《賴永祥講書》

 | | | 轉寄

《教會史話》(1_095)同治天主堂被毀案

作者 賴永祥 2009.05.03

咸豐8年（1858年），中俄、中美、中英、中法天津條約，攏允准外人tī中國各地傳教ê權利。中法天津條約第13款：「天主教原本是以勸人行善為本，凡奉教之人，攏會凍得著保佑，其會同禮拜誦經等事，概聽其便。凡按第8款有tǹg印á ê執照ê人入來傳教，地方官ㄧ定愛kā in保護。凡中國人願信崇天主教koh遵守規矩，毫無查禁，攏免懲治。向來所有或寫或刻奉禁天主教各明文，無論何處，概行寛免」。

咸豐9年（1859年）入台重開傳教ê教士，kám會凍得到地方官ê保護？郭德剛神父（Fernando Sainz）深入萬金庄向平埔族佈教是咸豐11年（1861年）。翌同治元年鳳山知縣接報，委員kap下淡水縣丞，趕去萬金調查，召見通事潘水泉、土目潘岐山，以「非通商港口，外人bē凍住」為理由，責令二人將郭神父趕出去。經過交涉，郭神父koh進入萬金。同治4年（1865年2月1日）萬金天主堂附近發火，hiám-á beh燒掉，koh因為一客人ê死，客人kap平埔族信徒ê對立高升，天主堂被襲擊。同治5年（1866年11月29日）天主堂再度被襲擊，tú-á好郭神父外出在歸途中被暴民綁去萬丹，好加在得著打狗英事ê幫助，鳳山知縣才勒令暴民kā郭神父放掉。

同治3年（1864年）由良揚神父（Francisco Herie）開設ê溝仔墘（又名郊墘，屏東縣竹田鄉）佈教所，三kái攏hō͘人破壞燒掉；重建ê新堂mā tī同治7年（1868年）koh hō͘暴民放火來燒掉。良揚神父beh去抗訴，koh去hông圍tiâu leh hiám-hiám-á去hông拍。

Tī府城（台南），同治5年（1866年）郭德剛神父tī八吉境地方向民婦陳氏租用一座民房開始傳教，舉人吳尚震等呈請教in遷移，台灣府因為按呢著禁止天主教tī城內佈教。經過抗議開始tī小東門外設立天主堂kap孤兒院。然郡城謡言四起轟傳教士毒害良民，小東門外天主堂tī同治7年3月（1868年）被暴民拆掉。

有關鳳山縣溝仔墘kap府城小東門外天主堂被毀案，經交涉賠hō͘天主教會銀2000千元來結案。被台灣縣拘提ê肇事人是革兵葉連升、蔡朝寶、沈成德，民人許場、陳閣來、周至、莊統、郭發等八名；被鳳山縣拘提者有李雹（又作梁雹）、陳賀仔（又作陳烏江）2名，各以杖100，加枷號兩個月，滿日折責發落。 　
《台灣教會公報》 1980期 主後1990年2月11日