《生活e5台語，台語e5生活》

 | | | 轉寄

E世代ê網路福音事工

作者 Lîm Tsùn-io̍k 林俊育 2010.06.27

「Tio̍h從福音傳hō͘萬民聽」kap「福音tio̍h傳到天邊海角」，基督徒lóng抱tio̍h tsit兩個異象kap決心，koh常常祈禱講：「主ah, 我tī-tsia, 求你差遣我！」，但因為不得要領suah tiāⁿ-tiāⁿ有挫折感。

聽人祈禱ê上帝回答我ê祈禱講：「我知每一人ê能力有限，所以我hō͘人類有夠額ê聰明智慧來發展電腦網路科技，這是siōng好ê傳福音管道。」有影to̍h-tio̍h, 我無讀神學院m̄是牧師，我bē曉唱歌無參加聖歌隊，但我學會曉kā牧師傳講ê信息kap聖歌隊獻詩錄影製片上網，就是將傳統ê傳福音方式記錄落來，tī網路頂面延伸出去，「傳到天邊海角」去「hō͘萬民聽」。

感謝上主ê引tshuā帶領，2001年tī哈佛大學台語課李勤岸教授指導下，我開始學白話字，白話字聖經kap聖詩是我現成ê教材。續落來koh參加台灣羅馬字協會，tsit-ê協會是一陣鄭兒玉牧師ê白話字班學生所組成ê,in 97%是熱愛台語ê非基督徒。協會會友tiāⁿ-tiāⁿ提起「大部分文字ê聖經lóng有上網，獨獨無看tio̍h台語文聖經上網」。我也bat hō͘協會監事kí我ê鼻孔責備講：「Lín長老教會除了鄭兒玉牧師以外lóng無效！」（指白話字ê推廣）。我詳細檢討了後發現有影to̍h-tio̍h,台灣長老教會ná親像鄭兒玉牧師所講ê敗家子，kā咱信仰前輩留hō͘咱寶貴ê白話字資產敗kah kiōng-bueh無去。我tsit-ê人bē堪得人刺激，從án-ne下性命整理白話字聖經kap各種文獻ê資料上網。

Hit時阮波士頓台灣基督教會ê陳清俊長老，將伊用六年半時間kā巴克禮白話字聖經phah字做成電子檔案hō͘我。我歡喜kah隨時kā伊整理做網路thang用ê白話字格式，交hō͘ hit當時ê聖經公會總幹事並請伊上網，但是一拖koh再拖lóng無bueh上網。協會會友想講《紅皮聖經》未出版就被國民黨政府沒收所以無版權問題，阮就koh請陳清俊長老phah字，我也kā伊ê白話字版翻寫做漢羅，由「暗光鳥ê厝」網站店主Henry處理上網。

台語聖經上網了後，引起信望愛網站 （http://fhl.net ）來kap我連絡，ài我提供《紅皮聖經》ê電子檔案thang hō in上網。阮見面講無兩句話就「一拍即合」，我hō͘ in全部ê電子檔案，in也一聲to̍h答應開設台語信望愛，後來koh用仝模式來開設客語信望愛（ http://hakka.fhl.net ）kap思羅安信望愛（台語點字 http://sloan.fhl.net ）。

2005年四月初版（試用版）ê《紅皮聖經》附錄有叫我寫「台語聖經上網loh」，可惜2009年一月初版ê時無通知我更新內容，因為「暗光鳥ê厝」已經關門，《紅皮聖經》網站也早to̍h 徙來台語信望愛（ http://taigi.fhl.net ）。Hit時因為巴克禮聖經ê版權也已經結束，白話字版kap我翻寫ê漢羅版同時上網，ē-tàng kap其他聖經版本並列來讀，方便讀者做各版本ê比較研究。

為tio̍h對hiah-ê 97%熱愛台語ê非基督徒，除了豐盛台語/客語ê靈修資源以外，阮也開發真tsē工具（如華語轉台語/客語、全羅轉漢羅、漢羅轉全羅等等）kap信望愛台語客語輸入法。為tio̍h方便學習台羅ê人士，網頁ē-tàng隨時切換做台羅版來讀。根據學者統計，台灣約有97% ê台語文盲，所以阮製作真tsē有聲、有影ê台語教材kap資訊。因為篇幅ê關係，若有機會tsiah koh來一一詳細紹介。

最後誠懇邀請有心人士來參與tsit-ê E世代ê台語（包括客語kap盲人點字）網路福音事工。