《賴永祥講書》

 | | | 轉寄

「甘字典」啟發了吳守禮

作者 賴永祥 2006.03.12

賴永祥講書(015)

台語大師吳守禮(1909-2005)，tī 1927年考tio̍h台灣總督府台北高等學校高等科，就讀文科乙組，乙組就是選讀德語為第一外國語、英語為第二外國語ê。同級生有40名，台籍只有四名。伊對台語ê研究生起興趣，就是伊tī台北高校在學中有機緣看tio̍h「甘字典」而來ê。

晚(bān)吳守禮一年，tī 1928年有豐原人林朝棨(1910-1985)考to̍h台北高等學校高等科理科乙組。當時長老教會傳道師康清塗(1893-1953)受派tī板橋教會。禮拜堂tī林本源家園近鄰，房屋破舊，設備簡陋，並兼khiā家，經考慮後，康傳道就租隔壁ê房屋做宿舍，空出房間租hō͘學生並供膳食。林朝棨就約吳守禮相kap住tī康傳道經營ê「下宿」。

林朝棨是熱心ê信徒，禮拜日m̄但參加上午kap晚間ê禮拜，下午也常常kap康傳道到樹林或中和去佈道或教「主日學」。吳守禮m̄是信徒，經常也參加禮拜日上午ê禮拜。禮拜時會眾吟台語ê聖詩，讀台語ê聖經，聽台語ê講道。兒童tī教會「主日學」事(tāi)先tio̍h學白話字，就是台語羅馬字，真tsē年老ê信徒也會曉讀白話字。因為吳守禮bat ABC,koh會曉辨認漢字七聲ê發音法，學白話字並無困難。康傳道和藹可親，樂意助人，看伊對白話字有興趣，就借hō͘伊看一本甘為霖牧師(Rev. William Campbell)編ê《廈門音新字典》。Tsit本字典用羅馬字拼台灣音，用白話字做注解。伊會曉將漢字音kap羅馬拼音對照起來。吳守禮就開四圓買了「甘字典」自用。Tuì hit時起，所有m̄ bat讀過ê字，伊lóng參考tsit本字典來決定讀音。伊一直自修漢字ê閩南音（包括台灣音、廈門音）ê讀法。

吳守禮ti71930年高等學校畢業，就進入台北帝國大學文政學部文學科，主修中國文學(當時稱「東洋文學」).。伊是該校ê第三屆生。史學科第一屆生有柯設偕，是宣教師馬偕(Rev. George Leslie Mackay) ê外孫。柯設偕ê父親柯維思tī 1932年寫一篇「白話字ê歷史」，刊tī「台灣教會公報」第570號(1932年9月,.p.23-24)。吳守禮用日文寫ê<台灣羅馬字和基督教宣教師>(收載tī《民俗臺灣》4卷11號8∼11頁, 1944年11月) ，就是伊根據柯設偕學長ê談話kap所見所借ê資料所撰ê。兩文lóng有提起打馬字(Rev. John van Nest Talmage, 1819-1892)、羅啻(Rev. Elihu Doty, 1809~1864)、杜嘉德(Rev. Carstairs Dooglas, 1830~1877)、賓威廉(Rev. William Tsarmers Burns,1815-1868)、馬偕等牧師ê貢獻。

後來吳守禮一直繼續搜集用羅馬字寫成ê冊，大部分是用白話字注音或注解ê以外，iáu有天主教會用ê等，伊也看tio̍h以白話字解說ê《大學》、《論語》、《三字經》，........吳守禮講：伊發覺基督教kap天主教ê牧師、傳道師、神父為tio̍h beh tī中國傳教，對中國方言ê學習、研究、著作、編撰、記錄等等所做ê準備工作，m̄但對傳教本身有直接利益，對中國文化也有間接而且重要別開生面ê貢獻。就是講，羅馬字拼音ê利用，對tī中國方言方音ê記錄，比起以前古老ê反切法，確實別具妙用，koh有真tsē優點；尤其是kap漢字相輔而行，有不可偏廢ê功用，的確thang補足漢字偏重表意ê缺點。

講tio̍h吳守禮所知所見台語(包括白話字)研究ê書目，就請看伊所編ê《近五十年來台語研究之總成績》1955.06 油印本、<臺灣方言研究文獻目錄>《臺北文獻》」六期1963.12、《(臺灣)福客方言綜誌》從宜編輯室出版1997.12等了。