《生活e5台語，台語e5生活》

 | | | 轉寄

台灣宣教DIY—台灣宣教家己來

作者 張楊宜宜 2011.02.06

面對一大陣來自四面八方熱情ê兄弟姊妹，本會今年（2010）十一月六日tī紐約舉行ê台灣宣教感恩大會中，我提起最近不斷聽tio̍h ê消息：歐美宣教機構tng-teh不斷將in tī台灣中文真老練ê宣教師調tńg去本國，來應付大量湧入來ê中國大陸新移民kap留學生ê宣教需要。中國鐵幕phah開以來，全球宣教機構已經將宣教重點khǹg tī宗教真空ê中國kap福音siōng難傳ê回教地區，suah bē記得台灣。真少新宣教師來台灣，老宣教師亦日漸凋零、á tī台灣ê宣教師koh被調離，咱tio̍h如何來因應目前特殊ê台灣宣教困境neh？我呼籲與會者「台灣宣教DIY (Do It Yoorself!)」，to̍h是台灣宣教家己來。

福音入台145年久，目前講起來至少mā有數十萬基督徒，最近甚至有數據指稱台灣基督徒已經達到4-5% ê將近百萬。咱豈ē-tàng繼續uá靠外國宣教師neh？

看起來，三年半前上帝呼召本會設立台灣宣教機構kap宣教訓練學校，m̄是無原因ê。阮m̄-nā裝備台灣基督徒ē-tàng台灣宣教DIY(家己來)，iáu不斷建立管道hō͘大家方便去宣教，包括台灣kap全球ê台灣社區。

Tsit-pái感恩大會中ê「救難課程」，to̍h是訓練基督徒kā福音通過疼心kap行動帶出去。Hit工to̍h是組成一隊十guā人ê「志願救難隊」！朋友！您有負擔mah？時不延遲，hō͘咱同齊來「台灣宣教DIY—台灣宣教家己來」pah！

歡迎上網瀏覽「台灣宣教基金會(TMF)」ê網址http://taiwanmissionfoondation.org/ （原載台灣宣教基金會通訊第四期,2010.01）