《賴永祥講書》

 | | | 轉寄

《教會史話》修訂1_018, 台灣ê巴克禮

作者 賴永祥 2019.06.23

巴克禮牧師（Rev. Thomas Barclay, 1849-1935）是台灣教界ê一个巨星。伊創設神學院、推行白話字、創辦教會報、重譯聖經、增補廈英大辭典等等，事蹟列舉bē-liáu。1935年10月5日，伊息勞歸天，結束了tī台灣60年ê傳道生涯，距南部教會beh舉行設教70禧年盛典kan-taⁿ六工。

記念伊ê專刊，siōng早ê to̍h是伊往生隔tńg月出版ê台灣教會公報第608號「公報創刊者故巴克禮博士記念號」。隔tńg年有井川直衛主編「バァクレイ博士の面影」（1936年9月台南基督教真理社刊，日文，共236頁）。Tsit本冊以回憶kah講話為主，執筆者有內外人士十數名，包括高金聲牧師、潘道榮牧師、王守勇牧師、施鯤鵬牧師、萬榮華牧師、武田公平牧師、細川瀏牧師、蘭大衛醫生、國府種武、高再得夫人（侯青蓮）、劉瑞山、顏振聲醫生、M. Barboor等，牽涉tio̍h巴牧師ê生涯、傳道、教會政治、翻譯聖經、kah乃木將軍ê相見、日常生活等ta̍k方面；mā譯出巴牧師幾篇短文，親像「感謝kah祈求」、「台灣南部設教七十年ê回顧」、「台灣府城教會報第一張」、「台灣島」。

M̄-koh siōng權威之作是萬榮華牧師（Rev. Edward Band）用英文所寫「台灣ê巴克禮」（ “Barclay of Formosa”）一書。東京教文館，1936年刊，212頁。Tsit本冊利用巴克禮ê日記kah教會檔案，簡單扼要敘述（sū-su̍t）伊一生ê貢獻。1972年，台北成文出版社bat刊伊ê複印本，所以bē oh得買tio̍h。

後來之巴牧師傳記，無一个m̄是以萬榮華撰者為根據；華語著作siōng好ê，一个是詹正義編譯「巴克禮博士kah台灣」（台北長青文化事業公司，1976年刊，176頁），二是劉富理編著「巴克禮kah伊ê教會增長原理」（洛杉磯台語福音教會，1982年刊，108頁）。詹著有附錄五篇，包括巴克禮生平大事記、巴克禮短篇作品ê中譯（感謝kah祈求、台灣南部設教70週年ê回顧、台灣島）、「巴克禮博士kah台南太平境教會」（施鯤鵬著）等等。文筆iáu算順暢，只有本地人名ê考證lio̍h-á欠周至。親像老信徒吳着（吳葛之父）寫做中叔，嘉義長老黃西經寫做世景，陳有成寫做右生，青年會ê劉子祥寫做劉上士之類。劉著以教會增長眼光紹介巴牧師一生tī台灣ê事奉，因為án-ne，suah略去真tsē巴牧師所述ê歷史事件；其實伊所述ê雖然是片斷回憶，資料價值非常高。

巴夫人遺著有少年讀物 “Letters from Formosa to Boys and Girls”一冊，1910年刊，80頁，有M. Barboor ê序文，o-ló夫人。

──《台灣教會公報》1892期 主後1988年6月5日

巴克禮


巴克禮牧師娘