《賴永祥講書》

 | | | 轉寄

巴克禮 增補《廈英大辭典》

作者 賴永祥 2006.04.23

賴永祥講書(019)

巴克禮牧師(Thomas Barclay,1849-1935)是1873年春天畢業格拉斯哥大學神學院ê。晚年伊回憶講：Tī我ê大學生涯，起初我無teh想beh去海外宣教，直到最後一年……有一日，院長杜喬治博士(Dr. George Dooglas)ê小弟，就是廈門tńg來ê杜嘉德牧師(Carstairs Dooglas, 1830~1877)，來到學校招募前往中國ê宣教師。……hit晚院長邀請一kuá學生kap杜嘉德牧師見面，當時杜牧師tú-teh從事廈門腔漢英辭典出版ê工作。伊hō͘阮看辭典ê校對稿樣，我向伊講：看起來印得iáu beh bái。伊講：「是！當你來到中國，相信你一定會發現tsit-ê字典相當有路用」。以後伊寫phue勸我，ài我立刻kap伊動身，無需要koh再讀完神學課程，伊講tī中國真迫切需要宣教師……不過我當時無隨時答應伊ê建議（Band: Barclay of Formosa, 1936, P17~18）。杜嘉德牧師編著ê《廈英大辭典》就tī 1873年出版。二年後，巴克禮tī 1875年受派來台，一直到過身，tī台灣傳教有60.年。

《廈英大辭典》出版以後，一直是宣教師學習廈門腔siōng好ê參考書。但經過將近半世紀之間，中國大變，就發現社會用語、新科學用詞、真tsē新字lóng無tī tsit-ê辭典裡面。為tio̍h beh適應時代ê需要，1913年tī台灣kap廈門ê宣教師，就請巴克禮牧師作辭典補遺ê工作。In知影巴牧師幾十年來不斷teh學習當地語言，而且將所聽tio̍h ê用語，不管好bái lóng有作記錄。巴牧師受託，tī續落去ê十年中間，就利用閒ê時間整理伊收集杜牧師大辭典所無ê字彙片語。同工也提供真tsē資料，其中梅監霧牧師（Rev. Campbell N. Moody, 1865-1940）無條件提供四百guā張字彙kap備忘錄siōng-kài可貴。
資料蒐集齊全以後，巴博士tī廈門用了三、四個月編纂整理，tī 1922年自英國休假tńg來以後，馬上前往上海交商務印書館印刷。當時受選協助巴克禮牧師作最後ê校訂kap監印者是楊士養牧師（1898-1975）。楊牧師1919年tī台南神學校畢業，受選時tú tuì日本東京明治學院深造tńg來，任傳道師；隨巴牧師赴上海監印ê時，只好「暫別含情脈脈ê新娘（黃千金）kap初生五個月ê kiáⁿ（長男鳳生）」云。

1923年，《增補廈英大辭典》（書名:Supplement to Dictionary of the Vernacular of Spoken Language of Amoy），順利出版。頭序kap說明5頁，辭典276頁，篇幅約有杜原著ê二分之一。 Koh伊所增補ê字lóng無一字tī原著ê頂面。原著無漢字對照，但增補就有漢字；所用拼音方法也盡可能kap原著一致。因為其資料蒐集完備、說明清晰詳盡，增補出版後馬上受tio̍h普遍ê歡迎。[1980年台北古亭書屋刊印ê《廈英大辭典》，就是杜嘉德原著kap巴克禮增補兩書合訂重版]。