《賴永祥講書》

 | | | 轉寄

劉青雲著《大學精詳》

作者 賴永祥 2006.08.13

賴永祥講書(023)

四書五經是中國儒家真髓ê古典。《四書》是指《大學》、《中庸》、《論語》kap《孟子》；而《五經》是指《詩經》、《尚書》、《禮記》、《周易》kap《春秋》。《大學》原本是《禮記》中ê一篇(相傳是孔子ê弟子曾參所作)，是孔子kap其門徒留落來ê文字，是初學入德之門，所以南宋大儒朱熹(1130-1200)就將伊列為「四書」的頭一本。

《大學精詳》，是台南劉青雲所著，分段提供《大學》一書ê (1)「音讀」(教人án-tsuáⁿ讀)，(2)「註釋」(漢文ê註解)，(3)「和譯」(日語譯) kap (4)「福譯」(福佬話譯)。「音讀」kap「福譯」是用廈門音白話字表出。

Taⁿ咱來舉例：「治國必先齊其家」一句，音讀就是tī kok pit sian tsê kî ka，其福譯就有 “tī-lí kok-ka tik-khat tio̍h tāi-sing tsíng-tsuê i ê ka-tîng”。「物有本末，事有終始，知所先後，則近道矣」，其福譯 “Mi̍h ū thâu-bé, tāi-tsì ū suah-bé kap khí-thâu; tsai só͘ tio̍h tāi-sing kap suah-bé tsiah sī kūn tī tō-lí (著者無用連字號，例有(-) 是我所加ê)

1941年11月台南三多商會發行，共四八頁。當時台灣總督府已經開始推動「皇民化運動」，Tsit本宣揚中國古聖賢遺教ê書，除了漢文、用白話字表達ê台文、也有日文，對日本人來說，會thang接受。著者家己出版、送人，也tī公報社賣。

刊登廣告講：原文橫載，音讀附帶，註釋精密，引例充實，出典正確，入腦敏覺，全體解剖，用意周到，和福雙譯，格物知識，解義詳明，一讀心輕，排列嶄新，發揮求真，對照便利，漢學玩味，紙數僅少，婆心微眇，獨習自在，蘊奧展開，道德快明，儒學速成，內容如此，稀有好著！