《各各他e5目屎--苦難得安慰》

 | | | 轉寄

踏tī別人頭殼頂ê朝聖

作者 紀福讚 2006.01.08

按照報導，一九九四年五月廿三前往麥加朝聖ê群眾，因為相爭beh過前往米那（麥加市郊5哩）ê窄橋，hō͘相踏死--ê人，今年是829人，比起一九九○年朝聖季節死亡1426人，算是khah無hiah嚴重--ê。雖然沙烏地阿拉伯政府當局，開費數百萬興建pōng-khang、陸橋、拓寬道路，但因為相擠死傷送去病院醫治--ê，今年是6400人。沙國國王法德也o-ló朝聖部ê部長夏法，每年朝聖辦了真成功，因為有250萬人前往麥加朝聖。一年死一仟人算是小khuá代誌！按回教ê教義，聽講死tī朝聖路上ê教徒，會當直接進入天堂，所以tī朝聖ê過程受踏死，算是福氣。

這是一種偏激ê宗教熱狂，m̄是通常ê倫理判斷會當解。為tio̍h朝聖，踏tī別人ê頭殼頂，竟然無罪惡，koh講是「幫助伊上西天」。這種擴大家己權益ê合理性kap神聖性ê論調以及漠視群眾生命ê心態，是khiā tī宗教情結外面ê人，所bē當瞭解。親像二年前美國德州大衛教派ê悲局，為tio̍h堅持家己錯誤ê信仰，無顧濟濟人ê性命，高舉家己ê使命感kap神聖，忽視多數群眾ê判斷。這種論調kap心態，tī今á日ê台灣社會kap教會也常常teh發生。

譬如今á日台灣核能發電ê講法。濟濟企業家kap政府官員，聲稱這是為tio̍h台灣經濟發展ê命根設想，是政府既定ê政策，bē當改變。koh講核能發電是百分之兩百ê安全，是親像「抱查某睏一樣」。李登輝也講：「核能廢水會當洗溫水身軀。」這lóng是為tio̍h家己ê政治權益，無摸心肝講出來ê「痟話」。無顧千外名專家ê聯名請願，也m̄管當地百姓ê公民投票96%反對，無看幾萬人行街頭抗議，只注神tī家己ê權益，看做是bē-tàng hō͘百姓接近ê『圖騰』，這種踏tī別人頭殼頂ê朝聖，hō͘人會「起痟」。

但這是m̄是國民黨ê專利？M̄是！今á日，民進黨對「省長選舉」ê講法也是kāng款。認為這是民進黨既定ê決策，是bē改變ê。無管伊ê正確性、影響如何，lóng beh參選。甚至看做是民進黨ê歷史使命，是三十外年ê努力目標。這是m̄是也是kāng款ê心態？擴大、膨風家己ê權益，看做是神聖、bē當侵犯ê『圖騰』，是踏tī別人頭殼頂ê朝聖？將對方kā踏hō͘死，hō͘家己浮高，這是中國自古以來ê鬥爭文化，但今á日tī台灣ê政治、社會，卻逐日teh重演。

Tī宗教界，咱會常常看見教會搶羊，廟寺搶資源ê競爭，也是kāng款。將競爭ê對象kā踏hō͘死，來膨脹家己，獨佔資源kap市場。標榜家己是真正ê宗教，是正統ê教會，是屬靈ê群體。家己ê教派增長，組織擴大，影響力hō͘人注目，但清氣台灣心靈ê教義kap氣力消失，宗教原有ê特質kap功能，hō͘經濟利益所取代，這kám m̄是阿拉伯官方所採取ê心態？朝聖ê意義，是官方有偌濟經濟利益做前題，來修改宗教ê教義。M̄管踏死偌濟人，lóng成做其次ê。

宗教ê熱狂，若bē-tàng提昇人ê心靈，擴大群體ê利益，造福人群kap後代，這種熱狂是無tshái工ê。親像迎接耶穌進入耶路撒冷ê群眾，有一工，發見bē-tàng達到家己ê利益，就喝講：「釘伊tī十字架，釘伊tī十字架。」親像耶穌ê門徒問講：「主ah，你復興以色列國，koh偌久ah？」這是這種宗教感情ê期待。親像台灣教會濟濟人期待聖靈ê飢餓一樣。但耶穌回答講：「聖神降臨tī lín ê身上，lín beh得tio̍h氣力. . . . . . 做我ê見證。」（徒一8）聖靈充滿ê目的是啥物？Kám m̄是beh做見證mah？Kám m̄是beh造就人mah？親像耶穌講：「主ê靈tī我ê身上. . . . . . hō͘我傳福音hō͘散赤人. . . . . . hō͘受壓制ê得tio̍h自由. . . . . . 」（路四19）聖神充滿ê目的，kám m̄是beh做復活ê見證mah？Kám m̄是親像保羅講ê:「原來基督ê疼激勵咱，hō͘咱無koh為家己活，乃是為替咱死來復活ê主來活。」（林後五14-15）。

朝聖，m̄是踏tī別人ê頭殼頂，m̄管競爭對方ê死活，是beh提昇家己ê心靈，會tàng親像耶穌ê款式，kap弱勢群體鬥陣，kap散赤人作伙，kap受關監ê做朋友，來彰顯上帝ê公義kap主權，見證上帝ê疼iáu tī tsiah-ê困苦人ê中間。親像雅各書所講--ê:「tī咱ê父面前，hit-ê清氣、無瑕疵ê虔誠，就是看顧患難中ê孤兒寡婦，而且保守家己無沾染世俗。」（雅各一27）