《各各他e5目屎--苦難得安慰》

 | | | 轉寄

關心散赤人

作者 紀福讚 2006.05.28

「關心散赤人」是宣道真重要ê部分，是教會完全bē-tàng推辭ê職責。教會bē-tàng因為建堂、經常費ê欠用，減少做「散赤ê關心」。因為伊m̄是「福音」額外ê事工，伊是福音內容ê一部份。對舊約ê傳統，耶穌ê傳道，使徒時代ê教會，聖經非常注重這款事工ê強調。但這個教會ê特質suah tī今á日ê台灣教會失落，特別是tī一寡kan-taⁿ teh注重教會增長ê教會，hit種商業性，注重數字無注重素質ê教會觀，完全忽略這種對散赤人ê關心。卻m̄知，教會若無散赤人teh出入，表示教會ê宣道方針已經m̄ tio̍h，是教會應當感覺「見笑」kap「檢討」ê時陣。若是建立tī聖經做基礎ê教會，的確會關心散赤人。

為啥物tio̍h關心散赤人？第一，這是聖經一貫ê命令。散赤人是耶穌傳道ê對象（路四18），伊家己也是一位散赤人（路九58）；散赤人是使徒傳道ê對象（加二10），使徒本身也是散赤ê傳道人（徒三6）。所以，見若無關心散赤人ê教會，真明顯是已經偏離耶穌kap使徒ê方向。路加十六章好額人ê結局是咱ê鑑誡，十九章撒該轉變ê模式kap意義、馬可十章富有ê求道者ê挑戰kap失敗，lóng是teh kā咱講ê話。巴拿巴ê模範（徒四36），使徒散赤ê款式（可十28），聖法蘭西斯ê自願散赤，咱可能遇bē tio̍h，但是咱至少會當親像扥爾斯泰做一個關心散赤ê好額人；印度ê索本主教hit種簡樸ê傳道生活、謝緯牧師kap散赤人做朋友，lóng是咱目睭前ê模範。近代基督教宣教ê對象偏向富有ê地區，卻是天主教khah有teh關心散赤人遇tio̍h ê無公義，這也是咱tio̍h三思ê現象。

第二，消除散赤是福音ê內容。耶穌來ê目的是beh消除散赤（林後八9），伊為咱成做散赤，hō͘咱成做好額。伊講：「Lín散赤ê有福氣，因為上帝ê國是lín ê」（路六20）。這句話m̄是ài咱成做散赤ê人，是咱tio̍h知若失去上帝國，無論外有錢mā是散赤。當上帝掌權，耶穌來臨是上帝國實現ê開始，祂ài咱獻家己ê身軀做活ê祭，做上帝忠心ê管家，照上帝ê旨意來管理世上ê財物，tī上帝國ê內面，人才會好額。所以無論是物質ê散赤（路六20）、心靈ê散赤（馬五3）lóng beh得tio̍h福音（路四18）。因為tī上帝國內面，心靈散赤ê富人就beh關心物質散赤ê人，hō͘兩種散赤ê人就lóng無散赤。這就是耶穌消除散赤ê方式，是福音ê內容。路加十九章，當撒該講：「我所有ê一半hō͘散赤人」耶穌講：「今á日，救恩來到這家」。撒該無心靈散赤ê時，耶利哥周圍ê人也無koh有物質ê散赤。路加十六章，財主ê愚憨，就是散赤心靈ê表現，結局是悲慘。

散赤常常是資源分配無公平ê結果，造成tsē-tsē ê不滿kap犯罪。台灣ê富人若koh bē曉關心散赤，出門可能tio̍h穿防彈衣、戴鋼帽，將gín-á鎖tī保險箱才會有安全感。會當自由出入ê空間會愈來愈少，親像關tī監牢。台灣一般人若m̄知心靈散赤ê事實，食毒、家庭破裂、酒醉、高血壓中風ê人會愈來愈濟。獨獨會曉去關心散赤人，才會肯定家己ê富足來得tio̍h喜樂。保羅講：「這是一種ê互相補足，好額人無tshun ê麻煩，散赤人也無欠缺ê艱苦」（林後八15）

第三，關心散赤是借錢hō͘上帝（箴十九17），是積財寶tī天--ni̍h（路十二33），是做tī耶穌基督ê身上（太廿五40）。耶穌講：「Tsiah-ê事，lín既然做tī我這個兄弟中最微細ê一個，就是做tī我ê身上。」親像德蕾莎修女講--ê，我看tsiah-ê散赤人做寶貝，因為這是我做tī主耶穌身上ê機會。關心散赤人是教會服事基督ê機會kap途徑。服事主m̄是用好聽ê管風琴á是詩班，m̄是用銀ê聖餐杯，m̄是參加各種ê聚會；tī上帝，咱ê父ê面前，hit-ê清氣無瑕疵ê虔誠，就是看顧tī患難中ê孤兒寡婦（雅一27）。上帝所揀選ê禁食是分餅hō͘ iau餓ê人；將漂流ê散赤人，接到厝內，憐憫in親像骨肉之親。Án-ni人家己會得tio̍h醫治，家己ê烏暗會變成光明，hō͘困苦ê人滿足，憐憫iau餓ê人，家己也beh得tio̍h滿足。當教會有關心散赤人ê時，上帝才真正tī咱ê中間，也tī hiah-ê散赤ê人ê中間。

台灣ê財富是m̄是會帶hō͘台灣人快樂kap幸福，á是災難kap腐敗，在tī是m̄是咱有將tsiah-ê財富分tī散赤人ê身上；若親像富人起穀倉想beh家己享受，只會帶來喪失性命ê災禍（路十三）。若kan-taⁿ親像富人用tī食、lim、pua̍h、穿、奢華，結局是墜落tī陰間，心靈ê朽爛。

今á日ê教會是m̄是也tī富有ê危險中間？教會kám是變做好額人ê教會，hō͘金錢腐化？是m̄是親像受掠以前ê以色列祭司，食kah腹肚大大，卻無上帝ê話語thang hō͘百姓？「禍哉！以色列ê牧人，只知影牧養家己，食好、穿好，. . . . . . 肥羊，suah無飼養羊群。瘦kap軟弱ê，無飼hō͘勇；破病ê，無醫治；受傷ê，無包」（結卅四1~4），tsiah-ê先知ê提醒咱m̄知有聽tio̍h無？