《賴永祥講書》

 | | | 轉寄

《教會史話》(1_030) 巴克禮增補杜辭典

作者 賴永祥 2007.11.19

巴克禮牧師是1873年春天tuì格拉斯哥大學神學院畢業ê。晚年伊回憶講：tī我大學生涯裡，我無想tio̍h海外宣教，直到最後一年……有一工，院長杜治博士 (Dr. George Dooglas)ê小弟，就是廈門tńg來ê杜嘉德牧師，來到學校招募前往中國ê宣教師。……暗時院長邀請一kuá學生kap杜嘉德牧師見面，當時杜牧師tú-teh從事廈門腔漢英辭典出版ê工作。伊hō͘阮看辭典ê校對稿樣，我向伊講看起來印得iáu bē-bái。伊講：「無m̄-tio̍h！當你來到中國，相信你一定會發現tsit本字典有相當ê用途」。以後伊寫phe勸我，隨時kap伊動身，m̄免koh再讀完神學課程，tī中國宣教師ê需要是迫切ê……但我當時無答應伊ê建議（Band: Barclay of Formosa, P17~18）。巴克禮ê來台是1875年。

杜嘉德牧師編著ê「廈英大辭典」一向是宣教師學習廈門腔siōng好ê參考冊。但出版以後經過將近半世紀之間，中國大變，新科學用語（如電器方面）、社會用語以及真tsē新字lóng m̄ tī這辭典內面。為tio̍h適應時代ê需要，1913年tī台廈之眾同工，請巴克禮牧師作補遺ê工作。In知影巴牧師幾十年來不斷teh學習當地語言，而且將所聽道ê用語，不管好bái lóng作記錄。巴牧師受託，就tī繼後ê十年中，利用閒暇整理伊收集杜牧師大辭典所無ê字彙片語。眾同工mā提供真tsē資料，其中梅甘霧牧師（Rev. Campbell N. Moody）提供四百guā張字彙kap備忘錄siōng為可貴。

資料蒐集齊全以後，巴博士tī廈門用了三、四個月編纂整理，á tī 1922年自英國休假tńg來以後，隨時前往上海交商務印冊館印刷。當時受選協助巴博士牧師作最後ê校訂kap監印者是楊士養牧師（1898∼1975）。楊牧師tī 1919年tuì台南神學院畢業，受選時tú tuì日本東京明治學院深造tńg來，任傳道師；tuè巴牧師赴上海監印ê時，只好「暫別含情脈脈ê新娘（黃千金）kap初生五個月ê kiáⁿ兒（長男鳳生）」。

隔tńg年1923 年，「廈英大辭典增補」（Supplement to Dictionary of the Vernacular of Spoken Language of Amoy），終其尾出版lah。序kap說明五頁，辭典二七六頁，篇幅約有杜原著ê二分之一。原著無漢字對照，但增補就有漢字；á其拼音方法盡可能kap原著一致。因其資料蒐集完備、說明清晰koh真詳細，出版後馬上受tio̍h普遍ê歡迎。1908年台北古亭冊屋將杜原著kap巴增補合訂重版，加題中文冊名「廈英大辭典」。
(華語原載：《台灣教會公報》1904期主後1988年8月28日)