《生活e5台語，台語e5生活》

 | | | 轉寄

數念金大友 (Darrell Jenks金大友追思紀念)

作者 Babuza (Ho̍k-tsû Tiuⁿ) 2012.06.24


咱ê好朋友前任美國在台協會高雄分處處長金大友(Darrell Jenks)先生不幸已經佇2012年5月15過往lah！tshim聽著消息， 是王淑秋老師敲電話kā我講ê，叫是聽毋著--去，閣kā問一擺，了後才確定無聽毋著！我緊入去Internet揣新聞，kā伊ê名key in，隨佇報紙看著 大友兄過身ê報導, 按呢才真正相信咱ê好朋友, 永過足支持台語文ê兄弟確實已經轉--去lah！我一時tik感覺頭殼茫茫, 嚨喉管強beh滇起來, 有袂曉講ê失落感佮非常ê毋甘！mā替in某囝艱苦！大友兄才54歲nā-tiāⁿ！原因是癌症。

金處長佇1996-1999年擔任AIT(美國在台協會)高雄分處處長. 伊ê台語真láu-tâu,客話mā sió-khuá會曉, 閣無傳統外交官ê sam-á-khuì(官架子), 親像普通台灣人仝款, 不時去四界luā-luā-sô, 無論菜市仔, 路邊擔á, la-ji-o͘台, 伊攏會去佮人相借問, 開講, 拍lā涼. 有一擺閣佮阮佇高雄市光華路建國黨辦公室樓腳ê路邊擔á做伙食鱔魚麵, 食了閣o-ló講足好食！伊本人足愛音樂, gâu拍鼓, 有佮屏東ê朋友組一个樂團, 定定做伙表演. 因為這款在地人ê作風佮多元化ê參與, 彼陣南部人對AIT ê風評足讚！

金大友先生知影beh了解台灣人著愛先了解台灣人ê語言. 伊先佇TLI (中華語文研習所)kin王淑秋老師學初級ê台語, 1997年閣來佮KLH(高雄台語羅馬字研習會)進修中高級台語, 對普通對話, 笑詼, 醫學台文一直到語音, 構辭, 句法, 等語言學阮會曉--ê攏學透透, 伊ê台語文程度thang講比95%ê台灣人攏卡gâu！甚至佇1998年閣去葉津鈴女士(後來當選高雄市議員)主持ê民生之聲廣播電台開空中台語教室！KLH佇建國黨辦公室開台語課, 大友先生mā有去做義工老師, tsit-má國科會「台灣醫學語言資料庫及本土化醫學教育的語言課程教材」主持人, 高雄醫學大學皮膚科鄭詩宗醫師ê台語羅馬字就是金處長教--出-來ê！按呢閣無到khuì, 伊閣報名參加台南神學院ê台語文化教室中級班, 通過台語師資考試, 畢業論文是關係Jazz音樂ê起源, 指導教授是鄭兒玉牧師, 論文是用羅馬字寫ê口語台語！Hit篇文可能是最近50年來唯一用台語羅馬字寫ê學術論文！

大友兄ê工作需要佇真濟場面演講, 致辭. 伊真愛講笑, “好ê演講需要真濟笑詼來做味素鹽鬥相共”, 所以, 不管時攏叫我寫笑詼文稿予伊用. 我去買幾nā本英文華文ê笑詼冊來參考改寫, mā有上網揣英文資料, 按呢才會當應付伊ê需要. 有時我siuⁿ久無寫(大概3, 5日無寫), 處長一直講仝款ê笑詼代, 聽眾加減會嫌, 伊就會敲電話kā我抗議, 講”張醫師, 人講我ê笑詼臭酸a lah！” 有一擺, 我文稿猶未寫好, 伊ê司機已經kā駛車來我診所門口teh等beh提笑詼文, 我緊寫好墨水猶未乾, 就緊交予司機先生, 趕去赴處長演講場thang採用, 我kā司機吩咐墨水猶未乾, 若無細膩文字會kô͘去！”因為這个因端, 我hē性命改寫, 這就是後來我ê台語課本”台灣字ABC”有100篇笑詼ê源頭. 我bat kā抗議, 講”處長, 你一直kā我壓迫寫笑詼, 害我寫tsiah濟！” tsit-má想--起-來, 實在對金處長12萬分ê感謝！閣有, 我hit本”台灣字ABC” ê foreword是金處長寫--ê. Hit篇foreword有予美國國務院審查通過.

完整ê語言能力包含會曉聽/講/讀/寫. 台灣人ê母語能力kan-ta有聽佮講nā-tiāⁿ, 有時mā講袂清楚, 發音mā不時走精去. 大友兄ê語言能力真正有夠gâu ê gâu, 伊攏總會曉10種語言, 英語/法語/台語/華語/阿拉伯語/日語/韓國語/西班牙語/葡萄牙語, 當然逐種攏會曉聽/講/讀/寫！佇高雄ê時, beh演講進前, 先kā文稿寫好, 傳真叫我修改, 當然是用台語羅馬字, 有一擺beh來阮高雄醫界聯盟演講, 阿娘uè, 傳來A4 ê紙beh 15張, 害我改kah喘phe̍ⁿh-phe̍ⁿh. 伊ê台語gâu kah彼時李登輝總統mā知影, 閣特別送金處長一本匡金ê聖經！

Tshim開始佮伊交陪, 伊攏袂講著政治, kan-ta台語文. 尾仔, 可能是予阮感動--著, 加減會表示意見. 大友兄bat按呢講, “恁做ê空課(推sak台語文), 比原子彈卡有路用！” 這加添阮對台語文ê信心, mā大大鼓勵阮繼續做台語文事工. 因為有大友兄參與, KLH sió-khuá有名聲, 來學羅馬字ê人有愈來愈濟, mā有外國人, 報紙佮電台電視mā卡beh報導, 按呢, 大家對台語文佮羅馬字愈來愈有信心佮興趣, 後來阮辦ê研習mā有得著高雄縣市佮屏東縣教育局承認, 來參加ê學員大部分攏是在職老師(國小/幼稚園), 無形中南部台語文教學興--起-來！高雄市學校母語教學評鑑攏是全國第一名, 大友兄應該mā有功勞, 感謝你, 大友兄！

金處長離開台灣了後, 有去過巴西/中國/日本, AIT講伊路尾閣有去伊拉克服務, 佇hia學著阿拉伯語. 舊年退休, 毋過已經有癌症teh 觸纏(tak-tîⁿ), 2012年5月15不幸佇馬里蘭州巴爾第摩(Baltimore, Maryland)過往--去！

大友兄
你今轉去佇天父ê樂園
願你好好安歇
你若有閒
對天頂看--落-來
會記得
祝福你ê某囝
Kah咱台灣ê朋友.