《各各他e5目屎--苦難得安慰》

 | | | 轉寄

神蹟：分享交陪ê團契

作者 紀福讚 2006.05.14

「信ê人lóng共用所有ê，賣家己ê田產家業，照逐人所需要ê，分hō͘眾人.... . . ；無人講，這項物是我--ê，lóng是大家公用」（徒二44－45；四32）。初代教會這款無私ê生活方式，常常受引用做「社會共產主義」ê根據kap實行ê理想。甚至也有人認為這款共產ê生活方式，hō͘耶路撒冷ê教會變做真散赤，致到tio̍h接受外地教會ê救濟（徒十一29；羅十五25；林前十六3）。但是，有一項事實，就是「分享交陪」（koinonia,fellowship）是初代教會ê本質kap增長ê主要原因（徒二47），是一款神蹟，因為這是超越人ê本性ê(徒二43；五12－14）。

初代教會ê分享交陪（koinonia,fellowship）是出tī「疼」，m̄是出tī「鬥爭」。基本ê心態是「我ê也是你ê」，m̄是「你ê也是我ê」。基本ê動力是出tī「上帝kap聖子耶穌交陪」ê模仿（約十七10，21，26；約一書一3）。Tī使徒信經ê告白內，稱做「聖神ê相通」（koinonia，林後十三14；腓二1，the fellowship of Holy Spirit，聖靈ê感動）。這也是耶穌hō͘門徒ê新誡命：「我án-ni疼lín，lín也tio̍h án-ni相疼」（約十三34－35）。保羅用「互相做肢體」來說明這款交陪ê疼（羅八17，十二15；林前十二26；約十五5）。若有一個肢體受苦，所有ê肢體就kāng受苦；若有一個肢體得榮耀，所有ê肢體就kāng快樂。這款分享交陪ê團契，也就是咱所講ê「生命共同體」（communnity）。初期ê教會為tio̍h beh實踐這款性命ê共同體，外地ê教會捐獻來幫助in ê耶路撒冷母會。Tī教會生活裡，也實行這款tī經濟上互相支援ê精神。

這款ê交陪分享（koinonia)是超越人ê本性ê，致到有亞拿尼亞kap伊ê某撒非喇所面對ê試探kap慘局（徒五11）。保羅批判哥林多教會ê聚會是無tshái工ê，因為in bē當tī基本ê經濟活動－－食飯，有分享交陪ê本質。所以，伊解說耶穌聖餐ê意義講：「這是我ê身軀，為lín拍破ê，....lín tio̍h行án-ni來記念我」（林前十一25）。這是耶穌留hō͘教會上suí é Koinonia ê模樣。Tī保羅ê傳道生涯內，伊也受交付一個bē當無ê責任－－tio̍h照顧sòng-hiong人（加二9－10）。伊講，這是伊kap使徒中間ê彼此約束，是一款ê Koinonia，也是一款彼此認同ê標記。但是，使徒彼得並無照約束去實行，m̄肯kap外邦同信ê人kāng桌食飯，這是一款m̄肯koinonia ê暗示。所以，保羅無客氣批判伊。因為有koinonia，才會有同心合意（腓二11；徒四32），才會見證信徒（教會）ê一體性。Tī初代ê教會內，腓立比教會實踐了這款Koinonia ê精神（林後八1），tī in家己真欠缺ê時，猶原支援別間教會ê欠缺（林後八2）。所以，保羅稱讚in有耶穌基督道成肉身ê款式－－「伊本是富足，suah為咱成做散赤，hō͘咱因為伊ê散赤，會成做富足」（林後八9）。

Tī教會ê初期，耶路撒冷教會也實踐這款koinonia ê生活方式（徒二43－47，四32－35）。事實上，tī猶太人ê律例內，充滿了這款經濟均平ê精神，親像安息年ê豁免、拾穗ê規則、禧年時土地歸還原地主ê制度（申十五1，廿四19；未廿五10），lóng有這款koinonia ê特質。M̄-kú，tī猶太人ê歷史內，m̄-bat真正實行。所以，tī耶路撒冷ê koinonia是一款回歸上帝ê吩咐ê行動。這款互相交陪ê款式，吸引真濟人參與這個性命ê共同體（community）。但是，因為耶路撒冷ê客觀條件，hō͘ in 變做非常ê散赤，tio̍h依賴外地教會ê經濟支援（羅十五26，31；林前十六3）。啥物是這款外在環境ê因素neh？有幾項：飢荒（徒十一28），乞食濟（因為耶路撒冷是首都ê關係），拉比（使徒、教會領導者）是無財產、無生產ê群體。教會成做散赤人ê組合，欠缺經濟來源。M̄是koinonia所引起ê，反轉，因為散赤，所以koh khah需要有這款koinonia ê支持。就án-ni，教會吸引真濟散赤ê人kap有基督ê疼ê人加入這個共同體。

Koinonia ê款式，保羅稱做「聖靈ê相通」（林後十三14；腓二1），是人得tio̍h基督恩典kap上帝疼痛ê具體表現。教會是耶穌基督ê身軀（羅十二5；林前十二12，27）。信徒是聖靈ê殿（林前六19），也互相做肢體（林前六15）。若有一個肢體欠缺、受苦，所有ê肢體就同齊受苦；若有一個肢體得榮耀，所有ê肢體就同齊快樂（林前十二12）。這是初代教會成做一個性命共同體，tī經濟上互相贊助ê精神，m̄是出tī鬥爭、怨恨、搶奪，乃是出tī koinonia ê疼，是出tī同心合意ê結果（徒二46，四32；腓二2），是超越人性ê一款經濟神蹟，獨獨tī這款ê經濟分享經驗內，才會彰顯「聖靈相通」ê一體性，教會也成做基督地面上ê身軀，日日成長，是教會增長ê秘訣kap真正ê意義。