《各各他e5目屎--苦難得安慰》

 | | | 轉寄

生tī憂患，死tī安樂

作者 紀福讚 2006.09.17

古早ê俗語：「生tī憂患，死tī安樂」，伊所表達ê意思有兩項：第一，tī憂患ê意識中會產生性命ê勇氣kap氣力；倒píng，tī奢華ê安樂中，會帶來死亡kap價值ê幻滅。第二，tī憂患中奮鬥ê性命才會享受安歇ê意義，創造出真正ê安歇。這句俗語ê真實，表現tī今á日台灣宗教現象，也表現tī今á日台灣ê社會生態。

台灣今á日濟濟ê病態，就是誤用財富，追求功利ê價值觀所造成ê。譬如選舉ê買票會當五億、十億teh 開，這m̄是表示選票ê價值增加，人人重視家己擁有ê權利。反轉是出賣家己ê良心，看見買票ê「錢」，無看見「貪污、弄權」ê損失。各種犯罪性ê娛樂，hō͘台灣ê社會風氣愈來愈敗壞。對國外倒轉去ê同鄉，lóng會感受tio̍h台灣生活ê奢華，但是物質豐富，精神生活ê層面非常散赤。財富無用來解決社會ê問題，反轉增加犯罪kap 社會問題。目前tsē-tsē台商去中國投資，帶來ê，m̄是幸福，suah是家庭ê破裂；tsē-tsē家庭無閒teh趁錢，帶來ê結局是gín-á無人照顧，出去食毒，尋刺激。錢趁tio̍h，家庭無去，向望消失，享受bē tio̍h天倫之樂；財富成做犯罪ê工具，無帶來幸福。甚至連人間心靈寄託ê宗教，也是受tio̍h這種財富ê誤用污染，尚典型ê，就是佛光山ê興起。

台灣新宗教ê「入世」觀念，m̄是指積極參與社會ê改造，乃是參與現實社會「搶錢、搶資源、搶權利」ê行列，將宗教信仰商業化，將起廟、起禮拜堂當做一種利益ê投資，親像一般事業ê經營仝款。若是會「趁名利」、製造「形象」ê，就親像一陣風，大家相爭趁「流行」；若是為「真理」、「永恆ê價值」ài逆潮流來犧牲ê，就用各種藉口來推辭。譬如教會增長ê評估是按照人頭來算，按照一年有偌tsē奉獻（香火）來估計，suah m̄是用實踐偌tsē信仰做憑準。Tsē-tsē參與宗教活動ê人in ê目的，是beh得tio̍h名聲，提高地位、影響力kap暗中ê權益。Tī這種主流ê宗教勢力裡，憂患意識成做事業發展ê塞礙，是「無信心」ê表現。只有提倡安樂、享受ê觀念，親像商品ê現實利益，才會吸引人來參加，所強調--ê，無koh是「犧牲」、「受苦」、「禁慾」，乃是「快樂」、「爭取」、「縱慾」，甚至講是「進步」、「開放」、「效率」。莫怪一寡主流ê宗教，人數愈來愈少，這是中tio̍h今á日「民主制度ê毒素」－－認為多數就是「tio̍h」kap「真理」ê錯誤觀念。

Tī社會生態裡，咱看會tio̍h政治鬥爭也是仝款。為tio̍h beh選贏，不擇手段，不管烏白、是非，只要「多利」就去做。致到今á日「烏道」、「利益團體」控制台灣ê政治發展。若無改革，我想真緊就墜落「軍閥」、「財閥」、「烏閥」ê控制，hō͘台灣ê政治愈來愈烏暗。這是一種財富誤用ê典型。Tī台灣，這種現象suah愈來愈正常化，連總統都會辯護講：「有錢，m̄是罪惡」，來teh騙家己、騙民眾。若比較韓國ê發展kap改革，台灣是一種病態ê發展，會行向菲律賓一夜變散赤ê地步。韓國教會kap社會tī五十年代日本帝國壓迫ê下面，當時ê教會khiā tī真理信仰，kap惡勢力鬥爭、流血，造成今á日韓國社會正確ê宗教生態。今á日韓國教會受群眾認同，急速teh發展，創造新ê文化，但是台灣ê教會suah急速teh受功利主義ê污染，宗教成做投資ê事業teh經營，失去先知ê角色kap潔淨社會ê氣力，失去宗教ê本質kap功能，致到台灣ê風氣愈來愈敗壞。無法度「生tī憂患，死tī安樂」ê社會，tú-tú親像聖經中以色列ê社會，假先知、祭司、無能ê宗教領導者家己食kah飽飽飽，煞喪失聲調傳上帝信息ê能力。

台灣人今á日若beh活了有尊嚴、有盼望，唯一ê道路就是抗拒經濟kap功利物質主義負面ê發展。敢向中國ê經濟引誘講「m̄！」，活出台灣人ê骨氣，記得歷史上受欺壓ê教訓。提倡生活ê樸素，m̄若政治有獨立ê覺醒，tī經濟上也會有獨立ê覺醒。若kan-taⁿ注神tī中國ê市場，喪失做自主台灣人ê尊嚴，就永遠無出頭天ê日子。這是草地人ê掛慮kap苦藥忠言。