《賴永祥講書》

 | | | 轉寄

巴克禮推動白話字

作者 賴永祥 2006.04.30

賴永祥講書(020)

台灣ê南北基督長老教會，過去真tsē年lóng使用羅馬拼音ê白話字。Tsit種白話字是用ABC字母，將台語ê聲音kap語調拼出來ê。白話字不但ē-tàng正確將聖經或其他ê意思傳達hō͘讀者，beh學會曉也m̄免用guā-tsē時間。

推動白話字最力者是巴克禮牧師(Thomas Barclay,1849-1935)。伊回憶講：「自我來到台灣，taⁿ beh五十年，我一直堅信三項事。第一，若beh有健全koh有活命ê教會，每一個信徒不分男女，lóng tio̍h研讀聖經。第二，tsit-ê目標使用漢字是無法度達成。第三，使用羅馬拼音ê白話字，ē-tàng達成這目標。白話字適合婦女、兒童kap未受過漢字教育ê人使用；讀冊人(士人)只用漢字，就是對白話字ê輕視。所以我決心以身作則，用白話字來代替漢字。我一生只有一pái講道用漢字聖經，為tio̍h hit-pái我感覺遺憾。我當然知影，只用白話字會hō͘人誤會做無學問ê人，但想到可能帶來ê利益，我就不在乎loh。」(Edward Band. Barclay of Formosa,1936, p.67)

巴克禮牧師tī 1885年7月(光緒11年6月)，創辦白話字ê刊物 ── “Tâi-uân-hú-siâⁿ Kàu-huē-pò”，用漢字寫出就是《台灣府城教會報》。伊tī發刊詞講：「Lín本身看聖經，會受聖靈ê感化，雖然無人來教示，lín iáu-kú會明白上帝ê旨意。可惜lín本國ê字(漢字)真oh(難)，少少人看會曉得，所以阮有設法別物ê法度，用白話字來印冊，hō͘ lín眾人看khah快bat(懂)。最近tī府城阮有設一個印冊ê器具，thang印字親像tsit號ê 款式。Taⁿ阮ǹg望lín眾人beh出力學tsiah-ê白話字；後來阮若印什麼冊，lín lóng會曉得看。人m̄-thang phah算因為伊bat孔子字(漢字)，所以m̄免學白話字, 也m̄-thang看輕伊，講是gín-á所讀ê。兩樣ê字lóng有路用，不過因為tsit號白話字khah快也khah明, 所以人tio̍h代先學伊，後來若beh續讀孔子字是真好；總是白話字tio̍h khah tāi先，驚了若m̄讀白話字，lín bē曉得阮別日所印ê。所以阮苦勸lín眾人、入教以及聽道理ê人，男女老幼bat字kap m̄ bat字ê人，lóng總tio̍h緊緊來學。親像án-ni，lín 就會曉得讀tsit號ê教會報、外冊kap聖經。Ńg望lín ê道理ná深，德性ná齊(tsiâu)備。」《台灣府城教會報》，就是《台灣教會公報》ê前身，白話字公報最後一期是1049/1050期合刊，時1969年3月。

十七世紀荷蘭人tī台灣ê宣教，有相當ê成績，但是荷蘭政權hō͘鄭成功趕走，基督教也真快就失落。其原因neh？巴克禮牧師認為是無將聖經譯成本地語言，因為án-ni，無有人ē-thang得看聖經來保守其信仰。實在可惜ê是，當in tī荷蘭印好台灣本地語言ê福音書ê時，已經慢(遲)loh。(Band. Barclay of Formosa, 1936, p.68)。按宣教師倪但理(Daniel Gravius)譯出ê新港腔馬太福音(Het Heylige Euaugelium Matthei.....)是tī 1661年刊行，隔tńg年2月，荷蘭人就投降loh。(《教會史話》020話改寫)