《台語荒漠甘泉（全羅版）》

 | | | 轉寄

"Suè-hàn thau bán pû, tuā-hàn thau khan gû"

作者 陳清俊 翻譯 2010.04.04

listen

Sì ge̍h tshue-sì (Sì ge̍h sì ji̍t)

"Í-lī-sa kî-tó kóng, Iâ-hô-hua ah, kiû Lí khui i ê ba̍k-tsiu, hō͘ i uē khuàⁿ-kìⁿ." (Ṳ Lia̍t-ông-kì 6:17)

Tse sī lán su-iàu uī ka-kī kap pa̍t-lâng hō͘-siong kî-tó ê kî-tó-sû: "Tsú ah, kiû Lí khui guán ê ba̍k-tsiu, hō͘ guán uē khuàⁿ-kìⁿ, hō͘ guán tshin-tshiūⁿ sian-ti Í-lī-sa hō͘ "piàn suaⁿ hé-bé hé-tshia uî," (Ṳ Lia̍t-ông-kì 6:17) tán-thāi tsài guán khì îng-kng sìng-lī ê só͘-tsāi.

It-tàn khui lán ê ba̍k-tsiu, lán piān uē tsiong it-sing tuā-tuā suè-suè, pi-ai á-sī hí-lo̍k ê sū khuàⁿ-tsuè sī lâi pó-hō͘ lán lîng-hûn ê "tsiàn-tshia". Lán nā uē án-ni khuàⁿ, lán só͘ tú-tio̍h ê it-tshè lóng sī beh tsài lán ê tsiàn-tshia. Huán-bīn lâi kóng, suè-suè ê tshì-thàm, lán nā bô tsha̍p i, i iā uē tuā kàu uē teh-tshuì lán thâu-tsîng ê it-tshè ê mi̍h, hō͘ lán thòng-khó͘ kap tsua̍t-bāng.

Tsha-pia̍t sī tsāi-tī lán jû-hô suán-ti̍k, m̄-sī tsāi-tī sū ê pún-sin, sī tsāi-tī lán tuì sū ê khuàⁿ-huat. Nā-sī lán beh tó-teh, hō͘ it-tshè ê mi̍h lâi tè, lâi gíng tī lán ê sin-tsiūⁿ, lán uē hông gíng kàu tshuì-kô͘-kô͘, án-ni hit-ê mi̍h tsiū-sī khòng-tsè buē-tiâu ê huí-bia̍t-tshia; nā-sī lán peh tī tshia tíng, sái hit ê mi̍h, i tsiū piàn tsuè sìng-lī-tshia. In tsiū-sī Siōng-tè ê "hé-tshia", khái-suân tsiong lán tuà hiòng tsîng, tuà tsiūⁿ thiⁿ. --- Hannah Whitall Smith

Tsi̍t ê siū teh-tshuì ê lîng, liân Tsú iā bô pān-huat. Tse sī uī-sím-mih hit ê huán-tuì lán ê Sat-tàn, lóng beh hō͘ Siōng-tè ê tsú-bîn tuì in ê khuân-kíng, kám-kak tsua̍t-bāng, bô lâng thang pang-tsān. Ū lâng kóng, kun-tuī ê sū-khì nā kē-kē, sàn-bān bô tsing-sîn, khì tsiàn-tiûⁿ it-tīng uē su, uē sit-pāi. Guá thiaⁿ-tio̍h tsi̍t uī thuân-kàu-su, kóng i huê-kok tsiū phuà-pīⁿ, sim-tsîng tsin bái, in-uī i tsing-sîn siōng í-king sit-khì ióng-khì, tsiū ín-khí sin-thé bô hó-sè, suah phuà-pīⁿ.

Lán tio̍h ài jīn-bat Sat-tàn jû-hô tá-kik lán ê sim-lîng kap jû-hô lâi tí-khòng ê hong-huat. Nā-sī i uē iô-tāng lán ê li̍p-tiûⁿ, i tsiū beh īng tn̂g-kî uî-khùn ê hong-huat "In beh tshiúⁿ-tua̍t ông ê kuân, huí-huāi i, bia̍t-bô i kàu thiat-tí." (Tān-í-lí 7:25) ti̍t-kàu lán luán-jio̍k suah hòng-khì it-tshè sìng-lī ê hi-bāng.


附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com