《生活e5台語，台語e5生活》

 | | | 轉寄

埃及蒙恩記（1/5）

作者 陳鳳翔 2011.02.27

Tī台灣，hiah-ê人當teh快樂慶祝農曆新年時，tī亞洲ê另外一端，卻發生十級強ê政治地震，埃及人民爭取民主，要求執政卅年ê總統穆巴拉克下台。Á阮一家四口ap好友老盧，為tio̍h信望愛聖經地理ê資料庫，參加聖光神學院前院長呂榮輝博士所帶領ê聖地旅習團，往埃及、以色列、約旦三地，蒐集並拍攝聖地資料，1/27~2/10共十五日，無意中親身經歷埃及邁向民主轉型所寫落來ê歷史新頁。

第一pái出國，m̄知影搭乘十幾點鐘ê飛機是hiah-ni̍h煎熬難耐、坐立難安。因此，一到埃及機場，踏上土地，像飛出籠中ê小鳥快樂無比。隨時phah開手機beh向家人報平安，奇怪ê是電話bē通，網路mā bē通。但實在是siuⁿ過興奮，無想hiah tsē，iáu互相phah趣講埃及tsit-ê所在真落伍，不如台灣科技先進。坐起lih巴士，後面iáu有警車tuè-teh行，禁bē-tiâu讚嘆埃及政府對外國遊客保護周全，全然m̄知是政治地震火山爆發ê前兆。

前往埃及餐廳用餐，途經尼羅河ê一條橋頂，司機kā阮放落數分鐘。Kui大陣紛紛帶相機衝落車，世界siōng長ê一條河，就tī目tsiu前。對tī五、六年級生，尼羅河ē-sái講是有特殊意義，伊承載《尼羅河女兒》少女漫畫啟蒙對愛情ê夢想。成做一個基督徒，tsit條河帶有koh-khah深ê意義。帶領以色列人出埃及ê摩西，tú出生ê時遭遇男嬰大屠殺，母親只好無奈將伊khǹg-tī蒲草箱放入河中，hit條河就是尼羅河。Tī上帝ê保守下，摩西奇蹟被法老ê tsa-bó͘-kiáⁿ所救，因禍得福成做埃及王子。

Iáu無看夠尼羅河，mā tio̍h向伊揮手告別，因為第二日就會往埃及中部ê路克索，到時就ē-tàng搭乘三角風帆徜徉tī尼羅河頂，美景盡收眼底，tsit時tio̍h趕緊前往世界七大奇蹟之一ê吉薩金字塔群（胡夫金字塔、卡夫拉金字塔kap孟卡拉金字塔） 。

一路上看tio̍h十字路口有士兵khiā崗，卻無感覺有koh樣，一心期待tio̍h親眼目睹比人khah高ê花崗岩石塊堆砌而成、氣勢宏偉ê金字塔，體會「仰之彌高」帶來ê感動，並浸淫tī 千年時間長河中，以小自我。來到人面獅身像ê時，去過埃及ê同團ê人iáu講：「奇怪今á日怎樣遊客hiah-ni̍h少？以前阮來tsia lóng大排長龍，kheh kah ài命，上帝恩典真是大，hō͘ lín ē-tàng好好á hip相。 」其實根本是埃及已經暴動lah，遊客當然稀疏。

續落來第二站是埃及博物館，巴士一直se̍h路設法tuì吉薩前往開羅（距離相當uì板橋到台北、鳳山到高雄市）。但真tsē路lóng被管制，無法度通行。只好割愛先暫時跳過博物館，去參觀蒲草紙（Papyrus） kap香水店。Guā年期待親眼目睹蒲草紙製作過程，終其尾也有達tio̍h願。