《生活e5台語，台語e5生活》

 | | | 轉寄

M型社會下基督教事工策略省思

作者 陳鳳翔 2007.11.18

中產階級ê崛起，不過是tsit兩、三百年ê事。十八世紀中葉工業革命了後，tsiah漸漸phah破貧富貴賤兩造極端ê社會型態。工業革命造成銀行家、工商業者、律師、醫生、工程師、教授、小店主、公務員、藝術家……，in構成了tsit-ê新興ê社會階層。Tsiah-ê人ê成功是因為自身ê努力，以及社會ê變遷所造成。In具有專業能力、ē-tàng獨立謀生，kap hiah-ê靠微薄工資為生ê工、農人無仝。君主政體ê瓦解kap民主制度ê建立，mā thang講kap tio̍h中產階級ê崛起，有真大ê關係。

M̄-koh如今全球競爭化財富重新分配，經濟活動造成ê社會型態倒退，hō͘真無簡單tsiah嶄露頭角ê中產階級，竟然漸漸消失。日本學者大前研一指稱tī當今全球競爭下，中產階級漸漸淪落到中下階層，ná親像英文字母「M」仝款，tò-pîng ê sàn-tshiah人pianze 變tsē，正pîng ê富人mā變tsē，中產階級消失，就是「M型社會」。日本已經有八成人口，淪入中低收入階層，á美國比日本koh-khah早步入M型社會，台灣當teh行向M型社會。

「中產階級消失」對台灣人民生活方式帶來ê影響，有真tsē例顯見。數一數二ê知名劇團果陀，面臨經營kap票房上ê困境，劇團導演呼籲政府有關單位應對文化團體有補助機制kap扶植計畫。慘淡經營ê劇團並m̄是只有果陀，其他頂港有名聲下港有出名ê知名劇團mā lóng teh度寒冬，講到基督教劇團，亞東、天藝、晨星、烏門山頂ê劇團…，則雪上加霜。這to̍h是teh說明了M型社會ê來臨，對藝文產業造成ê威脅。

藝文產業蓬勃發展，原kap中產階級崛起帶有密切bē-tàng分割ê關係。Tī十九世紀以前，藝文工作者服務ê對象是社會ê上流階級，繪畫、音樂、寫作是為tio̍h滿足tsiah-ê人。到了中產階級興起，成做藝文ê新觀眾，藝文tsiah行出貴族殿堂，大都市tuì án-ne有了公共ê音樂廳、歌劇院、博物館、圖書館。但如今，中產階級漸漸漸漸淪落到sàn-tshiah ê下階層，無夠額ê經濟能力來進行文藝賞析活動，只tshun金字塔頂端ê少數有錢人有能力，自然藝文團體會面臨經營瓶頸。

對tī一般人來講，食衣住行育樂，tī收入變少，或大環境物價上漲但薪水無漲tsit種變相減薪ê情況下，會先刪減ê預算，khah大面tuì「樂」開刀。The̍h視覺享受來講，看現場表演tio̍h開ê錢siōng tsē，就改看電影；首輪院線片看bē起，就看二輪，甚至tī厝租影片，或是收看第四台電影頻道。

Ē-tàng預見繪畫、音樂、寫作、攝影、舞蹈、雕刻ê等相關八大藝術文化產業，若M型趨勢繼續延燒落去，無久結局會面臨重新洗牌。Ná親像十幾年前，台灣經濟繁榮，各家傳媒林立。以出版社為例，koh-khah是tsē到台灣每月出冊量以萬為計。但，當M型社會來臨，購冊ê主流群體—中產階級經濟能力降低，m̄是無買bē-sai2e5冊，就會改為去圖書館借冊，小型、經濟困窘ê出版社，自然會應聲先倒。觀察敏感局勢ê團體，早to̍h構思如何針對tsit-ê M型社會現象，來重擬獲利策略。

加上，這是一個「全有，不然就全無」ê競爭時代。Ná親像搜尋引擎，一般網友kan-ta會知影google kap奇摩，而bē曉/buē/bē知影第三名以後ê搜尋引擎。Mā就是任何一項產業，若做未到前三名，就無juā有生存立足之地。M型社會則hō͘ tsit-ê情況koh-khah明顯，若m̄是前三大ê團體，大概lóng oh得支持落去。

對tī教會界，各種教會機構ê奉獻收入，主要mā來自中產階級。M型社會ê來臨，thang預見整體ê奉獻（以十一奉獻來估算）mā會跟tuè漸漸變少。Tsiah-ê奉獻分配到各項事工，ē-tàng想像以藝文等福音事工方式ê機構，會是第一波面臨奉獻不足困境ê，ná親像頂面所講ê福音劇團。社會救助類ê機構，其次。教會應該是到最後tsiah受tio̍h衝擊。

Tī整體教會界資源有限、並可能跟tuè中產階級消失而jú來jú緊縮ê情況下，各種教會機構（音樂、文字出版社、劇團、社會公益救助…）應該tio̍h嚴肅來進行思考，家己存在ê意義kap價值。是m̄是自身存在帶有其他機構無法度取代ê獨有特殊意義？á是目前ê存在，kan-ta只為tio̍h證明家己有法度，卻是浪費整體神國資源？若是後者應該謙卑來考慮退出，hō͘其他同性質ê主內機構會得thang取得夠額ê資源，繼續為主奮鬥。

M型社會究竟kám bē遍及台灣，bē-uē確定。但是tī外面社會ê資源重新分配iáu無來臨tsìn前，教會界應該以耶穌ê心為心，先行智慧來對教會資源進行整合。若準想beh家己創立詩歌音樂出版社者，不妨加思考是m̄是ē-tàng借助現有ê音樂出版社力量達到仝款ê目的？各樣傳媒（文字廣播、電腦電視）機構，是m̄是有合併ê必要？

目前台灣社會大多數ê人，當teh為tio̍h油價kap各樣民生物資價格猛漲所苦，民生問題siōng重要，娛樂活動放一邊，lóng已經學會曉kā資源khǹg tī刀口。Ná親像陳水扁總統最近參加台北音響影視大展開幕活動，便遭民眾嗆聲：「人民kiōng-beh活bē落去lah！」教會資源運用，也tio̍h有宏大ê普世教會觀，以基督為首，百體聯絡得合宜，紮實來將資源用tī上帝所喜樂ê所在。

Tī tsit-ê艱困ê時tsūn，為家己ê存在大聲疾呼奉獻、發動連鎖禁食祈禱，可能並m̄是siōng要緊ê項目，卻是beh先為家己祈求擁有上帝國度ê眼光，tsiah bē致使tîng-tâⁿ因應M型社會將bueh帶來ê嚴峻考驗。