《各各他e5目屎--苦難得安慰》

 | | | 轉寄

散赤ê奢華

作者 紀福讚 2006.08.20

1995年春天，tī散赤ê印度suah有全世界尚奢華ê婚禮。有200台卡車ê玫瑰花kap茉莉花舖tī一條5哩長ê道路，hō͘新郎坐ê馬車行路。馬車是由6隻阿拉伯高貴ê馬拖--ê。有30萬個人客參加宴席。宴席是由3500個廚師所tshuân- -ê。Tī佔幾若甲ê所在舉行宴筵，四周圍佈滿吊燈ê燈飾，用幾若十萬ê美金來放煙火。婚禮ê開銷是3200萬美金，tī散赤iau餓ê所在，這款ê奢華，是經濟kap道德上ê浪費。

中國是世界khah散赤ê國家，濟濟人tī iau餓中，tio̍h靠其他ê國家救濟援助。但是，中國人ê收入ni̍h，食薰ê錢佔個人收入ê 60％，佔家庭收入ê 17％。中國查埔人食薰ê比例是67％，所以tī中國，tio̍h肺癌ê比例，每年增加4. 5％。尚不幸ê是，個人收入愈低ê人口，食薰ê比例愈高，這真正是散赤人ê浪費。

Tī日本時代，台灣禁止種檳榔kap食檳榔，但是hō͘中國政權統治，食檳榔ê人口快速增加。目前，食檳榔ê人口有200萬。1994年，台灣人平均每人食800粒檳榔。tī食檳榔ê人口裡，兼有食薰--ê，有80％，lim酒ê，佔75％。In致癌ê機會是一般人ê 123倍。Tī 20年後，台灣tio̍h ài付ê醫療代價會真驚人，因為口腔癌ê潛伏期是10－30年。這是另外一款精神文化散赤ê浪費。

阿摩司看tio̍h社會經濟ê無公義kap資源ê浪費，伊感慨講，「飢荒m̄是因為無餅，嘴乾m̄是為tio̍h無水，就是因為無thang聽耶和華ê話。」（摩八11）。Tī耶穌變餅ê故事ni̍h，伊用5塊餅兩尾魚飼五千iau餓ê人，伊命令門徒講：「將食tshun ê幼碎khioh起來，免得浪費」（約五12）。結果，拾有12籃，所tshun ê比原來有ê khah tsē。

台灣苗栗一位83歲ê老婦人人，最近（1995年）捐出市價達六千萬ê一千坪土地，hō͘縣政府起老人安養中心。伊一生m̄-bat掛過金飾，一生勞苦，割豬菜，做炭工，擔豬屎種作，將所儉ê錢所買ê一塊土地，捐出來做社會福利ê路用。這就是五塊餅二尾魚ê奉獻精神，是一款散赤中ê富足kap節儉。「將食剩ê幼碎拾起來，免得浪費」。