《賴永祥講書》

 | | | 轉寄

《教會史話》(1_042)祖港ê李順義

作者 賴永祥 2008.05.04

崗林李順義是故台灣教會公報社主筆李嘉嵩牧師(1914-1978)ê a祖。李嘉嵩「一O͘年來」(1979年人光出版社)第一章「先祖先們」云:旗後有正式禮拜ê時，佈道所內面lóng ē-tàng看tio̍h我ê a祖一家伙á。Tuì台南縣山地崎嶇崗á林到高雄旗後，以今á日ê汽車、火車kap步行，來回mā tio̍h ài 10點鐘。Tī一百年前，a祖beh tshuā領一家伙á去旗後看馬醫生，若是聽tio̍h做禮拜，就必須tī拜六天亮進前，帶tio̍h一支火把出發，一直向南行足足一工一暝ê路程，tī禮拜日早起 tsiah ē-tàng到旗後。tī路途中勞頓三頓無穩定，koh常常有土匪出現，過路人m̄-nā常常有hō͘搶劫ê危險，就是生命mā是仝khuán。A祖tshuā厝內ê人去旗後做禮拜ê時，in一陣 人必須ài帶ê物件有食--e、武器槍械kap粉鳥等三項物件。食—e有啥米用途，無講你mā知；武器槍械是用來提防路中來搶劫ê土匪，講到粉鳥，就是等到一陣人平安到旗後了後，tī禮拜日早起kā伊放出--來hō͘伊飛tńg去崗á林，hō͘阮祖媽kap厝內ê人看tio̍h會凍放心，知影in已經平安到旗後--a。(tse是guā ni á感動ê故事!)….ti71867年a祖就奉獻地皮kap建築物，如今教會會址iáu是 tī仝一ê地點….。

下過「一O͘年來」起頭講：聽講a祖李義順，自從馬醫生tī台南開設佈道所兼診所ê時(tsit本冊註1856年6月15日，m̄-koh是16開設tsiah-tio̍h)，就bat kap故鄉崗á林同村ê病友到台南馬醫生hia求醫…。Tsit段是「聽講」--e，m̄是史實。你若是讀必麒麟tio̍h Pioneering in Formosa(中譯：老台灣)就知影馬醫生kap崗á林ê人kap土地第一擺接觸是tī 1865年11月，馬醫生已經被迫退出台南，並徙去tī旗後。

Koh tī「一O͘年來」卷頭有崗á林李家簡譜；記祖先源流講：祖先相傅來自江蘇省新港府，乘漁船過海漂流tī現今高雄白沙崙ê所在，轉台南府居欉á林，後轉新港to̍h是現在新市鄉，而擴到山頂鄉，到文貴公(按順義之a祖)始入崗林(通稱崗á林)開拓到taⁿ......。其實，江蘇省並無設置新港府。「滿車功五品銜順義李公佳墓」是同治甲戌(13年)臘月所立者；刻有祖籍「新港」，tsite5所在應該是平埔四大社之一ê新港社。Koh再讀必麒麟ê冊，就知必麒麟是先訪問新港，得tio̍h鄉長ê紹介，kap馬雅各醫生去訪問有仝族人ê番社，第一站是崗á林，見tio̍h頭目，tsite5人是tī清政府負責社務--e。根據推斷tsit ê頭目應該是李順義，伊mā是新港社仝族ê人。李順義傳5後生、2查某kiáⁿ，長女涼娘、長子登旺、次子登發、三子登富(過三房)、四子登炎，五子登科、末女發金。(登發是嘉嵩ê阿公。)

「一O͘年來」是一本台灣教會界真難得ê傳教者自傳，tuì阮阿祖in來談起，包括一生ê回顧kap展望。聽講接替徐謙信牧師tī台灣神學院教「台灣教會史」ê吳文雄牧師特別要求學生tī第一個禮拜閱讀tsit本冊。

　 《台灣教會公報》1917期 主後1988年11月27日