《賴永祥講書》

 | | | 轉寄

《教會史話》(1_072)盲人信徒溫旺被thâi

作者 賴永祥 2008.11.30

甘為霖牧師寫「台灣佈教之成功」tsit本冊，mā公開了另外一ê kap吳志高有關ê事件，就是溫旺被thâi。詳情請讀該書412~420頁kap 517~519頁。

溫旺（Un Ong）吉貝耍人，早年因為一寡小代誌kap吳志高ê黨徒有衝突，所以有一暗tī路nih被襲擊suah來受傷，最慘ê人就是兩luí目睭去hông挖--去。後來伊聽道得救，無koh再怨恨伊ê敵人，甚至親身到吳志高hia見證主愛。或者吳志高是為beh收買伊，所以表示願意提供金錢，mā愛伊參與tī店仔口（白河）ê生意。m̄-koh伊以「主ê徒無應該kap非信徙合股作生意」為理由，來拒絕--伊。

事件發生ê前年（1876）夏天，有一ê小事件.吉貝耍信徒ê牛，hō͘一群黨徒掠去，tshuā領這一群;人ê章興（Tsiong-hin）ti7leh趕hit隻牛ê時被信徒認出--來，suah告到地方官衙，m̄-koh代誌著按呢無結果a。章興恨信徒去kā tâu，就嗆聲beh報仇，伊ê目標是溫旺，因為溫旺為信徒同僚要求公道尚有力。

1877年4月14日，溫旺去店仔口beh領一筆錢，in子溫木（Un Bok，11歲）kap吉貝耍教會肯年向茂春（Hiong Baw-tshun）偕行。一行tī回程ê時，到了牛稠埔頭，tú著7、8 ê匪徒由章興tshuā領，匪徒就giâ刀斬茂春到伊失去知覺，後 溫木ê頭kap肩胛頭，最後兇殺溫旺致死。茂春後來恢復知覺想beh逃走，被兇惡有名後山頭出身ê名土（Thuh）者發覺，一直追到許秀才ê大厝門前，好加在民眾出來解救，tsiah被送交hō͘番社官衙法辦。

隔tńg工有2位信徒趕去嘉義縣beh稟告，到底是庄腳人，無法託人備辨官方要求ê冊面，不會o͘-se，也就無任何結果。番仔田總爺陳朱英（Tan Tsu-ing）bat去吉貝要耍作過調查。由他知影被掠ê土在番社監獄3日就逃走，tī路中因為搶了一ê苦力ê衣服被hit ê苦力追到屬於吳志高ê糖舖（a large sugar-store） 官員要求吳志高交出人，m̄ koh去hông拒絕。章興無去hông掠去，返吉貝耍仍頗得意而不隱蔽伊所做ê代誌。6日了後信徒tī遠離兇殺現場數哩外找到溫旺ê屍體，頭蓋受著kòng傷，歸身軀攏有傷痕，身上有6箍。

如此，有白水溪之遭難、有溫旺之遭殺，有其他真多對信徒ê侮辱kap迫害，再加上吉貝要禮拜堂被燒毀（1877年12月11日）等事件常常傳出，甘牧師只好央求英領事Frater ê協助，堅決要求官方愛好好仔處理tsit件代誌。最後嘉義縣重開公審，判所有兇手就範，總爺被降級處分，吉貝要禮拜堂愛賠償新建，有新ê告示嚴飭保護教會。

《台灣教會公報》 1952期 主後1989年7月30日