《賴永祥講書》

 | | | 轉寄

《教會史話》(1_051)鄭成功優遇神父李科羅

作者 賴永祥 2008.07.06

鄭成功是m̄是天主教徒？因為資料ê限制，對tsit-ê疑問無法度回答，干taⁿ成功bat優遇對待神父李科羅是事實niâ。根據G. Philips 撰「國姓爺傅」載:.成功占領廈門ê hit段時間，hit-ê所在設有道明會ê宣道所，主持人是李科羅(英文Victorio Ricci，西班牙人稱Victorio Riccio)；tī 1654年自馬尼拉航到廈門，承成功ê特准，tī in tau對面，建立教堂;hit-ê教堂自1655年8月5日開始toh公開舉行禮拜。

鄭成功來台驅荷了後，決定beh招諭呂宋(菲律賓)，hông選任為使節者ê就是李科羅神父。1662年5月5日(永曆16年3月18日)李科羅抵馬尼拉，隔tńg工謁菲律賓總督Mararique de lara)呈成功函。菲律賓ê民眾lóng主張愛強硬對付，將非教徒居留ê華人攏趕出去。消息傳出來，引起華人驚惶逃避koh kap官方發生衝突，被攻擊ê人、被遣送tńg去ê人達到數千人。成功得報章人去hông殺害，伊真受氣to̍h決定遣兵征菲，然渠tī 6月23日(舊曆5月8日)突然間破病死去，所以代誌無成功。詳情參閱拙文「明鄭征菲企圖」(「台灣風物」4卷 1期iá是「明鄭研究叢輯」(一)，tī-tsia toh簡單介紹。

日人稻垣孫兵衛(其外)，tī「鄭成功」(昭和4年台灣經世新報社刊)，bat有人講鄭成功是一ê天主教徒，並認為伊會挺永曆帝，是因為in是仝款信仰ê。原來桂王由榔(永曆帝)嫡母王氏教名烈納(Helena)，生母馬氏為瑪利亞(Maria)，中宮王氏為亞納(Anne)，太子慈煊為當定(Constantine)，宮女受洗ê mā buē少。Koh當1650年清軍入廣東韶州，黃帝移駕廣西梧州ê時，以特使 ê身份tsah皇太后kap內宮龐天壽之函，赴羅馬晉謁教皇ê人，是耶穌會士卜彌格(Mitsael Boym)一事，史實會凍證明。永曆朝廷kap天主教不平凡關係由此thang知。成功是m̄是因為同信仰tsiah會來侍奉永曆正朔，iáu koh愛考證。m̄-koh，鄭成功入台，無情ê處死荷蘭ê宣教師，iá是因為荷蘭人是新教徒m̄是天主教徒之緣故？

李科羅神父，意國Florence人，kap tī中國史上真有名ê耶穌會士利瑪竇(Matteo Ricci)同族。1635年入道明會，1648年來到馬尼拉，學華語7年。後來被派到思明州(厦門)。受寵tī鄭成功真深。1662年任成功遣菲特使，隔tńg年亦奉鄭經命使菲；事平了後iáu是tńg去厦門。1664年清軍攻略該地ê時被掠，隔tńg年脫險來到台灣，tī雞籠居留一年，次年轉往馬尼拉；1685年2月17日死tī馬尼拉澗內，享年80。 　

《台灣教會公報》 1929期 主後1989年2月19日