《生活e5台語，台語e5生活》

 | | | 轉寄

五洲新桃源布袋戲取經記

作者 Tsùn-io̍k 2005.08.07

搭3月初八ê統聯頭班車(11:30a.m.)，tuì台北來到竹山已經下晡四點。劉進春團長來ê車頭接我，留嘴鬚koh便裝打扮，ká-ná tó位bat tú過ê藝術家。坐入去伊hit台草色ê跑車，熱切ê見面話講無幾句，就來到五洲新桃源布袋戲團工作室。 今年年初成立蕃薯園布袋戲團koh成功 ī同鄉會暗會成功初啼演出了後，阮就計畫繼續beh用布袋戲來推廣台語kap台灣本土文化。Tī陳清風教授ê紹介之下，我就趁三月轉來南投縣國姓鄉puē墓ê機會，來平平是南投縣ê竹山鎮ê五洲新桃源布袋戲「拜師學藝」。

深落ê工作室tò面壁規片lóng排五樣十色ê人物、神明木雕品，塵埃滿面增加「古典」ê氣氛。劉團長講伊十四歲就開始彫刻柴尪仔，伊講讀小學ê成績lóng tī三名內，父母ǹg望伊有好ê職業生涯。伊雖然深深愛布袋戲，父母卻m̄肯hō͘伊行(kiâⁿ)這條伊上合意ê弄布袋戲之路，講做戲ê「豬食狗睏毛蟹行」；hit當時厝裡散赤，當然無可能hō͘伊買布袋戲尪仔。伊就家己用柴刻尪仔頭，koh用破衫剪來做尪仔衫，開始伊ê布袋戲生涯。

劉團長國校畢業無koh升學，伊講讀地理課本講「長江、黃河流域是大米倉，物產豐富」，續落去ê國文課本講「大陸的同胞生活在水深火熱之中，我們要反攻大陸，解救苦難同胞」。伊問hit位外省老師講按呢hiah-ni̍h-á矛盾，老師罵伊講：「冊按怎教，你就按怎讀。」劉團長小小ê心靈感覺按呢koh讀落去，浪費伊ê生命，伊就tuè布袋戲團去拜師學藝。包括我在內，真濟人遭遇tio̍h kap劉團長仝款ê國民黨愚民教育，卻真少(tsió)人像劉團長按呢用行動來表示抗議。

以上ê心路歷程ē-tàng看出劉團長所行ê路線kap其他布袋戲團無仝款，絕大部分ê布袋戲團lóng演中國戲，劉團長只演台灣本土ê民間故事。伊放錄影帶來一一解說：《蛇郎君》、《鴨母王》、《廖添丁》、《虎姑婆》等等。前阮演ê《蛇郎君》是文戲，taⁿ看tio̍h《鴨母王》是武戲，我kui個心肝熱起來，細漢時陣對布袋戲ê熱情koh再爆發。

阮蕃薯園布袋戲團決定beh tī今年ê台灣傳統週演《鴨母王》，我請劉團長指導「拔刀」、「揮刀相thâi」、「收刀入鞘」、「射箭」、「suh阿片薰」等等ê功夫，練幾pái就做會出hia-ê動作，非常有成就感。以前看布袋戲ê特技lóng感覺真不可思議，原來功夫點破就無啥物稀奇。

劉團長不但是資深ê布袋戲大師，mā是傑出ê木偶彫刻師，戲偶造形創新，充分表現出台灣本土文化ê suí,得過1988, 1989, 1990年ê手工藝研究設計種，2000年入選參加總統府藝廊掌中戲戲偶獎，2001年得tio̍h「台灣生活用品展」優選。

Hit暗我受安排去tuà劉團長山頂故居改建ê別莊，客廳壁頂擺設真濟美國各台灣人團體頒hō͘伊ê感謝狀、匾額。上起頭是1996年受鄭良福教授邀請去美國密西根kap休士頓參加亞洲文化節，續落去每年lóng受邀請去美國ê台灣文化節演出，2001年koh tī美國國會山莊由布希總統夫人主辦ê國家圖書節演出《蛇郎君》布袋戲，亞洲地區干單印度kap台灣參加。

劉團長感覺我千里迢迢來向伊請教，伊將所有ê功夫報我知，hō͘我感覺有真濟意外ê收成，希望我ē-tàng tī美國將有台灣本土味文化ê布袋戲紹介hō͘人認bat,kā台灣文化傳揚出去。我訂購《蛇郎君》kap《鴨母王》ê戲尪仔，帶轉來去波士頓hō͘阮蕃薯園布袋戲團好好仔發揮一下。(3/9/2003)