《生活e5台語，台語e5生活》

 | | | 轉寄

咱來演台灣布袋戲──分享《馬偕過台灣》自編、自導、自演ê經驗

作者 Tsuniok 2005.07.29

布袋戲是台灣文化ê代表之一，Boston台語進步社為tio̍h推動拯救台灣母語運動，tī 2001年成立「蕃薯園布袋戲團」。

為tio̍h beh tī 2002年初(慶祝台灣新年)台灣同鄉會ê年會中演出布袋戲，當時tī哈佛大學教台語ê李勤岸教授，向Tsicago ê陳清風教授借《蛇郎君》布袋戲尪仔、錄音帶、布景、道具等來排練。阮tī一個月內設計舞台、畫布景kap排練，結果[一鳴驚人]，熱烈ê掌聲鼓舞阮繼續向前走落去。

李勤岸教授建議續落去演《鴨母王── 朱一貴ê故事 》，我就利用三月tńg去台灣故鄉puē墓ê時，順續去竹山向kap陳清風教授搭配ê劉進春大師訂購17 sian尪仔，並向伊學習武戲ê拔(pui̍h)劍、揮劍、射箭等技術。Tńg到Boston就迫切等候陳清風教授答應beh寄hō͘阮ê劇本kap錄音帶，一日過一日，一月過一月，一年過了mā是等無。約束beh tī 2004年美東夏令會演出布袋戲ê日期(七月初四)tshun無半年，阮只好家己設法自編、自導、自演loh。

Beh演布袋戲，事(tāi)先ài有劇本。阮決定beh演《馬偕過台灣》，我將馬偕ê故事寫做劇本ê初稿，利用禮拜suah ê聚餐了後，團員聚集[腦力激蕩]來討論修改。守義兄講ài有故事ê連續性、戲劇性kap娛樂性；鴻敏兄講角色第一pái出場ài先自我介紹kap「四念白」。根據tsiah-ê要求，我tńg去到厝就phah拚tshuē靈感來修改劇本。每禮拜日團員lóng作伙討論劇本ê修改，到大家滿意為止。

劇本ê配音kap錄音是siōng重要ê工作，電腦專家ê鴻敏兄tshuē-tio̍h好用ê "Audacity"免費軟體。我買一支美金15 kho͘ ê microphone,利用鴻敏兄中晝歇睏時間，去伊ê辦公向伊學習軟體ê操作。學會曉了後，家己先將全部ê配音錄音好勢，tsiah-koh tshuē適當ê人來做各角色ê配音錄音。

完成劇本kap配音ê初稿，三月tńg去台灣選總統了後，就去竹山向劉進春大師請教並訂製戲尪仔。Hit時我發現劉大師當teh無閒準備Toronto陳文隆編寫ê《馬偕ê故事》kap陳清風教授編寫ê 《鬍鬚番》ê戲尪仔kap配音製作錄音帶，伊koh一pái受北美洲各台灣人團體ê台灣週(Taiwanese Weik)主辦單位邀請去做45工ê巡迴演出。一時間內，馬偕ê布袋戲suah有三個版本，我注文ê 戲尪仔真簡單就完成。但我tī劉大師ê厝tuà四暝，請伊利用下班時間kā我ê 劇本修改hō͘伊khah像布袋戲ê對話，加上員林ê吳清發大師( 年薪傳獎得主)ê指導，完成劇本了後，koh去花壇請布袋戲配音專家 錄音。本來beh請吳大師錄全部ê配音做樣本，可惜伊無法度讀我ê漢羅台語劇本，只好我家己讀劇本來錄音， 加上配樂製作MD hō͘我做基礎樣本來製作阮家己ê布袋戲錄音帶。

MD完成tńg到台北，我緊麻煩視障藝文協會幫我kā配音kap配樂分軌轉做MP3 ê CD，再將CD分軌輸入電腦中Audacity ê程式內。每pái修改只要照WORD ê操作方法剪接，實在有夠方便。Beh tshuē適當ê角色配音to̍h需要時間kap耐心，永仁兄對戲劇不止仔有天分，我去Toronto觀賞劉進春大師kap吳清發大師演出《馬偕ê故事》ê時，永仁兄夫婦招待我去tuà in ê厝。我報in知《馬偕過台灣》布袋戲ê計畫了後，永仁兄馬上加入阮ê行列，kā 劇本改hō͘伊koh khah suí-khuì完美。請伊錄馬偕角色ê配音，koh請劉進春大師錄清國官角色ê配音，效果非常好，錄音帶ê製作就進入滿意ê階段，心滿意足ê滋味實在無法度用言語來表達。

有完整ê錄音帶，阮就利用每禮拜下午排練。Tsit時阮也進行舞台ê修整，請治雄兄畫兩個布景，伊看「蕃薯園布袋戲團」ê招牌字用紙貼無好看，就教阮用「熨印」(iron print)直接印落去布條內，我完成tsit-ê工作，有真大成就ê感覺，阮jú來jú像一個布袋戲團。

阮[心有成竹]ǹg美東夏令會出發，tī演出前五點鐘，師傅頭講伊感覺馬偕kap清國官出場ê順序顛倒khah好，我馬上修改劇本kap錄音帶(MP3)，同時請鴻敏兄修改字幕ê順序。這to̍h是「自編、自導、自演」ê方便所在，隨時ē-tàng修改到滿意為止 。

阮ê用心無hō͘五百guā人ê觀眾失望，掌聲不斷hō͘阮真大ê鼓勵。第二集《台灣ê囝婿──馬偕 》ǹg望有koh khah熱烈ê掌聲，hō͘代表台灣文化ê布袋戲ē-tang成做宣揚馬偕獻身台灣福音ê基督大愛精神。