《各各他e5目屎--苦難得安慰》

 | | | 轉寄

Sòng-hiong ê教會

作者 紀福讚 2006.04.30

彼得tī耶路撒冷聖殿ê suí門，遇tio̍h一位出世就跛腳ê人，向伊tshun出正手講，「金銀我lóng無，總是我將所有ê lóng hō͘你。我奉拿撒勒人耶穌基督ê名，hō͘你起來行。」（徒三6）

保羅向外邦傳道ê時，伊kap彼得、雅各、約翰用正手ê禮相交，hō͘相約束，「tio̍h紀念sòng-hiong人」。這是保羅本來就熱心teh做ê代誌（加二10）。

初期教會ê一項特色就是「sòng-hiong」。Tī使徒ê時代，耶路撒冷ê教會，甚至tio̍h接受外邦教會ê賑濟。Tsiah-ê外邦教會也m̄是本身真富有才來賑濟耶路撒冷教會。反轉是tī本身極其散赤ê時，猶原向耶路撒冷tshun出賑濟ê手（林後八2）。

初期教會所傳ê信息，常常也是「sòng-hiong人ê福音」。譬如，「Lín sòng-hiong ê人有福氣lah，因為上帝ê國是lín ê」（路六20）。Sòng-hiong ê乞食拉撒路死後倒tī亞伯拉罕ê胸前（路十六23）。撒該悔改ê具體表現，就是將所有ê一半分hō͘ sòng-hiong人，耶穌講：「今á日，救恩到tī這個家」（路十九9）。這kap青年富有ê官ê結局有真明顯ê對照，因為伊富有suah m̄肯分hō͘ sòng-hiong人，致到離開耶穌ê團體（路十八23）。Tī初期教會得到福音ê富人ê共通點，就是肯賑濟sòng-hiong人，親像多加、哥尼流等等（徒九36；十2）。

初期教會ê成員也lóng是「sòng-hiong ê」。耶穌出世tī sòng-hiong ê家庭（路二24），傳道ê時，甚至也睏ê所在都無（路九58）。使徒放sak所有ê，來跟tuè耶穌，也是sòng-hiong ê人。（路十八28）Hiah-ê跟隨耶穌ê群眾，也大多數是sòng-hiong、飢餓ê人。（可六37；八1）莫怪彼得會講，「金銀我lóng無」。保羅tī hō͘初期教會ê批信中，也講「Lín tsiah-ê受召--ê， .... . . 有尊貴--ê，無guā tsē」（林前一26）。

Sòng-hiong是初期教會ê特質。In tī物質上sòng-hiong，但是tī靈性上kap疼心ê頂kuân，卻是富有ê表現。保羅講：「.... . . 加添lín仁義ê果子，hō͘ lín凡事富足 .... . . 」（林後九10－11）。Tsiah-ê sòng-hiong ê人，因為主耶穌基督ê恩典成做富足ê人。In記得耶穌所講ê「人性命ê豐盛，不在tī家道ê豐富」（路十二13），也記得耶穌ê應允「我來是beh羊得tio̍h koh khah豐盛ê生命」（約十10）。In雖bóng sòng-hiong，in ê見證真suí，會hō͘人因為in ê所做來感謝、榮耀上帝（林後九12），也有hō͘人會對軟腳koh起來行ê氣力（徒三8-9）。這款見證kap氣力是今á日ê教會所欠缺ê。

今á日ê教會，tī硬體ê建設上，常常是上億ê預算，總是tī疼心ê賑濟，常常是無上萬ê實支。「賑濟sòng-hiong」是教會偶發性ê裝飾，m̄是經常性ê活動。初期教會傳福音ê方式，是親像彼得kap保羅相約束ê「也tio̍h紀念sòng-hiong人」（加二10）。「賑濟sòng-hiong」是福音活動ê內涵，m̄是附加--ê。「賑濟sòng-hiong」是教會應有ê功能kap bē當逃避ê責任，因為教會喪失這款應該有ê功能，也kāng時喪失社會對伊ê認同kap肯定，致到教會tī表面上是真富有，有各種硬體ê設備，tī靈性上suah非常ê散赤，甚至淪落到一款ê企業機構。Tī組織上愈擴大，tī上帝國ê見證上，suah愈衰微。真tsē教會ê聚會，成做一款社交ê活動，無有見證ê氣力，也無傳福音ê功能，甚至hō͘ sòng-hiong ê人m̄敢踏入教會，因為in無社交ê本錢，因為in無一領khah體面ê西裝thang穿，hō͘ in擋bē tiâu教會ê冷氣設備。所以，當教會裡無sòng-hiong人teh出入ê時，教會就失去「sòng-hiong」ê本性，也失去見證上帝國ê功能，因為教會已經失去「傳hō͘ sòng-hiong人」ê福音。這kap耶穌所傳ê福音，有真大ê差別，所組成ê組織，也kap初期 ê教會無kāng款。保羅吩咐初期 ê教會，講：「今世好額ê人，lín吩咐in行好事，好額tī所行，歡喜賑濟，甘願分hō͘人，為tio̍h家己積聚好ê地基，備辦後來ê事，hō͘ in khîⁿ-tiâu真ê活命」（提前六18）。