《賴永祥講書》

 | | | 轉寄

《教會史話》(2_134) 二老口舊樓

作者 賴永祥 2010.01.31

1868年11月25，馬雅各醫生uì打狗出海路去安平，經kuè 2禮拜走tshuē後，tī府成內二老口tshuē tio̍h一間大厝，做傳教ê基地；tsit間厝一直hō͘教士會使用kàu 1900年tsiah hâiⁿ hō͘厝主。Tī後來uá東門起ē新樓，一般叫tsit間厝是舊樓。

Tsit間大厝tī二老口街府東pîng ê巷á尾，西pîng uá後來ê英國領事館，koh隔壁tio̍h是台灣府署。厝是舊型ê kē厝á，有三進。第一進做醫館、藥房、外科房、病房，第二進有禮拜堂，後進有ē-kha手人ê房間、客房、倉庫等等。Uì自正門入..來ê正pîng有2間房間，是馬醫生翁á某ê khiā-ke，馬醫生轉去liáu後換甘為霖牧師tuà。Tò-pîng有2間房間，siōng頭起先是吳文水、高長tuà，後來由接替馬醫生ê德馬太醫生（Dr. Matthew Dick-son，1871年來台）tuà。城內有大青á、檳榔樹á kha有柚á-tsâng，有花園，有一口深井（ē-sái提供品質真hó͘ ê水）。

根據馬醫生tī 1902年hō͘巴克禮ê批，知影tsit間厝uì「金繼成」（Kim Ke-sing），tio̍h是？生許建勳（素為英商怡記行夥）設ê行。一般lóng叫做「許厝」。Tsit間厝後來是許廷光tuà..ē。許廷光，1861年生，號凌槎；祖宜章，號純德，秀才；父朝華，字遜榮，號茂堂，恩貢生，候補同知；嗣父慶清，恩貢生，候補知縣；廷光tī三世文學之家ê所在出世，真少年tio̍h真khiáu。光緒癸未1883年）科秀才，乙酉（1885年）科增生，癸已（1887年）科補廩生。乙未（1895年）日本軍人來台灣，伊kap蔡夢熊、楊鵬搏、陳修五等代表市民，偕巴克禮宋忠堅去見日本將軍乃木希典，請伊入..來。Tī日本人ê統治下，做台灣總督府評議會員等ê要職，權力kap錢財lóng有，m̄-koh老..來真落魄。產業落tī日本營造廠「湯川組」（組頭湯川鹿造）。根據黃茂卿tī台南市政事務所查ē（見太平境……教會設教九十年史）（565-567頁），hit-ê地號是台南市壽段一小段六番地，面積lóng總是四分九區七毛（約1400坪），是tsit-má省立台南啟聰學校博愛堂kap隔壁sio接ê宿舍（衛民街26、28、30號）kap頭前ê衛民街路。

新樓ê名，是uì 1874年（同治3年），甘為霖牧師kap德馬太醫生tī城內彌陀寺後永康里西竹圍ê所在，買..ê（永遠租給約）一ê花園，大概三坵，koh tī 1876年起khiā-ke。後來m̄-nā厝，連hit tah，甚至tī新買ê土地附近（1886年契約、1897年才買好）新起醫館，mā號做「新樓醫院」。1900年醫館uì舊館suá kàu新館。

《台灣教會公報》 2028期 主後1991年1月13