《台語荒漠甘泉（全羅版）》

 | | | 轉寄

"Tsia̍h kín kòng phuà uáⁿ"

作者 陳清俊 翻譯 2010.04.18

listen


Sì ge̍h tsa̍p-pueh (Sì ge̍h tsa̍p-pueh ji̍t)

"I beh hō͘ i tsiâⁿ." (Si-phian 37:5)

Guá bat án-ni siong-sìn, tng guá kî-tó suah, guá ài ló͘-li̍k khì tshē-kiû kái-kuat, tse sī guá ê tsik-jīm. Tsóng-sī Siōng-tè kà guá ū khah hó ê hong-huat, hō͘ guá tsai ka-kī ê ló͘-li̍k siông-siông uē tsó͘-tòng tio̍h I ê tsok-uî. I khé-sī guá tng guá kî-tó liáu, ài tuì I ū sìn-sim, tsiong sū kau-thok I, īng o-ló ê sim thìng-hāu, tsí-iàu tsuè I tsí-sī guá só͘ tio̍h tsuè ê sū. Tsīng-tsīng thìng-hāu, sím-mi̍h sū iā bô tsuè, uân-tsuân sìn-khò Tsú. Tse hō͘ lán uē kám-kak tio̍h bô pá-ak ê khuán-sit, tse sī tsin tuā ê iú-hi̍k, lóng uē hō͘ lán siūⁿ beh ka-kī khì tàu saⁿ-kāng.

Lán tsai, tng tsi̍t ê lâng tī tsuí ni̍h beh im sí ê sî, i lóng uē siūⁿ beh pang-tsān khì kiù i ê lâng, tsóng-sī, tse lóng sī tsing-ka khì kiù ê lâng ê khùn-lân. Tsú thè lán khì tsing-tsiàn, lán khiok ài pún-sin piàⁿ-miā siūⁿ beh ka-kī khì tsiàn, sī tsing-ka Tsú ê khùn-lân. Tse m̄-sī Siōng-tè m̄-khíng, sī I bô pān-huat tsìn-hîng, in-uī lán ê kan-sia̍p hóng-gāi tio̍h I ê kang-tsok. --- C.H.P.

Tng lán khò sè-kan-siōng li̍k-liōng ê sî, tsing-sîn ê li̍k-liōng tsiū huat-hui buē tshut-lâi. Lán siông-siông bô hō͘ Siōng-tè kang-tsok ê ki-huē. Lán bô bîng-pi̍k I huê-tap lán ê tshíng-kiû sī su-iàu sî-kan. Siōng-tè hō͘ muî-kuì hue sik-tì, á-sī tsìng tsi̍t-tsâng siông tshiū lóng su-iàu sî-kan. I iā su-iàu sî-kan hō͘ tiū-tshân lâi tshut bí hō͘ lâng tsia̍h, Sing ài tsún-pī thô͘, tsiong thô͘ tshòng hō͘ i sang, su-iàu hō͘-tsuí lâi lūn-ti̍k, I sù sìⁿ-miā ê ua̍h-khì, jia̍t-khì lâi puh-gê, sîng-tióng, kàu kiat-si̍t ū tsin-tsuē tshik-á, tsuè-āu tsiah ū bí thang hō͘ iau-gō ê lâng tsia̍h.

Só͘ ū ê sū lóng su-iàu sî-kan. Só͘-í lán tsìng-tshân, lê-tshân, pò͘-tshân, jiân-āu ài thìng-hāu koh siong-sìn, ti̍t-kàu I ê tsí-ì si̍t-hiān. Lán tuì tsìng-tshân bîng-pi̍k tsit ê guân-tsik, lán ê kî-tó sing-ua̍h iā su-iàu o̍h siāng-khuán ê kà-sī. Siōng-tè su-iàu sî-kan huê-tap lán ê kî-tó. --- J.H.M.

附註:《荒漠甘泉》漢羅版kap "Hong-bô͘ Kam-tsuâⁿ"全羅版附CD，由人光出版社出版， 歡迎洽購(06-235-6277分機(122~124) ， e-mail:bo͘k@pctpress.com