《賴永祥講書》

 | | | 轉寄

《教會史話》(1_093)天主教捲土重來

作者 賴永祥 2009.04.19

17世紀天主教初次傳入台灣。1626年西班牙人佔據台灣北部，教士mā隨軍入台，tī雞籠（基隆）、淡水、噶瑪蘭（宜蘭地方）一帶傳教；1641年荷蘭人攻佔台灣北部，教士mā隨軍撤退。

天津條約簽訂了後，天主教士就捲土重來。咸豐8年（1858年），菲律賓道明會（多明我會．Dominican ）決定來台佈教，就派郭得剛（Fernande Sainz，一般譯為桑英士）kap杜篤拉（Joseph Duttoras）兩ê神父先去廈門；杜神父因為會曉講華語，著留tī廈門；翌年ê 9年5月15日（1859年6月）郭神父、洪神父（Angel Bufurall又譯蒲富路）kap華籍修士三人教友二名，自廈門來台，5月18日tī打狗（高雄）登陸，22日進入戱獅甲（今高雄市新興區）。M̄-koh過無luā久兩ê神父著受人民控告，被鳳山縣解送台南府入獄。經過交涉，兩人tī 6月1日出獄。洪神父因為破病著轉去廈門，郭神父tī前金庄（今高雄市前金區）傳教。7月鳳山知縣佈告，嚴禁以土地、房屋貸租出讓hō͘天主教教士；經過交涉了後縣勉強將佈告撤銷。到了10年（1860年）郭神父tī前金庄建立了第一座天主堂。Tsit-ê堂原本是一小座，m̄-koh tī同治元年（1862年）就改以紅磚、硓估石kap三合士建造，號名作玫瑰聖母堂。（1928年重建，採後期文藝復與期建築，規模壯大；可惜tī太平洋戰爭中被炸燬，戰後復興，伊pú色ê牆看起來真壯麗，正門頂面koh有掛1864年咸豐帝頒賜「奉旨」牌一方）。Tsit-ê堂khí tī愛河高雄橋畔。

咸豐11年（1861年）安東（Marano Anton）神父來台協助教務，所以郭神父就深入萬金庄（今屬屏東縣萬鑾鄉），向群居hit-ê所再ê平埔族人擴大傳教，成績真好，不到一年就得著力力、赤山、加匏朗三社二百外人成為信徒。ㄧ開始有一ê小堂，tī同治8年（1869年）12月正式修建，次年ê 2月8日完工，就是赤山天主堂，今稱萬金天主堂，是台灣現存最古老ê天主堂，所以被政府指定做「台閩地區古蹟」（第三級）。日人藤島亥治郎bat tī「國寶」月刊，推賞介紹hit-ê堂，尤其是真重視伊ê雕刻裝飾帶有西班牙kap台灣混合作法，tsit-ê堂tī屏東縣萬鑾鄉萬金村萬興路24號。

重開北部傳教，是何安慈神父（Celedonio Arranz，又譯阿蘭子）tī光緒13年（1887年）tī和尚洲（蘆洲）設教開始，翌年何神父koh tī大稻程（台北）設傳道所。

《台灣教會公報》 1978期 主後1990年1月28日