《生活e5台語，台語e5生活》

 | | | 轉寄

序：基督新教之光──王世勛ê文化見識kap政治智慧

作者 宋澤萊 2007.09.09

《台灣海峽國際角色變遷之歷史研究》tsit本冊就beh出版loh。作者是台灣鄉土文學作家、現任ê立法委員王世勛。

這是近年以來，王世勛所寫有關文化論述ê第二本冊，是接近十萬字ê長篇碩士學位論文。另外一本是印刻出版社tī 2003年所印行ê《六十七個笑聲》文化短評集。

儘管表面上juā-ni̍h-á無仝，但是tsit兩本冊之間卻隱藏有極深ê關係。

四年前出版ê《六十七個笑聲》共收集了伊ê六十七篇文化短評。品評ê文化種類除了文學作品以外，iáu涵蓋電影、歷史kap宗教；批評ê範圍除了台灣本土作家ê作品之外，iáu涵蓋中國、日本、南亞、捷克、愛爾蘭、美國kap到m̄知名ê國度ê作家作品；被評ê人物包括基督、馬丁•路德、楊逵、東方白、余光中、白先勇、陳履安、張藝謀、葉慈、瓦勒拉、卡夫卡、伊力•卡山、奈波爾、林獻堂、德川家康、西鄉隆盛、福澤諭吉......。Tuì tsiah-ê名目來看，四年前，王世勛ê文化見識kap宗教認知早就已經達到非常深入廣博ê境界，當teh等待一個機會，將tsiah-ê見識統合起來，構成一個徹底ê屬tī伊自已ê文化見識kap政治智慧。終其尾tī 2007年ê現在，伊tsit本碩士學位ê論文集寫出來lah，完善了伊ê文化觀kap政治觀。

一前一後ê tsit兩本冊ê lóng真精采，寫作ê立場koh kap tsit幾年伊ê信仰脫buē離關係。

簡單來講，tsit兩本冊透出基督新教ê真光，特別是tsit本《台灣海峽國際角色變遷之歷史研究》如果無用基督新教ê眼光來照看，就無法度了解中間ê奧義。

Án怎講竟然會án-ne neh？講來並m̄是一個真容易就ē-tàng講清楚ê問題。

Bē記得tuì什麼時tsūn開始﹝我應該比王世勛小khuá早幾年﹞，阮兩人lóng被聖經吸引lah。

Tú開始，阮只是單純被聖經裡耶穌博愛ê行止kap智慧ê言談所感動，感覺這是一本不得了ê好冊。跟tuè閱讀kap祈禱，真tsē神蹟、啟示、異象、異夢不斷tī阮ê日常生活中出現了，將阮帶入聖經所記載非常特殊ê神秘境界ê中間，hō͘阮koh-khah了解以色列人ê神──耶和華；基督教會ê首腦──耶穌；以及參與創世奇蹟無所不在ê萬民保惠師──聖靈，這聖三位一體ê極深奧秘。阮終其尾受洗lah，成做馬丁路德教派中ê一個教會ê信徒。

既然身為一位基督徒，阮就必須不斷ê聚會。阮聚會ê家庭小組大約有五、六人左右，本來聚會ê地點lóng tī鹿港ê我ê厝，每兩、三個禮拜就聚會一pái；後來為tio̍h替詩人吳晟ê疾病祈禱，阮轉移聚會ê地點到溪州吳晟ê厝裡。Tī聚會ê時，阮bē-tàng避免來談論起目前ê文學kap文化﹝王世勛、吳晟、我kap真tsē好朋友bat聯手辦過《台灣新文化》《台灣新文學》tsit兩大刊物﹞，因此常常互相紹介一kuá書籍。我會記得阮討論過韋伯ê《基督新教倫理kap資本主義精神》、杭亭頓ê《文明衝突kap世界秩序ê重建》、福山ê《信任》、蘭迪斯ê《新國富論》、杭亭頓主編ê《為什麼文化真重要》、甚至是彼得•杜拉克所寫ê一系列ê有關各國企業ê重要書籍。本來阮並無發現中間有什麼奇怪ê現象，後來tsiah發現tsiah-ê冊lóng是kap基督新教精神有關ê書籍，儘管寫冊ê人無一定是基督新教徒，但是in一致推崇基督新教徒hit種虔誠信仰、克勤克儉、奮發向上、自由平等獨立ê真精神。當時，我kap王世勛tú被帶向基督新教ê精神境界中。

我想，王世勛對tsiah-ê冊ê閱讀比我koh-khah詳細、全面。因為兩年前，伊考入去中興大學ê「國際政治研究所」，開始對「地緣政治學」中ê文化問題做專門ê研究，阮所討論過ê書籍tú好lóng牽涉tio̍h廣闊ê目前世界文化•政治•經濟現況，ē-tàng提供真tsē ê資料hō͘伊進行研究。但是，我萬萬無想tio̍h，tsiah-ê書籍kah-ná非常猛烈刺激tio̍h伊，替伊型塑一種優美ê、堅定ê、正確ê文化•政治觀，一下á就hō͘伊掌握世界文明•政治ê大趨向，這正是目前台灣ê文化•政治界ê學者所缺乏ê真少有ê實用觀點……tsit-ê結果，有點á hō͘我tio̍h驚。

大部分看起來，東方ê學者tī研究世界文化•政治ê時因為siuⁿ過了解家己ê東方文化，就高估儒家文化、印度文化，真容易陷入東方本位主義ê陷阱，對西方文化採用了過度ê扺擋、拒絕排斥ê態度。準講有kuá學者去過西方研究機構從事文化研究，卻因為缺乏對基督新教ê真實體驗，對tī基督新教ê精神下腳發展起來ê目前西方文化無法度了解，甚至真tsē所在誤解，終其尾hō͘ in ê研究無法度客觀，埋落來夜郎自大ê東方本位主義ê pháiⁿ判斷，對tī文明ê未來路向就採行倒退論或虛無論，致使kui-ê結論lóng m̄-tio̍h去，對他者ê西方kap家己ê東方終其尾無一點點ê好處。

對tī東方學者ê tsit-ê普遍缺點，以前我kap王世勛lóng bat有過。

原來，我kap王世勛lóng bat花費無數ê精神kap體力，身軀力行，對東方ê儒學、佛學甚至是道術做了[撒身懸崖]ê追求。但是因為m̄是西方人，儘管真用功閱讀世界文明ê書籍，可惜總是感覺對西方ê瞭解隔了一層，無法度徹底了解其深義，西方文明hit-ê區塊變成一個無法度塡補ê烏洞，論起世界ê文化文明就感覺真心虛。Ē-sái講是，當阮有基督新教ê信仰了後，對西方ê文明就變kah真ē-tàng掌握，阮變kah忽然ē-tàng知影今á日ê西方為什麼會變成án-ne ê深層原因，對韋伯、杭亭頓、福山、蘭迪斯tsiah-ê當代學者ê言論有高度ê理解。Hit-ê烏洞被填補起來，對西方文化文明無koh生份，suah變kah真親切起來。

另外，以前因為無法度理解西方文化，到最後患tio̍h一種不斷退回東方文化自我中心主義ê病症，頭尾無法度真正來做一個自我整頓ê工作。後來因為對基督新教ê精神有所體會，就提供hō͘阮一個極高ê文明參考座標。阮ē-tàng通過基督新教ê眼光來了解、品評其他文明。以前雖然mā知影家己ê東方文明出了問題、缺陷一定真tsē，若無bē演變到tsiah-ni̍h衰弱ê地步，可惜lóng是指bē出來，tsit-má就真清楚，阮開始掌khiā-tī一個世界文化ê制高點，ē-tàng照看一切，阮無koh盲目，擁有tsit種自我khàng粒á疕ê tsiah ē-tàng hō͘家己因此感覺無比清醒，是真愉快ê經驗。

王世勛tsit本《台灣海峽國際角色變遷之歷史研究》ê論著，就是tī tsit種精神狀態中寫成ê，絕對m̄是東方本位主義者ê書籍thang比ê。這是閱讀tsit本冊第一重要ê一個認知。

其次，雖然tsit本冊看起來是kā杭亭頓「文明衝突理論」運用到台灣海峽ê歷史現實做分析，指出世界各大文明如何tī台灣海峽奪取霸權ê經過kap影響，但是王世勛mā採用杭亭頓ê論敵福山ê一kuá主張，認為將來民主自由會tī台灣海峽兩岸實現開來﹝儘管目前iáu無充分ê條件﹞。可見tsit本論著m̄是完全kā重點khǹg-tī「區域衝突論」頂面ê論著，卻是兼具「全球化」觀點ê一本論文。

Koh再其次，tī tsit本冊內底，伊對台灣海峽ê歷史考察非常深刻，已經超出我tsit-ê學歷史ê人ê學養範圍，假使m̄是對台灣ê有深切ê關懷，無人願意花費tsiah-ni̍h-tsē時間來進行tsit種ê考察。

Tuì頂面tsit兩點看起來就知影，王世勛一向所關懷ê「普世ê自由民主價值」kap「本土價值」tī tsit本冊佔有極特殊ê地位。

Tńg來到頭前來談，我講tsit本冊是khiā-tī基督新教精神ê立場來寫作ê，因為對基督新教有一定ê熱誠，就koh有全球化ê觀點，致使伊對後殖民主義ê理論家薩伊德有做深刻ê批評。伊指出，薩伊德批評奈波爾﹝生長tī千里達ê印度人，2001年ê諾貝爾文學獎ê得主，揭露回教文化弊病ê作家﹞是自暴其短ê行為，因為薩伊德只ē-tàng寫出《被遮蔽ê伊斯蘭》tsit種冊，認為阿拉伯人ê形象被西方國家百般扭曲，但是對tī「無被遮蔽ê伊斯蘭」卻無法度寫出半句話語，伊非常受氣來批判ē-tàng寫出阿拉伯文化真相ê奈波爾是一件非常可笑ê tāi-tsì。王世勛特別引述路易斯(Bernard Lewis)所講ê：當hiah-ê人發覺tāi-tsì出了差錯ê時，可能會問兩個問題，一個是：「我做錯了什麼？」另外一個是：「誰害阮ê？」前者是近代日本明治維新ê思考，後者是近代拉丁美洲ê思考。王世勛暗示薩伊德ê思考是拉丁美洲ê思考，只是一種kā家己ê失敗一直往別人身上推ê pháiⁿ思考，無值得來重視。王世勛ê看法真值得台灣文化•文學界ê學者注意，因為後殖民理論tī台灣已經流行十年以上，已經變成所有文化•文學ê研究生必修ê課程，有人早to̍h將薩伊德奉為神明，從來無思考伊ê理論tī現實上究竟起了什麼作用﹝mā可能一點作用都無！﹞，將來可能iáu會繼續推崇tsit-ê主義。根據我個人ê看法，薩伊德ê後殖民理論如果用來批判國民黨對台灣ê殖民，the̍h來引tshuā台灣人「脫國民黨ê中國化」，我認為是適當ê，因為國民黨所帶來ê文化是一個封建性•藩鎮性極強ê pháiⁿ文化，反科學、反民主、好貪污、自私自利ê文化，tú好應該將伊掃地出門。如果是用來「脫歐美化」，我看免lah！台灣目前ê文化非常無競爭性，科學、民主ê根基薄弱，當teh需要koh再全盤西化ê時tsūn，「脫亞入歐美論」tsiah是正論，無算是bueh 對歐美日tsiah-ê國家去殖民化。

總講一句，tī批評薩伊德ê時，koh-khah顯出王世勛是一個全球化理論者，伊是一個竭力主張台灣改變家己，全力介入全球競爭ê論者。伊批評薩伊德，tsit點ē-sái講是目前盲目ê台灣學文化•文學界ê一件大事！

Án-ne為序！ ──2007、09、01 tī鹿港寓所