《賴永祥講書》

 | | | 轉寄

《教會史話》(1_078)陳祐稟白水溪案

作者 賴永祥 2009.01.04

甘為霖牧師tī白水溪遭難，隔tńg工早起向嘉義知縣報案。署知縣名陳祚。beh知影陳祚處埋本案ê態度kap經過，「教務教案檔」（第三輯）內面所收ê光緒元年5月10日（1875年6月13日）總理各國事務衙門總署收福州將軍文煜文稱，根據福建通商局同通呈，台港夏道詳報英國教士監物tī嘉義縣白水溪地方被店仔口人乘夜焚燒教堂tsit-ê案件，會凍參考。夏道指分巡台澎兵備道夏獻綸，監物（Campbe11之譯）當然是指甘為霖。

夏道台移稱：「同治13年12月23日（1875年1月28日），根據署嘉義縣陳祚稟，hit工辰刻有洋人監物來縣面稱，伊tī白水溪hit-ê所在傳教，忽然間被店仔口ê人thàn ing暗ê時，來放火燒，in匆狂逃走，好加在無受傷。問起代誌發生ê經過，in suah講是beh加起教堂ê厝，有吳志高聲言礙其祖墳風水，tsiah會造成tsit寡事端等等ê話語。當飭役勇護送hit-ê教士赴郡（指府城台南），一面親赴查勘拏辦等情。

「旋准駐台英國領事額勒格里（William Gregory ）照會……吳志高藉稱有礙伊祖墳風水，thàn ing暗ê時將小禮拜堂燒掉。hit ê所在受教ê番民先有被牽牛隻拍傷ê tsit寡代誌發生，照請嚴加查辦。……陳祚稟復，會營勘得白水溪離店仔口十外里，教堂kap吳姓祖墳iáu koh隔一粒山，四pîng攏無厝邊，hit-ê教士所住ê草寮攏已經去hông燒掉＝a，伊後壁土腳ê木料並無去hông燒掉。查詢hit-ê所在受教屯番潘春等先有店仔口ê人去偷牽牛，潘春kap in某潘氏去jiok， suah攏去hông拍著傷。後來愛總理吳亦修等交出吳福、吳安、黃侍、林鳥等四名（只有4名？）到案。

「訊據供認上年12月22日 做伙去山頂tshò柴，初更ê時，tńg去教士ê草寮歇睏，開火吸煙，致使he火沿路燒到hit-ê教士住ê厝，並m̄是有心beh放火kā燒＝e。m̄-koh in為何beh偷牽潘春等ê牛隻，並將潘春夫婦拍著傷。根據稱伊等kap潘春本來著有khioh-kak，tsit擺牽潘春ê牛隻是in ê報愎，kap吳志高hia ê人無關係。惟吳志高以吳福等是in ê族人，吳福等吸煙遺火沿燒到草厝，koh挾怨去偷牽潘春ê牛隻，並將潘春夫婦拍著傷， buē凍事先約束，致使代誌來發生。（以下提出解決辦法3條，1.吳志高所提）情願備銀150圓繳案，以賠償hit-ê教士被燒草厝等件kap潘春等所失去牛隻ê費用。2.吳福等（即吳福、吳安、黃侍、林鳥4名）失火延燒草屋並挾怨牽牛tsia ê代誌攏m̄是事實，應該各人處重責並枷號一個月示眾；3.由縣示禁阻教並取結。…．」。夏道認為縣署「辦理尚屬平允」，咨呈請察照施行；甘為霖認為按呢kám有公平？

《台灣教會公報》 1960期 主後1989年9月24日