是委身hō͘上帝，tio̍h摸家己ê心肝才知！特別是做會友kap做基督徒ê身分衝突ê時，khah常是將上帝khǹg一邊，關心教會ê發展、利益，khah過頭tī對上帝ê委身。委身tī上帝kiám m̄是委身tī伊ê話語？祂kiám m̄是講：「做tī至微細ê一個，就是做tī我ê身上。」委身是m̄是tio̍h去走tshuē hit位至微細--ê，來做tī伊ê身上！Kiám m̄是hiah-ê破病、iau餓、嘴乾、散赤、關監ê人？祂kiám m̄是也講：「Lín無做tī我兄弟中至微細ê一個，就無tī我ê身上。」，「若無. . . . . . 就無」，這是耶穌對tī「委身」真清楚ê表示，但今á日ê教會，誰肯去走tshuē tsiah-ê至微細ê人？Án-ni牧師ê謝禮、指揮ê車馬費、冷氣機、管風琴、教會旅行、聚餐、招待會友ê錢beh tuì tó位來？其中siōng大條ê「建堂」是m̄是永遠無向望？Án-ni委身hō͘上帝kap委身hō͘教會是m̄是有衝突？beh委身hō͘啥人？Tsia tio̍h看咱是做會友，á是做基督徒？若是做基督徒當然委身hō͘上帝，若是做會友（員），當然委身hō͘教會；但教會是啥物？Kiám m̄是基督ê身軀mah？耶穌續落去（馬太廿五45-廿六11）也o-ló抹油tī伊身上ê婦人人講：「Lín常常有散赤人kap lín同在，但我無常kap lín同在」，耶穌也ài咱「有時」會想tio̍h伊本身身軀ê欠缺，但伊ê前題是講：「Lín有散赤人kap lín常常同在」，可惜今á日教會內beh tshuē「散赤」「至微細ê一個」，實在是真oh！教會已經失去「做上帝ê差用」ê功能。教會已經bë記得家己是「基督ê身軀」，是tio̍h先釘十字架，才會復活；先受苦難，才有榮耀ê有機體。若拒絕十字架，也同時拒絕復活ê見證；若拒絕苦難，也同時拒絕榮耀。耶穌tī最後，無委身教會當局，無委身hō͘群眾，是委身hō͘上帝，hō͘上帝ê話語得tio̍h應驗。今，咱beh委身hō͘啥人？