《生活e5台語，台語e5生活》

 | | | 轉寄

終結威權陰影，發揮台灣歷史正義

作者 王辰光 台北二二八紀念館 志工 2007.12.02

台灣，我真是好字運，活tī何等民主ê時代，但是我也bat被威權ê「領袖教育」洗腦過。會記得細漢ê時tsūn，tńg去厝裡向爸爸討tio̍h一百元，買ㄧ本冊，冊名：《蔣總統講故事》。想看hit當年，阮用ê《華語課本》，翻起來第七課、第八課，分別是：「國父ê故事」kap「先總統 蔣公ê故事」，(iáu tio̍h空ㄧ格)來表示尊敬。到我長大了後，讀歷史了後，tsiah知影事實完全無仝，故事冊中：偉大ê蔣總統tī課本中：看tio̍h魚á逆水沿溪á而上，突發奇想beh為國民革命相差真遠，hit-ê偉大ê領袖，竟然是心狠手辣，國民革命、北伐、國共內戰、對日抗戰iáu殺無夠，戰後「台灣二•二八事件，連台灣人lóng thâi參落」tsit種ê「英明領袖」，iáu需要紀念伊mah？這你我可能m̄知，台灣ê寸土，bat有juā-tsē人ê屍水、血水因為蔣中正ê殘忍、暴政之下，死tī槍下。Tsit-ê槍下是不分省籍、族群，只要：「順蔣則存、逆蔣則亡」，咱常聽tsit句宗教名言：「信耶穌得永生」，tī禁忌年代：「信中正得永生、m̄信者生命不保」。結果台灣卻ē-tàng為二二八加害者、元兇，立銅像、建紀念堂，對台灣人來講，人情上thài會堪得。

我有一位朋友tī今年228紀念日前，bat tī《自由時報》寫ㄧ篇文章，題為：《轉型正義講中正》：文中：伊用諷刺ê筆法講：「當咱beh受國民教育有：中正國小、中正國中、中正高中、中正大學、咱beh出國有「中正機場」，出門處處是中正路，出去sńg，有中正公園。」如今，機場已經改成做「台灣桃園國際機場」，如今：政府koh進一步將中正紀念堂改成「台灣民主紀念館。」這tī歷史上何其有意義，台灣逐步揮別「威權體制」所留落來ê陰影。解嚴到taⁿ已經二十年，tī政治上，咱有民主ê成就，但是威權陰影iáu-kú如影tuè形。

因此，台灣民主紀念館(前中正紀念堂)，koh無拆除，只是將名字koh-khah名正言順，為何講是「名正言順」？每一pái ê任何遊行、示威，m̄是lóng tī tsia地方聚集出發mah？所以：這是民主園地，什麼聲音lóng ē-tàng包容，因此，名正言順ê正名為「台灣民主紀念館」，是台灣暨台灣桃園國際機場了後，siōng有意義ê正名運動。

請各位伙伴tio̍h理性去思考台灣歷史問題，koh來解釋「中正紀念堂」有必要存在mah？我只知影，全世界無一個國家像台灣仝款，kā「加害者」the̍h來供奉。因此「國家beh-ài進步，台灣無ài行回頭路」，tio̍h tuì去「神格化」、「陰間領袖化」開始著手。難免有一點衝突，但是轉型正義勢在必行，台灣tsiah有好將來。