《各各他e5目屎--苦難得安慰》

 | | | 轉寄

受棄sak ê彌賽亞

作者 紀福讚 2005.12.25

Tī馬可福音書，咱會讀tio̍h一個不斷teh重覆ê主題：受棄sak ê彌賽亞。這是馬可福音作者寫作ê目的。伊想beh回答hit-ê當時受掠、受迫害ê教會一個oh tit理解ê問題：為啥物hit位行過濟濟神蹟ê上帝ê kiáⁿ，伊ê結局是受棄sak，受釘死？這款ê彌賽亞kám有值得咱跟tuè信靠？耶穌悲慘ê結局，kám是hiah-ê跟tuè ê門徒（教會）必須tio̍h行ê途徑neh？這款受棄sak、受苦、受難ê信仰生活實在ê模式，是m̄是一款做耶穌跟tuè者ê命定neh？

Tī馬可福音咱看tio̍h耶穌hō͘人棄sak ê過程：hō͘親人誤解棄sak（6：6）；hō͘同鄉棄sak（6：6）；hō͘門徒棄sak（14：50，71）；ho͘群眾棄sak（15：14），最後若親像也hō͘上帝棄sak（15：34）。耶穌喝講：「我ê上帝，我ê上帝，為啥物，連你也棄sak我？」這款受棄絕ê款式是hiah-ê tī主後65年，受羅馬皇帝尼羅迫害ê教會ê遭遇。Tī hō͘獅á拆食落腹、hō͘火燒、受釘死、hō͘人關監ê情景下面，教會若親像是hō͘上帝棄sak。這也是當時寫作馬可福音書教會ê背景。受迫害ê教會一直teh質問ê神學基本問題：為啥物，阮跟tuè耶穌基督，會遇tio̍h tsiah-ni̍h淒慘ê結局？馬可作者ê回答是講：「請來看耶穌ê款式！耶穌ê受苦若有向望，咱ê受苦就bē空空tio̍h磨。」Tī馬可10：28，彼得講：「阮已經放下所有ê來跟隨你，阮會tàng得tio̍h啥物？」耶穌回答：「Lín為tio̍h我kap福音....beh受迫害...」（10：30）。馬可koh描寫一幅門徒將來ê情境：「in行路，上耶路撒冷。耶穌tī頭前行，門徒稀奇。跟tuè ê人也驚惶。耶穌講，我所lim ê杯lín也beh lim，我所受ê洗，lín也beh受。」（10：32，39）

啥物是耶穌所受ê洗？馬可作者用耶穌ê受洗，開始一幕「彌賽亞ê秘密」ê戲劇。耶穌受洗ê時，有天頂ê聲音講，「你是我所疼ê kiàⁿ，我kah意你」（可1：11）。

Tī洗禮中伊承受「受難（掠）ê彌賽亞」ê職責（參考詩2：7，賽42：1）。祂是上帝ê kiáⁿ，也是上帝受苦ê奴僕（徒3：26）。這個授職只有耶穌聽見，經文上是「你是...我kah意你」。這款ê授職，也就是「彌賽亞ê秘密」。Tī變貌ê山頂，向耶穌 ê門徒宣佈。Tī hia，有天頂ê聲音講：「這是我所疼ê kiáⁿ，lín tio̍h聽伊」（可9：7）。Tī tse以前，耶穌lóng禁戒門徒（8：30，9：9），禁戒受醫治ê人，甚至污鬼，m̄-thang宣揚、暴露伊ê身份（可1：34，44；3：12；5：19，43；7：36），m̄-thang暴露伊彌賽亞ê秘密。直到耶穌受釘十字架，斷氣ê時刻，馬可作者才藉tio̍h十字架下ê嘴，向世間人宣佈講：「這人真正是上帝ê kiáⁿ」（可15：39；9：9）。

馬可作者用這款戲劇性ê「彌賽亞秘密」beh來解說「為啥物上帝ê kiáⁿ會hō͘人棄sak、受釘」，乃是世間人m̄ bat耶穌真正ê身份。耶穌ê受棄sak，連耶穌ê門徒lóng bē瞭解（可8：27－33，9：10－12，32）。雖然耶穌不斷teh更正in對彌賽亞ê期待kap看法，明明指出彌賽亞beh受苦、hō͘人棄sak，in iáu是憨訝（10：32－45），kan-taⁿ相爭beh做大，beh坐高位。耶穌講：「Lín m̄知所求ê是啥物。」In要求「tī耶穌ê榮耀內，會tàng坐tsiàⁿ旁、坐tò旁」，但是，事實上，耶穌ê榮耀是耶穌ê受釘十字架（參考約12：23，6；13：31－32；11：4）ê時刻。所以，耶穌預告講：「我lim ê杯，Lín beh lim，我所受ê洗，lín也beh受」（可10：39；14：36；羅6：3）。使徒保羅明顯指出，「基督ê洗」就是「耶穌基督ê死」，也是進入榮耀ê路途，這條路是每一個跟tuè ê門徒會身經歷--ê。(可13：9－13；8：34－38)

所以，「跟tuè」是馬可福音常出現ê字眼。耶穌講：「來跟tuè我。」（1：17；8：34；10：21，28）有人想beh跟隨耶穌，總是放bē落富有ê財產（10：21－22）；有人放下所有ê來跟tuè（10：28），但是對所跟tuè ê並無夠額ê瞭解，所以心存驚惶（10：32；16：8）。彼得三擺m̄認主，是in面對受掠威脅ê典型反應。也有真濟門徒逃命（14：50－52）。

所以，耶穌預告講，「若有人beh跟隨我，就tio̍h無家己，背伊ê十字架來跟隨我；凡若beh救家己生命ê，beh喪失生命；凡若為tio̍h我kap福音來喪失生命ê，必救了生命」（可8：34－35）。跟隨耶穌tio̍h面對邪惡ê挑戰，參與耶穌kap撒旦（不義）ê戰鬥。跟tuè耶穌m̄是成做一款宗教信仰上ê裝thaⁿ，乃是tio̍h付出生命ê代價。這款「跟tuè」ê認知是耶穌門徒真oh理解--ê，m-koh卻是生活ê事實。Tī主後60年代，尼羅皇帝ê迫害，hō͘ in kap 耶穌kāng款，tio̍h放捨生命，成做眾人ê贖價（可10：45）。這款跟tuè ê kún-kà，馬可作者用客西馬尼園ê祈禱做了最深刻ê描寫。耶穌是in kún-kà ê模樣－－心內憂傷，強強beh死。求告天父講，「若肯，請將這個杯提去，但m̄是照我ê意思，是照你ê意思」（可14：36）。耶穌ê受掠是門徒受掠ê預告；耶穌ê受審，也是門徒受審ê翻版；耶穌ê受釘死，也是門徒面對ê命定。In所bē瞭解--ê，就是「彌賽亞為啥物會受棄sak？」「咱為啥物tio̍h受tsiah-ê苦難？」馬可作者ê結尾講，「in就出來，對墳墓hia逃跑，真驚奇，也m̄敢kā人講，因為心內驚惶。」（可16：8，按照khah可靠ê古代聖經抄本，可16：9－20，是後代ê抄者附上ê)

「神蹟」也是馬可福音常常出現ê主題。Tsiah-ê神蹟包括趕鬼、醫病、變餅、平靜暴風雨。（1：21，29，40；2：11；4：39；5：2，25，35；6：34；7：31；8：2；9：22；10：46）但是，tsiah-ê神蹟並無hō͘ in認識耶穌真正ê彌賽亞身份。（可8：11；6：3；8：21；參約2：23）親像馬可8：29，彼得有講：「你是基督（彌賽亞）」，但是耶穌卻禁戒in m̄ -thang kā人講。耶穌甚至責備伊講：「撒旦，退去我ê後面」（8：33），因為伊心中所存ê彌賽亞意念m̄是耶穌所想ê「受苦ê彌賽亞」。神蹟並無tshuā人認bat耶穌，獨獨tī hit款無神蹟出現ê所在....十字架，才真正表明耶穌ê彌賽亞救贖ê身份。這是另外一款ê神蹟，莫怪保羅講：「我無beh傳神蹟、傳智慧，是beh傳釘十字架ê基督。」（林前1：23）馬可15：29－32，表明十字架是無神蹟出現ê所在。這款期待神蹟ê心情，是受迫害ê教會所期待，是門徒受掠、受釘ê時所向望ê，所想beh見證--ê。(15：32）但是，馬可清楚指出，「十字架是無神蹟出現ê所在」，是跟tuè ê人惟一ê命定。藉tio̍h「神蹟」並無tháu放所有撒旦ê sok-pak，只有通過「十字架ê受苦」，才thang向撒旦誇口。（林前15：55－57）

所以，tī馬可福音書裡，並無耶穌「神性誕生ê故事」（親像路加，馬太），也無提tio̍h「耶穌kap上帝同等」（約翰），甚至無耶穌復活顯現ê記事（只有空墓ê描寫），也無受高舉、受榮耀ê基督ê描寫。伊所強調ê「受棄sak ê彌賽亞」，真清楚指出「這是耶穌基督福音ê起頭」（可1：1），koh講：「若有人ài tè我，就tio̍h無家己，giâ伊ê十字架，來tè我。」（可8：34）。