《各各他e5目屎--苦難得安慰》

 | | | 轉寄

基督徒情結ê迷思

作者 紀福讚 2006.02.12

立法院核四預算ê前一暝，自稱是基督徒ê李登輝tī大飯店辦桌飲酒o͘-se立法委員，半強迫in tio̍h心肝掠thán-huâiⁿ，無顧子孫、鄉土ê存亡，tio̍h為家己ê權益、地位設想，舉手贊成出賣民意ê核四預算案。大約kāng 一個時陣tī義光教會，m̄是基督徒ê林義雄先生，為tio̍h台灣人ê性命耽憂，無顧家己ê身軀，決定禁食來表示心肝ê痛疼，喚起群眾看重性命，m̄-thang kan-taⁿ注神tī經濟ê利益kap物質ê享受來犧牲台灣人ê良心kap居起ê環境。Tī kāng一個時空，這兩個極端對比ê畫面，若上帝是審判者，祂beh講tó一位才是伊ê子民－－基督徒？

最近盧安達（Rwanda)內戰、飢餓、疾病，tī電視畫面看見人ê死體親像pún圾，用推土機堆做堆，放火燒抑埋tī空坑內，親像人間ê地獄。真濟宗教團體存tio̍h人基本憐憫ê心運送食物、藥品、人員參與救助。Tī洛杉磯ê慈濟會募集百萬美金，送醫療人員參與救援。但是tī洛杉磯ê教會suah ná teh看戲--ê，無一點點á動靜。Tī教會ê刊物，竟然連基本ê代禱呼籲也看bē tio̍h。Hō͘人產生疑問，教會是耶穌基督地面上ê身軀mah？拿撒勒耶穌kiám m̄是看見飢餓、破病ê群眾會動慈心，kā門徒講，「Lín hō͘ in食」（路九13）mah？耶穌ê福音kiám m̄是講「hō͘散赤人有好消息」mah？聖徒保羅kiám m̄是講，「基督ê身軀就是教會，tī我ê肉體，補滿伊所未有盡ê患難」（西一24）mah？

Tī基督徒ê見證裡，「koinonia」（團契、相交、分享、分擔）是真重要ê一項。初期ê教會因為有這種本質，hō͘伊本身ê組織親像有機體，會增生成長。對創造性ê少數發展成做今á日有十二億ê基督徒。這種性命共同體ê觀念也應用tī今á日ê台灣社會，台灣親像一隻航空母艦漂流tī國際ê海洋，對家己ê定位無明，去向茫茫，但是tī船頂ê人是一個命運ê共同體，必須互相團結、體貼、支持才會tàng tī中國壓霸ê壓力下面自立。教會也是kāng款，tī佔少數ê生存空間ni̍h，彼此結連、認同、支援，必須真強才會當tī外在ê壓力裡求生存。因此，台灣人kap台灣教會產生所謂ê「李登輝情結」kap「基督徒情結」。但這種情結若無提昇做真理共同phah拚ê力量，就會變做盲目ê跟tuè，親像早前耶穌時代ê祭司頭、經學師，in也是一個命運ê共同體，權益互相結連，意識相通，高舉「盡忠tī上帝」ê大旗，將「耶穌」釘死，看做是in神聖bē tàng侵犯ê使命，是in對上帝真誠ê獻祭。但對歷史來看，難免會產生疑問，「這種性命共同體存在ê根基kap意義是啥物neh？」

李登輝呼籲國民黨員tio̍h團結，因為核四是國民黨ê政策是m̄是會貫徹ê指標。伊呼籲tio̍h選國民黨ê候選人做縣長、省長、市長，若無，國民黨若倒店，大家就失業。以權益ê『分贓』來固守「國民黨ê情結kap國民黨ê組織（命運共同體）」ê延續，這種性命共同體親像雜草teh suan藤，伊存在ê意義是邪惡ê，是kap烏道ê幫派無啥物kāng款。維持組織ê利益所用ê手段往往是親像強盜壓霸ê行為kāng款。但今á日suah有bē少教會認同李登輝ê做法，看伊是「基督徒ê榮耀」，kap伊稱做主內ê兄弟，感覺真光榮，suah常常盲目附和伊一寡出tī私慾ê做法。事實上，今á日國民黨ê殘存，實在是靠李登輝teh拖老命，但咱必須質問ê，是教會kiám thang參與tī這種性命共同體ê結連？

Kāng款，tī北美ê某一個台灣教會ê教派，信徒彼此ê結連真強，親像性命ê共同體，有真強ê基督徒情結。因此教會組織會增長真緊。但這是m̄是表示上帝國ê進展呢？答案是：M̄是。因為「教會是基督ê身軀」，這種教會ê本質已經失落。In常常講ê口號「有疼才有羊」，這是講「tio̍h」一半ê真理。因為in以「得tio̍h羊」做「疼」ê目標。是一種完全為tio̍h功利ê動機。為tio̍h beh「得羊」（會tàng àn算有一工會當擠羊奶、食羊肉）才去「疼」。當然，若bē當「得羊」，就m̄肯付出「疼」，理由是「教會ê資源有限」所以教會存在ê唯一目的是beh「得羊」。當然Rwanda ê救助是kap這個教會宗旨完全無關，所以tī電視看tio̍h飢餓、破病ê人，也bē有啥物款ê「艱苦心」。因為牧者「專務傳道」，tī神tī「教會增長」，bē當分散資源去「疼」遠遠看bē tio̍h，bē tàng收成ê Rwanda。當然，若因為疼台灣，會喪失一寡「肥羊」，這是賠錢ê生意，koh khah bē通。見若會阻礙「教會增長」ê因素，lóng tio̍h suá開，kiám-tshái這是「上帝」本身。因此，咱會當看出這個性命ê共同體（community)存在ê意義主要m̄是「福音ê傳播」，á是「上帝國ê擴展」，乃是「教會組織本身ê擴大」。伊存在ê根基，無koh是「上帝」，乃是「教會ê權益」。教會有形ê組織若擴大，教會內在ê本質若消無。實際上是一個掛教會名稱ê專業機構。宣教主要ê目的是擴大本身ê組織，「宣道」「宣揚上帝國」成做次要、附帶ê目的。

親像李登輝帶領ê台灣國民黨，以「經濟利益」優先，「子孫ê幸福」、「民眾ê掛慮」、「文化ê保存」.... . . 等等lóng變做是無價值考慮ê pún圾。親像修憲ê考慮，竟然是以「因為講過、歹勢」來做主要ê決定因素，推動「僑選總統」ê錯誤政策。這是將李登輝當做是封建時代ê君王，「君無戲言」來看待。所謂ê「主權tī民眾」是一種高級ê政治騙術，這kap最近宋楚瑜講兩三句台語就表示伊認同台灣人，是kāng款ê好笑。但台灣人竟然因為這種李登輝情結，親像青瞑人無主見ê跟隨，這tú-tú也是教會「基督徒情結」錯誤ê運用，只因為伊自稱基督徒，是長老教會ê會友，就擁護伊ê政策，無khe-khó伊ê言論。親像有一寡教會無看一寡官員在位ê時對台灣前途ê損害，只因為伊自稱基督徒，就請伊主持大型ê佈道會。這是一種基督徒情結ê迷思（Myth=miss)。親像有基督徒看見人teh「教會增長」，不管伊ê教會走向是m̄是有偏差，只要「廟」會大間，「香火」會盛就好，是m̄是偏離聖經全備ê教示。耶穌曾真艱苦心講：「Lín互相受榮耀suah無求tuì獨一真神來ê榮耀，怎thang信我neh？」（約五44）。Tī好ê撒瑪利亞人ê故事，祂也問講：「Tó一個是hit-ê hông搶ê人ê厝邊neh？」門徒應講：「憐憫伊--ê」（路十36f），對最近tsiah-ê事件－－核四、修憲、取締電台、省市長選舉，教會是m̄是會突破這種錯誤ê基督徒情結來轉向上帝neh？我想這是台灣教會鎮靜思考ê時刻lah！