《賴永祥講書》

 | | | 轉寄

《教會史話》(1_096)台灣港口ê開放

作者 賴永祥 2009.05.10

台灣開放作為通商ê口岸，分列tī 1858年中國kap俄、美、英、法tī天津訂立ê各約內面。譬如中英天津條約第11款：一廣州福州廈門寧波上海五ê所在，已經有江寧條約本來著允准通商以外，tī牛莊登州台灣潮州瓊州等府城口，了後mā攏允准英商會凍kap任何人買賣船貨隨時往來，若是beh租厝買厝租地起造禮拜堂醫院墳塋等事，另外有取益防損ê細節，攏kap已經通商ê五ê港口無啥無kâng款。中法天津條約（第6款）koh增加淡水一口。因為各約中有最惠國條款，所以淡水亦成為各國會凍貿易ê港口。

1860年中英法ê「北京續約」簽成。1861年7月英國副領事郇和（Robert Swinhue）荏台。郇和uì打狗登陸，轉至台灣府（台南），原本beh tī tsia設館，m̄-koh看著民眾真無友善，水土不服，府口安平道淤滯，tī hia停留無luā久，著返去廈門a。11月koh去淡水。當時北部ê商業集散地，是艋舺（今台北市萬華區）kap tī伊北部ê大稻埕，所以將條約所稱ê淡水一口解釋為應包括淡水河岸各地，所以滬尾（今淡水）、艋舺、大稻埕攏包括在內。1862年7月18日tī滬尾設洋關開市。

台灣既然開埠，各國ê商船mā攏會來tsia作生利，德國、葡萄牙、丹麥、西班牙、比利時、意大利、奧大利、日本、秘魯、巴西等國，uì 1861年起相繼kap中國訂商約。清政府准設台灣新關，隸屬總稅務司赫德（Robert Hart），以雞籠（基隆）為淡水外口，打狗（高雄）作台灣府外口，tī各口設關，並設副稅務司一ê（首任為英人John Willam Howe11），專管四口稅務。所以台灣一島商埠，名為二口，實際上為四口，而且深入艋舺內地。

開埠以前，外商若是無先經由對岸ê商行ā-sī商船，是bē凍kpa台灣通商e，tsit-má會凍自由來去。香港ê兩間英商Jardine Matheson & Co．（怡和公司）kap Dent & Co．kap台灣貿易為嚆矢。

英國ê副領事郇和，駐淡水一段時間了後，因為kap台灣府ê官員交涉不便，所以tī 1864年重新tī府城設館，改淡水為辦事處。1865年郇和升任領事，移駐Dent公司駐泊打狗之鴉片裝卸船德奈號（Ternate）船上，翌年tī打狗建領事館，清治期間，英國駐台領事，m̄-nā辦理本國商務，亦兼管其他各國領事（除德國於1886年設館以外，歐洲各國尚無領事駐紮）ê事務。美國領事向駐廈門。

禁教令ê弛廢kap開埠，是為著外教再傳入台灣teh舖路。天主教tī 1859年捲土重來，英國長老會tī 1865年入台設教。

《台灣教會公報》 1981期 主後1990年2月18日