《賴永祥講書》

 | | | 轉寄

《教會史話》(1_100)指向台灣府城

作者 賴永祥 2009.06.07

Tī台灣開拓傳道，伊ê基站應該ài設tī toh？英國長老教會選定台灣ê府城（台南）作目標，是有充分理由ê。

同治年間台灣猶koh是屬福建省。Tī省ê下kha設有「台夏兵備道」，每半年交替調駐台灣、廈門兩地。伊ê任務除了任道台外，兼任按察使佼（司法）kap學政使（科學、教 育），並協同台灣總兵處理軍務。Tī道台之下，有台灣知府，管轄ê台澎政務，府下有縣，設知縣。Tī軍事系統頂面，台灣總兵管轄全台治安，tī府治另設海防同治，全台分作幾ê管區，下kha tsiah koh分汛塘，一層一層按呢。府城是全台ê中心，道台、知府、台灣知縣（府治外廓成一縣），台灣總兵，海防同知攏tī府城。

府城亦是當時全境尚大ê市鎮，有士、有商、有兵勇、有無賴、有乞丐，各種行業攏會凍看著。有城垣圍起來，周圍著有「二千五百二十丈」，規模真大，是全台之冠。城內有衙門、考棚、鴻指園、孔廟、關帝廟、府城隍廟、赤崁樓……氣派十足。府治分四大坊（東安、寧南、鎮北、西定），大街小巷，通往各城門（有八門），是生利人賣物件ê通道，城廓兵駐守。大西門是涌外口安平之關，內外街市攏真繁榮，商夏連簷櫛比，商民挑夫接踵，街路雖然真狹，m̄-koh5p 鬧熱。

安平tī府西，有一ê大潮渠通對tsia來，小船竹筏積載貨物tī tsia來來往往。海口一帶大部分是沙洲，大船buē凍入來，若是輪船著愛停tī港口，tse是伊ê缺點，m̄-koh港由條約開埠而且是府口，外國船隻來往不絕，貿易額tī改隸日本以前，一直淡水比、打狗、雞籠三口khah tsē。1864年5月安平設新關。

1865年5月馬雅各醫生來到台灣ê時，打狗已經有真tsē間洋行，天利行（MacPhail & Co.）是其中之一，由James W. MacPhail所主持。登陸3 kang了後，in用kiâⁿ e來到府城，就住tī天利行分行行東Neil MacPhail ê厝，tī大西門外北勢街（今神農街）。著隨出去找房屋beh租，m̄-koh tī城內攏tshuē無，最後靠海關吏馬威廉（William Maxwell）ê好意，頂租大西門外看西街（今仁愛街）ê一間厝，猶koh bē bái，就決定六月16日正式設醫館開始傳教a。

在此順續提必麒麟（William A.Pickering）ê動向。必氏隨馬威廉來台，1863年任打狗關檢查員，1865年被派駐安平分關，本來tī 1867年受聘主持天利行府城分行ê業務（Pioneering in Formosa. Tsapter I.）。後來天利行改組kap怡和洋行相合（Elles & Co.），怡和洋行tī鹿港買ê樟腦去hông沒收，正是1868年樟腦糾紛ê起端。

《台灣教會公報》 1985期 主後1990年3月18日