《各各他e5目屎--苦難得安慰》

 | | | 轉寄

Tuà別莊ê禪師－－宗教企業化ê迷失

作者 紀福讚 2006.07.23

最近台灣宗教掃烏，掃tio̍h ê人lóng是李登輝ê厝邊－－鴻禧山莊ê tuà戶。這也是台灣宗教界ê怪現象，禪師m̄是tuà tī廟寺，隱居山林，乃是tuà高貴ê別莊，結交政客、商家，作伙享受台灣「錢淹腳目」ê奢華。

宋七力ê宗教詐財團體，tī短短ê五年久ni̍h，招募會員幾若千人，吸收幾若十億ê獻金，出入有高貴ê轎車代步，tuà總統套房，食山珍海味，舞廳、酒家、天天醉，夜夜春，竟然連平素有政治智慧ê名人、有學識ê教授、有社會經驗ê企業人士，lóng落tī in ê圈套，憨憨tuè in行。Tī半年久，中國人也tuè流行，有二萬個信徒，百萬美金ê香火，落tī in ê lak袋á內。

妙天禪師（黃明亮）ê印心組織，tī二、三年久ê發展，有十萬個信徒參與經常ê「禪座」活動，有二百個以上ê禪學社，koh計劃tī五年久ni̍h，beh成立三百個道場，招募一百萬信徒。這款組織上ê增長，比起教會所謂ê「9025」、「2050」、「倍加運動」、「二千年福音運動」ê教會增長，m̄知有juā濟倍ê差別！M̄單是án-ni，in ê信徒有算bē了ê教授，koh有算bē出ê政府高層官員。In所募集ê財源，也是教會做夢（異象）都夢bē tio̍h ê。

Tī tsiah-ê所謂「知識份子」、「領導階層」，睛暝 eh崇拜、跟隨ê時，惟一khah有眼光ê群體，竟然是所謂ê「烏道」，看破in ê腳手，tu̍h破in ê「雞歸」，hō͘ in bē當koh「亂啼」，koh kā in khah油幾若千萬，是惟一ê社會受益者。

這款宗教騙局ê tuh破，有幾項值得咱深思--ê。

第一、台灣人心靈ê空虛kap方向ê迷失。台灣知識階層流行「參禪」、「研讀佛經」、「出家」，這kap烏道侵入股市、政治，色情侵入社區，tú-tú是極端ê對比，是一款消極性ê抗議，也是儒家明哲保守ê做法。但是，另外一方面，也表現出in對現實社會責任ê逃閃，m̄敢面對現實社會付出改革、犧牲ê勇氣。這款對政治冷感，suah對宗教熱狂ê行為，是一款迷失家己ê表現，也是五十年代至八十年代，海外ê知識份子一直想beh突破ê台灣環境ê限制kap歪曲ê心態。

第二、宗教企業化ê迷失。幾若年前，美國ê電視佈道家貝克詐騙信徒ê奉獻，沉迷tī女色，最後進入監牢。當紅ê時，出入坐私人ê飛機，利用電視發展「造神詐財」ê宗教企業組織。台灣目前ê宗教亂象，也是這款模式ê翻版。幾若年前，高雄佛×山ê發展，也是一仙一仙ê「接引佛」，kap一蕊一蕊ê「本命燈」ê捐獻起家。所採取ê企業經營路線，kap宋黃組織並無真大ê無kāng。In所標榜ê「宗教入世」，最大ê特色，就是用企業組織發展ê方式來經營宗教團體。這kap北美某一個教會團體經營ê路線，有仝款ê所在。注重「業績」ê考核，用「廣告」吸收信徒，用「董事會」、「理事會」掌權策劃組織ê發展方向kap進度。「宋七力」、「妙天禪師」ê造神kap創造神蹟ê走向，也是這款教會所強調--ê。這款宗教企業化ê流行，有樣學樣，造成宗教亂象。將宗教ê發展看做是一款企業ê投資，致到「禪師tuà別莊」、「和尚家財萬貫」、「老父傳hō͘子兒」、「廣告取代謙卑ê見證」、「注重siâⁿ kap聖」，lóng是自然發展ê結果，是一款人性ê迷失。

第三、簡樸ê生活是救命ê特效藥。台灣因為beh維持某一個程度ê奢華生活，致到犧牲生態環境，屈就經濟發展，甚至犧牲台灣人ê尊嚴kap生存ê安全，去kap中國人做生意，以商迫政。這款奢華ê價值觀，忽略基本ê道德心，致到宗教失去潔淨心靈ê功能，反轉受金權控制。廟寺、教會、神壇講經說教ê最後目標，m̄是beh清氣人心，推廣教義，乃是「發展組織」、「起大ê建築物」、「發揮領導階層ê權力」。為tio̍h beh滿足tsiah-ê基本需要，「財利」常常是宗教團體所bē-tàng抵擋ê引誘。「siâⁿ」ê宗教ê外表現象，就是奢華ê建築物ê競賽，是「好人才」ê吸收、「官商關係ê通達」，suah真少用宗教淨化人心ê功能來做評價。濟濟詐財ê神壇，就利用這款「奢華ê心態」，來引人進入圈套。用明星、政客做廣告，假造神蹟來欺瞞群眾，達到詐財ê目的。

所以，獨獨提倡簡樸ê生活，才會改變台灣ê困境。「禪師無koh tuà別莊」、「和尚無koh結交官商」、「教會無koh企業經營」，hō͘宗教回復原來純樸ê本質，才會tàng淨化台灣人ê心靈，抗拒「奢華」ê引誘，也才會帶hō͘台灣人安全kap尊嚴。