《生活e5台語，台語e5生活》

 | | | 轉寄

台灣到底有幾間台語相關系所？

作者 楊允言 2012.05.27

聯合國教科文組織訂逐年2月21號做世界母語日，提醒世間人重視母語ê普世價值。

台灣tī 2000年民進黨執政了後，母語復振開始有一kuá希望，包括國校開始有本土語言課程，客委會kah原民會ê作為mā對客語、原住民語ê語言復振做出淡薄仔貢獻，包括有專屬ê電視台，koh辦語言能力認證等等。這當中上kài奇怪ê代誌，就是使用人口上濟ê台語，顛倒無專責單位teh負責。

官方ê台語推廣單位，後來是屬教育部國語會，總是國語會已經比教育部、客委會、原民會koh降一級，而且國語會同時愛負擔華語kah所有台灣本土語言ê工課，若kah其它本土語言相比phīng，台語會當分配著ê官方資源實在是有夠少ê少！佔70%以上語言人口ê台語無予官方認定做官方語言，tī世界上就已經是足hàm-kó͘ ê代誌ah，tī資源分配上koh得著tsiah-nī無公平ê待遇，實在予咱真怨嘆。

Kah過去數十冬以來台灣官方所執行ê本土語言屠殺比起來，這幾冬國語會對台語推廣算是有一kuá貢獻，包括辦理推展本土語言傑出貢獻獎（包括客語kah原住民語）、本土語言文學獎、全國語文競賽加入台語朗讀kah字音字形（以上兩項包括客語）、台語認證、編台語常用詞辭典，tsia-ê拍拚，lóng值得咱kā伊拍pho̍k-á。M̄-koh另外一方面，對照國語會前幾冬對世界母語日ê熱情，suah感覺已經有khah退燒ah，態度愈來愈冷，至少今年看起來是按呢。

為著beh向學生介紹世界母語日，除了介紹聯合國教科文組織對母語kah多語言支持ê立場（Language matter! 語言不止要緊，http://www.unesco.org/new/en/languages-and-multilingualism/ ），我koh tshē著國語會製作ê 221世界母語日網站（http://www.221.mue.gov.tw/），這个網站提起世界母語日ê因端，mā kā國語會過去幾冬對台灣本土語言所做ê拍拚做一kuá介紹。

M̄-koh斟酌kā國語會所做ê世界母語日網站看了後，suah發現內底有一份tsiâⁿ離經ê資料：tī資源分享連結，列出台灣有19个台語相關系所！

台灣有19个台語相關系所？逐家敢算會出來？Tī我個人ê認知，假使這个系所有一半以上ê台語專長專任師資，才勉強會使算是台語ê相關系所。一半已經是足卑微ê要求ah，你敢認為英語系應該有非英語專長ê老師，抑是華語系應該有非華語專長ê老師？假使我ê認知是合理ê，按呢台灣目前到底攏總有幾間台語相關系所？ 兩間！規欉好好，就kan-na兩間！

斟酌看國語會列出ê tsia-ê名單，in可能是目睭花花匏仔看做菜瓜，只要系所名稱有「台灣」兩字ê，就準予過ah，攏算做是台語相關系所。

Tsia-ê系所，有ê已經無去ê（親像某校ê台灣語文學系，in猶閣活tī世間ê時，in系ê學生有真濟是聽無啥有台語ê），有ê是反台語ê（某校台灣文學所所長講，台灣文學若kan-na算台語文學，台灣文學史tshun無2頁；koh某校台灣文學所，入學ê書面審查盡量kā台語專長ê學生刣掉，koh阻擋in系台語專業ê老師升等），koh有ê系所課程標準內底並無台語ê必修課，甚至連台語相關ê選修課都無。咱實在是想無，是按怎按呢ê系所攏beh kā算做台語相關系所？

實際上，社會上mā確實有一kuá人料做台灣文學系是大部份ê課攏用台語進行ê，只是我kā in講實情了後，in攏感覺足奇怪，哪會是這馬按呢！目今ê台灣文學系，kan-na會使講是掛「台灣」kha̋n-páng ê中文系。

照我按呢分拆[hun-thiah]，其實論真講，國語會tī母語日網站另外所列ê 8个客語相關系所佮4个原住民語相關系所，可能mā kan-na會當算是有討論著客家文化kah原住民文化ê非客語、非原住民語系所，離真正ê台灣本土語言相關系所，iah-koh一丈差九尺。 台灣ê本土語言，處境實在是真bái，咱teh拍拚挽救家己母語ê時，mā希望官方會當真正了解現實ê狀況，因為有真正了解狀況，才袂tī擬定政策ê時陣發生siuⁿ大ê偏差。