《各各他e5目屎--苦難得安慰》

 | | | 轉寄

序二: 流目屎ê神學

作者 蔡茂堂 2005.11.13

紀福讚牧師是我一向真尊重台灣神學院ê教授。Tī 1991年7月間，當我接tio̍h由International Theological Seminary 所發hō͘我ê I-20，tú-teh準備申請留學簽證前往美國台福神學院進修M.Div.學位ê時，突然傳來hō͘人無法度相信ê消息—台福教會牧師thâi死教會執事。有真tsē教會前輩勸我mài去台福教會事奉。

經過祈禱，我iáu是決定全家搬去洛杉磯。Án-ni-siⁿ，我有機會進一步認識紀牧師，通過幾nā pái ê探訪kap phue信ê往來，慢慢kap伊成做好朋友。我非常鼓勵紀牧師tī獄中將伊ê信仰體驗寫落來，將來成做真tsē人ê幫贊kap祝福。

今á日收到uì豐惠姊電傳來tsit本將要聚集出版《各各伊ê目屎》ê電子檔，我ê目屎也忍bē-tiâu。這是一本用目屎一字一句tī監獄中所完成ê靈程日誌。

苦難一直是人類所不願意承受koh無法度完全逃避ê生命事實。聖經中，咱ē-tàng看見充滿tio̍h各種ê苦難：tuì創世記開始，有亞當ê苦難、夏娃ê苦難、亞伯ê苦難、該隱ê苦難等等，一直到啟示錄經過白色寶座審判了後tī火湖中ê苦難，聖經ē-tàng講是一本苦難百科全書。Tī tsiah-nih tsē ê苦難當中，siōng hō͘咱深思ê是舊約中約伯所經歷ê苦難以及新約中耶穌所經歷ê苦難。頭前ê是tuì哲學ê角度來想像苦難ê可能意義，後壁ê是tuì救贖ê觀點來解釋苦難ê最高意義。

Tsit一本書是紀牧師tī苦難中ê心血結晶，咱ē-tàng看tio̍h紀牧師對tsit世界所發生各種tāi-tsì ê社會學分析kap神學反思。非常ǹg望有福氣讀tio̍h tsit本書ê讀者ē-tàng tuì冊中得tio̍h紀牧師tī苦難中反思所產生ê人生智慧。Ia̍h祈求上帝恩待紀牧師，hō͘伊tī經歷這一切苦難了後，信仰不只ē-tàng khiā-tsāi，koh ē-tàng發出經過苦難了後ê黃金ê光輝。也祝福紀牧師ē-tàng早日出獄，koh一遍為神國ê擴展kap咱同齊努力。

「流目屎iā種子--ê，beh 出歡喜ê聲收割。」 (詩126:5)
「歸暝雖然有啼哭，早起時就有歡喜。」 (詩30:5)
Ǹg望一暝苦難烏夜所流ê哀傷目屎，ē-tàng帶來早起歡呼收割ê喜樂目屎。
(本文作者現任台北和平長老教會牧師)